2 SAMUELA 12

Natana ese Davida ia gwau henia, bona Davida ese iena lalona ia giroa

1 Lohiabada ese Natana be Davida dekenai ia siaia lao. Ia be Davida dekenai ia ginidae, ia gwau, “Hanua ta lalonai tau rua idia noho, ta be kohu momo tauna, ma ta be ogogami tauna. 2 Kohu momo tauna ena mamoe bona nani be momo herea. 3 To ogogami tauna ena kohu be tamona sibona, mamoe natuna hahine ta, ia hoia gauna. Ogogami tauna ese mamoe ia ubua, iena natuna ia ubua bamona, sibona ena aniani dekenai ia ubua, bona sibona ena kapusi dekena amo mamoe ese ia inua, bona unai tau ena mamuna dekenai mamoe be ia hekure, iena natuna kekeni bamona. 4 Nega ta vadivadi tauna ese kohu momo tauna ena ruma dekenai ia ginidae. Kohu momo tauna ia ura lasi iena mamoe ta ia alaia, unai dainai, ogogami tauna ena mamoe natuna ia abia, ia nadua, iena vadivadi tauna dekenai ia henia.”

5 Vadaeni Davida be ia badu momokani unai kohu momo tauna dekenai, ia ese Natana dekenai ia hamaoroa, ia gwau, “Mauri Lohiabada dekenai lau gwauhamata, unai bamona ia karaia tauna harihari do ia mase be namo. 6 Ia ese mamoe natuna ena davana do ia henia nega 4, badina ia be bogahisihisi ia henia lasi dainai.”

7 Vadaeni Natana ese Davida dekenai ia hereva henia, ia gwau, “Unai kohu momo tauna be oi! Lohiabada, Israela ena Dirava be inai bamona ia hereva: ‘Lau ese oi lau abia hidi, Israela ena king oi lao, bona Saulo ena siahu dekena amo oi lau hamauria. 8 Oiemu biaguna ena ruma oi dekenai lau henia, oiemu biaguna ena adavana danu oi dekenai lau henia. Siahu oi dekenai lau henia, vadaeni Israela bona Iuda edia king oi lao. Unai oi dekenai lau henia gaudia, idia hegeregere lasi, a? Bema idia maragi neganai, lau ese idia lau habadaia diba nega rua, ani? 9 Badina dahaka Lohiabada ena hereva oi negea? Badina dahaka Lohiabada ena vairanai oi kara dika bada? Oi ese Uria, Hiti tauna, tuari kaia dekena amo oi alaia, bona iena adavana oi abia, oiemu adavana oi halaoa vadaeni. Uria oi alaia, Amono taudia edia tuari kaia dekena amo. 10 Unai oi karaia dainai, tuari kaia be oiemu natuna bona tubuna taudia dekena amo do lau abia siri lasi. Badina be oi ese lau oi negea, bona Uria, Hiti tauna ena adavana oi abia, oiemu adavana oi halaoa.’

11 “Lohiabada be inai bamona ia gwauhamata, ia gwau, ‘Oi sibona oiemu famili lalona dekena amo, dika oi dekenai do lau havaraia. Oiemu adavana haida be do lau abia lao, oiemu varavara tauna dekenai idia do lau henia, bona ia ese dina ena diari lalonai idia do ia sihari henidia. 12 Badina be unai kara be hunia dekenai oi karaia, to lau ese unai kara do lau havaraia hedinarai, Israela taudia ibounai do idia itaia totona.’ ”

13 Vadaeni Davida ese Natana dekenai ia hamaoroa, ia gwau, “Lohiabada dekenai lau kara dika vadaeni.”

Natana ese Davida ia hamaoroa, ia gwau, “Lohiabada ese oiemu dika ia gwauatao vadaeni, do oi mase lasi. 14 To, unai kara dekena amo oi ese Lohiabada oi negea momokani dainai, hari ia vara vadaeni merona be do ia mase.” 15 Vadaeni Natana be iena ruma dekenai ia giroa lou.

Davida ena natuna merona ia mase. Solomona ia vara

Vadaeni Lohiabada ese Davida ena natuna, Bataseba dekena amo ia havaraia merona, be ia hagorerea. 16 Davida ese Dirava ia noia, iena natuna dainai. Davida be ia aniani lasi, to ia be iena daiutu lalonai ia raka vareai, bona hanuaboi lalonai tano sibona dekenai ia hekure. 17 Davida ena hesiai tau badadia be Davida dekenai idia lao, tano dekena amo do idia hatorea isi totona, to ia be ura lasi. Aniani be idia danu ia aniani lasi.

18 Dina 7 idia ore neganai mero ia mase. Davida ena hesiai taudia be unai mase herevana idia ura lasi Davida idia hamaoroa, idia gari dainai. Idia gwau, “Mero ia mauri noho neganai ai hereva henia, to ai dekenai ia kamonai lasi. Vadaeni edena bamona unai mase herevana do ai hamaoroa diba? Sibona do ia alaia, a?”

19 Davida ese iena hesiai taudia ia itaia, idia hereva maragimaragi noho, vadaeni iena lalona ia kehoa, ia diba mero ia mase vadaeni. Davida ese iena hesiai taudia ia nanadaia, ia gwau, “Mero be ia mase, a?”

Idia gwau, “Ia mase vadaeni.”

20 Vadaeni Davida be tano dekena amo ia toreisi, ia digu, iena tauanina be bonana namo dehoro dekenai ia dahua, dabua namodia ia karaia. Bona Lohiabada ena Dubu lalonai ia raka vareai, ia tomadiho. Unai murinai ia be iena ruma dekenai ia lao, aniani totona ia noinoi, bona idia ese aniani idia henia neganai, maoromaoro ia aniani.

21 Iena hesiai taudia ese Davida idia hereva henia, idia gwau, “Oiemu kara dekenai ai daradara, badina be mero ia mauri neganai, oi aniani lasi bona oi taitai, to mero ia mase murinai oi toreisi, oi aniani!”

22 Davida ia gwau, “Mero be do ia mauri noho neganai lau aniani lasi bona lau taitai, badina inai bamona lau laloa, lau gwau, ‘Daika ia diba, sedira Lohiabada ese lau dekenai do ia bogahisihisi, bona mero do ia mauri, o?’ 23 To harihari mero be ia mase vadaeni, bona do lau aniani lasi ena anina be dahaka? Do lau hamauria lou diba, a? Lau be ia dekenai lau lao diba, to ia be lau dekenai do ia giroa mai diba lasi.”

24 Vadaeni Davida ese iena adavana Bataseba ena lalona ia hagoadaia. Idia ruaosi idia mahuta hebou, bona Bataseba ese natuna merona ta ia havaraia. Mero be Davida ese iena ladana ia atoa, Solomona. Lohiabada ese mero ia lalokau henia. 25 Lohiabada ese peroveta tauna Natana ia oda henia, unai mero ena ladana do ia atoa, Iedidaia.

Davida ese Raba hanua ia abia

26 Ioaba ese Raba, Amono taudia edia hanua ta, ia tuari henia, bona unai hanua ena king ia abia. 27 Vadaeni Ioaba ese hereva gwauraia taudia Davida dekenai ia siaia, ia gwau, “Raba be lau tuari henia vadaeni, bona Raba ena ranu gabuna lau abia vadaeni. 28 Unai dainai, oiemu tuari taudia oredia do oi haboua, Raba hanua do umui koua hagegea, do umui abia, lau sibona ese hanua do lau abia, bona egu ladana do lau habadaia garina.”

29 Vadaeni, Davida ese iena tuari taudia ia haboua, Raba dekenai ia lao, ia tuari henia ela bona ia abia. 30 Raba ena king ena kwara gauna be iena kwarana dekena amo ia kokia, unai kwara gauna ena golo ena metau be 35 kilogaram, bona unai golo ena lalonai be herahera nadi namo hereana ta. Vadaeni Davida ena kwarana dekenai idia atoa. Davida ese danu kohu momo herea Raba hanua dekena amo ia abia lao.

31 Davida ese danu Raba hanua taudia ia abia lao, gaukara idia dekenai ia henia, iri bona piki, bona auri iradia dekena amo do idia gaukara. Bona unai taudia ia siaia lao, raro dekena amo biriki do idia karaia. Amono hanua ibounai edia taudia dekenai unai bamona gaukara ia henidia. Vadaeni Davida be Ierusalema dekenai ia giroa lou.

<- 2 SAMUELA 11 2 SAMUELA 13 ->