2 Davida ese iena natuna tau haida Heberona dekenai ia havaraia. Iena vara guna be Aminona. Ia be Ahinoama, Ieserele hahine, ena natuna. 3 Iharuana be Kilea, Abigaila ena natuna, unai Abigaila be Nabala, Karamele tauna ena vabu. Ihatoina be Abesaloma, Maka ena natuna, Maka be Talemai, Gesuru taudia edia king ena natuna hahine. 4 Davida ena natuna tau namba 4 be Adonaisa, iena sinana be Hagiti. Iena natuna tau namba 5 be Sepataia, Abitala ena natuna. 5 Iena natuna tau namba 6 be Itireama, bona ia be Davida ena adavana Egila ena natuna. Unai natuna tau ibounai be Davida ese ia havaraia Heberona dekenai.

6 Saulo ena orea taudia, bona Davida ena orea taudia idia tuari noho neganai, Abinere ese iena siahu ia habadaia, Saulo ena orea lalonai. 7 Saulo ena vabu ta, ena ladana be Risipa, Aia ena natuna. Vadaeni dina ta Isiboseta ese Abinere ia badu henia, ia samania, ia gwau, “Badina dahaka egu tamana ena vabu ta oi sihari henia?”

8 Vadaeni Abinere ia badu maragi lasi, Isiboseta ena hereva dainai, bona ia gwau, “Be, lau be oiemu sisia, oi laloa, a? Bona oi laloa lau ese Iuda ena kahana taudia lau durua noho, a? Lasi momokani! Oiemu tamana Saulo be king dagi ia abia negana, ia mai bona hari, lau ese ia, bona iena varavara, bona iena turana lau badinaia momokani. Bona lau ese oi lau naria namonamo, Davida ena imana dekenai oi lau atoa lasi. To inai hari oi ese lau oi samania, hahine ta danu lau kerere dainai! 9-10 Lohiabada ese Davida ia gwauhamata henia, ia ese basileia be Saulo bona iena bese taudia dekena amo do ia kokia, bona Davida be Israela bona Iuda ruaosi edia king do ia halaoa. Lohiabada ia gwau Davida be tano ibounai ena king, Dano dekena amo ela bona Bere Sieba. Bema lau ese inai gwauhamata do lau hamomokania lasi neganai, Dirava ese lau ia alaia mase be namo!” 11 Vadaeni Isiboseta ese Abinere dekenai hereva ta ia gwauraia lasi, badina be, ia dekenai ia gari bada.

12 Unai murinai Abinere ese hereva gwauraia taudia Davida dekenai ia siaia, Heberona dekenai. Ia gwau, “Inai tano be daika ese do ia gunalaia? Lau danu maino do ita karaia, bona lau ese oi do lau durua, Israela ena kahana ibounai be oi dekenai do lau veria hanai.”

13 Davida ese Abinere dekenai ia haere, ia gwau, “Namo, do ita maino karaia. To gau tamona, oi mai neganai, king Saulo ena natuna hahine, Mikala do oi hakaua mai guna. Bema lasi, lau dekenai do oi hedinarai lasi.”

14 Bona Davida ese danu hereva gwauraia taudia Isiboseta dekenai ia siaia, ia gwau, “Lau dekenai egu adavana Mikala do oi henia lou. Lau ese ia lau adavaia ena davana totona be Pilistia taudia 100 edia usi kopidia dekena amo lau karaia.”

15 Vadaeni Isiboseta ese hesiai taudia ia siaia, Mikala be iena adavana Palitiela Laisi dekena amo idia abia totona. 16 To iena adavana Palitiela ese Mikala ena murinai ia raka, mai tai danu, ela bona Bahurimi. Vadaeni Abinere ese ia hamaoroa, ia gwau, “Oi giroa lou.” Vadaeni ia lou lao.

17 Davida dekenai ia do lao lasi neganai, Abinere be Israela tau badadia danu idia hereva hebou, bona Abinere ia gwau, “Nega sisina daudau umui ura Davida be emui king. 18 Harihari umui karaia diba, badina be Lohiabada ese Davida ia gwauhamata henia vadaeni, ia gwau, ‘Egu hesiai tauna Davida ena imana dekena amo lau ese egu orea Israela be Pilistia taudia edia imana dekena amo, bona Israela idia tuari henia besedia ibounai dekena amo do lau hamauria.’ ”

19 Abinere ese Beniamina taudia danu unai bamona ia hereva henia.

Vadaeni Abinere be Heberona dekenai ia lao, Israela besena, bona Beniamina iduhu ibounai edia laloa, bona edia ura, be Davida dekenai do ia hamaoroa totona.

20 Abinere, mai ena tau 20 danu, be Davida dekenai idia lao, Heberona dekenai. Unai neganai Davida ese aria ta ia karaia, Abinere bona iena tau 20 totona. 21 Abinere ese Davida ia hamaoroa, ia gwau, “Egu lohia bona egu king e, do lau toreisi, do lau lao, Israela taudia ibounai be oi totona do lau haboua. Idia ese oi danu maino do idia karaia, vadaeni oi ese oi ura henia taudia, bona gabudia ibounai, do oi biagua.”

Vadaeni Davida ese iena orea taudia ia hamaoroa, idia ese Abinere do idia hadikaia lasi. Gabeai ia ese Abinere ia siaia lao.

22 Unai neganai Davida ena tuari taudia bona Ioaba be tuari dekena amo idia ginidae, bona tuari dekenai idia dadia kohu momo idia mailaia. To Abinere be Davida danu Heberona dekenai ia noho lasi, badina Davida ese ia siaia lao vadaeni, bona ia gwauhamata henia vadaeni tau ta ese Abinere do ia hadikaia lasi.

23 Ioaba mai ena tuari taudia ibounai danu idia ginidae neganai, tau haida ese idia hamaoroa, idia gwau, “Abinere Nere be king Davida dekenai ia mai, bona Davida ese mai maino danu ia siaia lao, bona ita ibounai ia taravatua, ita ta ese Abinere do ita hadikaia lasi ia gwau.”

24 Vadaeni Ioaba be king Davida dekenai ia lao, ia gwau, “Edena bamona oi karaia? Oi kamonai, Abinere be oi dekenai ia mai, badina be dahaka oi ese mai maino danu oi siaia lao? 25 Oi diba lasi Abinere Nere ena kara, a? Ia ese oi do ia koia totona ia mai. Ia mai be oiemu manoka gabuna, bona dahaka oi karaia noho, do ia itaia totona, bona gabeai oi do ia hadikaia.”

26 Ioaba be inai hereva ia gwauraia, vadaeni ia ese Davida ia rakatania, bona ia ese hesiai taudia ia siaia, Abinere do idia mailaia lou totona. Idia ese Sira ranu guri dekenai, Abinere idia davaria, bona unai gabu dekena amo idia hakaua lou mai. To unai kara be Davida ia diba lasi. 27 Vadaeni Abinere be Heberona dekenai ia lou mai neganai, Ioaba ese hanua magu ena iduara kahirakahira ia hakaua siri, hunia dekenai do ia hereva henia bamona. To idia ruaosi idia gini hebou neganai, Ioaba ese kaia kwadogina dekena amo Abinere ena bogana ia gwadaia. Vadaeni Abinere ia mase, iena mase be Ioaba ena tadina Asahele ena mase ena davana totona.

28 Gabeai, Davida ese unai sivarai ia kamonai neganai ia gwau, “Lohiabada ia diba vadaeni lau bona lauegu basileia taudia be Abinere ena mase totona ai be kerere lasi momokani. 29 Ioaba sibona ia kerere. Unai dainai unai kerere ena davana be Ioaba bona iena bese taudia edia latanai do ia ginidae. Lau ura Ioaba ena bese edia uru ibounai lalonai gonoria gorere, o lepera gorere, o hahine edia gaukara do idia karaia, o tuari kaia dekena amo do idia mase, o do idia hitolo.” 30 Badina be Ioaba bona iena tadina Abisai ese Abinere idia alaia mase, Abinere ese Gibeona tuari lalonai, idia edia tadina Asahele ia alaia mase ena davana.

31 Vadaeni Davida ese Ioaba bona iena orea taudia ibounai ia hamaoroa, ia gwau, “Emui dabua do umui darea, puse dabua do umui karaia, bona Abinere dainai do umui tai.” King Davida be mase patana ena murinai ia raka.

32 Abinere be Heberona dekenai idia guria, bona king Davida ese iena gadona ia habadaia, bona Abinere ena guria gabuna badibadinai ia tai. Taunimanima ibounai danu idia taitai. 33 Davida ese inai bogahisihisi ane Abinere totona ia abia, ia gwau,

Davida ese inai ane ia abia, vadaeni taunimanima ese Abinere totona idia tai lou.

35 Unai dina dekenai taunimanima ibounai ese Davida idia noia, do ia aniani totona. To Davida be gwauhamata metauna ia gwauraia, ia gwau, “Lau ese aniani ta do lau ania lasi ela bona dina do ia diho. Bema dina do diho lasi neganai gau ta lau ania, Dirava ese lau do ia alaia mase be namo!”

36 Taunimanima ibounai ese inai Davida ena hereva idia kamonai, bona edia lalona idia namo. Bona inai kara sibona lasi, to Davida ena kara ibounai totona, taunimanima edia lalona idia moale. 37 Bona unai dainai, unai dina dekenai, taunimanima bona Israela taudia ibounai idia diba, Abinere Nere ena mase be Davida ena ura lasi.

38 King Davida ese iena hesiai taudia ia hamaoroa, ia gwau, “Kamonai! Hari dina be lohia tauna, bona Israela ena tau badana ta ia mase vadaeni. 39 Momokani, Dirava ese lau ia abia hidi, bona king dagi lau dekenai ia henia. To hari dina lau be manoka momokani, bona lau goada lasi inai Seruia ena natuna ruaosi edia kerere davana do lau karaia. Idia edia dagedage ese egu goada ia hanaia. To Lohiabada ese unai kara dika taudia edia kerere davana do ia henia, edia dika ena bada hegeregerena.”

<- 2 SAMUELA 22 SAMUELA 4 ->