1 Elisaia ese iena natuna ia hamauria lou hahine ia hamaoroa vadaeni, ia gwau, “Do oi toreisi, oiemu bese taudia danu do oi lao, bona oi noho diba gabuna ta dekenai do umui noho, badina be Lohiabada ese hitolo bada be tano dekenai do ia havaraia. Inai hitolo be lagani 7 lalonai tano dekenai do ia noho.” 2 Vadaeni unai Suneme hahine ese Elisaia ena hereva ia kamonai henia. Ia toreisi, ia lao, mai ena bese taudia danu. Idia be Pilistia taudia edia tano dekenai idia noho, lagani 7.

3 Lagani 7 idia ore neganai, hahine be Pilistia taudia edia tano dekena amo Israela tano dekenai ia giroa mai. Vadaeni ia be king dekenai ia lao, do ia noia, iena ruma bona iena tano do ia abia lou totona. 4 Unai neganai king be Gehasi, Elisaia ena hesiai tauna danu idia herevahereva noho, badina king ia ura bada Elisaia ena hoa karadia edia sivarai do ia kamonai.

5 Elisaia ese mase merona ia hamauria lou ena sivarai be king dekenai Gehasi ia hamaoroa neganai, inai mero ia hamauria lou ena sinana, inai Suneme hahine, ia ginidae, king dekenai ia noinoi, iena ruma bona tano do ia abia lou totona. Vadaeni Gehasi ia gwau, “King e, egu lohia e, inai hari lau herevalaia hahine be inai, bona iena natuna danu, Elisaia ese ia hamauria lou merona.”

6 King ese hahine ma ia nanadaia, bona hahine ese sivarai ma ia gwauraia. Unai dainai king ese iena opesa ta ia oda henia, ia gwau, “Inai hahine ena gau ibounai do oi henia lou, bona iena uma ena anina ena moni, iena raka siri dinana dekena amo ia mai bona hari, be do oi henia lou danu.”

7 Elisaia be Damaseko dekenai ia lao. Unai neganai Benehadada, Suria ena king be ia gorere. Tau haida ese idia hamaoroa, idia gwau, “Dirava ena tau be ia mai vadaeni.”

8 Benehadada ese iena opesa ta, Hasaele, ia hamaoroa, ia gwau, “Elisaia dekenai harihari gauna do oi abia lao, bona do oi noia ia ese Lohiabada do ia nanadaia, lauegu gorere do ia namo lou o lasi.”

9 Vadaeni Hasaele ese kamelo ibounai 40 ia abia, edia doruna dekenai Damaseko ena harihari gaudia namodia momokani ia atoa. Bona Elisaia dekenai inai gaudia henia totona ia lao. Elisaia ia davaria neganai, Hasaele ese ia nanadaia, ia gwau, “Oiemu hesiai tauna king Benehadada ese lau ia siaia, ia ura diba iena gorere dekena amo do ia namo lou o lasi?”

10 Elisaia ia haere, ia gwau, “Lohiabada ese lau dekenai ia hedinaraia, king Benehadada be do ia mase, to do oi lao, bona ia dekenai do oi gwau, ‘Momokani, do oi namo lou.’ ” 11 Unai neganai, Elisaia ese Hasaele ia itaia noho, itaia noho, ela bona Hasaele be ia hemarai. Bona unai neganai, Elisaia ese ia tai hamatamaia.

12 Hasaele ese Elisaia ia nanadaia, ia gwau, “Lohia e, badina dahaka oi tai noho?”

Elisaia ese ia haere, ia gwau, “Badina be lau diba oi ese Israela taudia do oi hadikaia momokani. Oi ese edia gabu aukadia, mai magu gabudia do oi gabua ore, edia uhau, taudia namodia, do oi alaia mase, edia natudia maragidia do oi botaia mase, bona edia rogorogo hahine taudia edia bogana do oi utua parara.”

13 Hasaele ia gwau, “To lau ese unai bamona siahu karadia edena bamona do lau karaia diba? Lau be sisia sibona.”

Elisaia ia haere, ia gwau, “Lohiabada ese lau dekenai ia hedinaraia, oi be Suria ena king ena dagi do oi abia.”

14 Hasaele ese Elisaia ia rakatania, Benehadada dekenai ia giroa lou. King Benehadada ese ia nanadaia, ia gwau, “Elisaia be dahaka ia gwau?”

Hasaele ia haere, ia gwau, “Elisaia ia gwau, oi be momokani do oi namo lou.”

15 To kerukeru dina Hasaele ese dabua badana ta ia abia, ranu dekenai ia hahonua, bona king Benehadada ena vairana dekenai ia doria auka, ela bona king ia mase momokani.

Bona Hasaele ese Suria ena king dagi ia abia, Benehadada ena gabu dekenai.

16 Iorama Ahaba, Israela ena king, ia lohia lagani namba 5 ena lalonai, Iehorama, Iuda ena king Iehosapata ena natuna, be ia lohia hamatamaia. 17 Ia lohia hamatamaia neganai iena mauri lagani be 32, bona ia be Ierusalema dekenai ia lohia, lagani 8 lalonai. 18 Iena adavana be Ahaba ena natuna hahine, bona ia ese Ahaba ena kara bamona, bona Israela king edia kara bamona ia karaia. Ia ese Lohiabada ena vairanai ia kara dika.

19 To Lohiabada ese Iuda ia hadikaia ore lasi, iena hesiai tauna Davida dainai. Badina be Lohiabada ese ia gwauhamata vadaeni, Davida ena tubuna be lamepa bamona do idia diari noho, edia king siahu be do ia doko lasi.

20 Iehorama be Iuda ena king neganai, Edoma taudia ese Iuda dekenai idia dagedage, bona idia ura lasi Iuda ena king be edia lohia do ia noho. Edoma taudia ese idia sibona edia king idia haginia.

21 Vadaeni king Iehorama ese mai ena kariota ibounai danu ia toreisi, Sairi kahana dekenai idia lao. Sairi dekenai Edoma tuari taudia ese Iehorama mai ena kariota taudia idia koua hagegea.

Hanuaboi neganai Iehorama, mai ena tuari orea ese Edoma tuari taudia edia tuari laini idia hamakohia, to Iehorama ena tuari taudia ese edia king idia rakatania, ta ta edia ruma, edia ruma dekenai idia giroa lou.

22 Unai dainai, Edoma taudia ese Iuda ena king dekena amo idia raka siri, bona sibona idia naria, unai nega dekena amo, ia mai bona hari. Libina hanua taudia danu ese unai nega tamona dekenai, Iuda dekena amo idia siri.

23 Iehorama ena kara orena, bona iena kara ibounai, be Iuda Ena King Edia Sivarai Buka lalonai idia torea vadaeni. 24 Iehorama be ia mase, bona Davida ena Hanua lalonai idia guria, iena tubuna bona tamana edia guria gabuna dekenai. Iehorama ena gabu dekenai iena natuna tau Ahasaia ese king dagi ia abia.

25 Iorama Ahaba, Israela king, ena lohia lagani namba 12 lalonai, Ahasaia, Iuda ena king Iehorama ena natuna ese ia lohia hamatamaia. 26 Ia lohia hamatamaia neganai, Ahasaia ena mauri lagani be 22. Ia be lagani tamona Ierusalema dekenai ia lohia. Ahasaia ena sinana be Atalaia, Omeri, Israela king ena tubuna.

27 Ahasaia ese danu Ahaba ena bese edia kara bamona ia karaia, bona Lohiabada ena vairana dekenai ia kara dika, badina ia ese Ahaba ena bese hahine ta ia adavaia vadaeni.

28 King Ahasaia ese Israela ena king, Iorama Ahaba ia durua, vadaeni idia ruaosi idia lao, Hasaele, Suria ena king idia tuari henia, Ramoto Gileada dekenai. Unuseni Suria taudia ese Iorama idia haberoa. 29 Vadaeni king Iorama be ia giroa lou, Ieserele dekenai iena bero do ia namo totona. Unai neganai Ahasaia Iehorama, Iuda ena king ese Ieserele dekenai ia lao, Iorama Ahaba do ia vadivadi henia totona, badina ia be ia gorere.

<- 2 KING TAUDIA 72 KING TAUDIA 9 ->