2 KING TAUDIA 24

1 Iehoiakimi ia king neganai, Nebukanesa, Babulonia ena king ese Iuda ia tuari henia. Unai neganai Iehoiakimi be Nebukanesa ena siahu henunai ia lao, to lagani toi murinai Iehoiakimi ese Nebukanesa ena siahu ia negea. 2 To Lohiabada ese tuari orea momo ia siaia, Babulonia, Suria, Moaba, bona Amono dekena amo, idia ese Iuda do idia hadikaia momokani totona. Unai be Lohiabada ena hereva, guna ia ese iena hesiai taudia, peroveta taudia dekena amo ia gwauraia, hegeregerena. 3 Momokani inai kara be Lohiabada ese ia oda, Iuda taudia be iena vairana dekena amo do idia kokia lao momokani totona, king Manase ena kara dika badadia ibounai dainai. 4 Badina be Manase ese Ierusalema dekenai kerere lasi taudia momo ia alaia mase, bona Lohiabada ese unai rara habubua kava ena dika ia gwauatao lasi.

5 Iehoiakimi ena kara oredia, bona iena kara ibounai, be Iuda Ena King Edia Sivarai Buka lalonai idia torea vadaeni. 6 Iehoiakimi be ia mase, bona iena natuna tau, Iehoiakini ese king dagi ia abia, Iehoiakimi ena gabu dekenai.

7 Aigupito ena king bona iena tuari taudia be Aigupito idia rakatania lou lasi tuari karaia totona, badina be Aigupito ena tano, Aigupito ena sinavai dekena amo ela bona Euperate Sinavai, unai tano ibounai be Babulonia king ese ia abia vadaeni.

8 King Iehoiakini ena mauri lagani be 18 neganai ia ese Iuda ena king dagi ia hamatamaia. Ierusalema dekenai hua toi sibona ia king. Iena sinana ena ladana be Nehusuta, Elenatana, Ierusalema tauna, ena natuna. 9 Iehoiakini be Lohiabada ena vairanai ia kara dika, iena tamana ena kara ibounai hegeregere ia karaia.

10 Unai neganai Nebukanesa, Babulonia ena king ena tuari taudia ese Ierusalema dekenai idia lao, idia koua hagegea. 11 Iena tuari taudia ese idia koua hagegea noho neganai Nebukanesa danu ese Ierusalema dekenai ia daekau. 12 Bona king Iehoiakini ese sibona Babulonia taudia edia siahu henunai ia atoa, mai iena sinana, iena natuna memero, iena hesiai taudia, bona iena ruma naria taudia.

Nebukanesa ia king lagani 8 neganai ia ese king Iehoiakini ia abia mauri. 13 Lohiabada ese ia gwauraia guna hegeregere, Nebukanesa ese Dubu Helaga dekenai golo gaudia ibounai, king Solomona ese ia karaia gaudia, ia utua maragimaragi, bona Dubu Helaga bona king ena ruma edia kohu namodia ibounai ia abia lao Babulonia dekenai. 14 Nebukanesa ese Ierusalema hanua taudia ibounai ia abia lao, ma lohia ibounai, bona tuari taudia mai goadadia, ibounai 10,000. Ma danu imana gaukara diba momo taudia, bona auri gaukaralaia taudia ibounai ia abia lao. Dagi taudia ta be Ierusalema dekenai ia noho lasi, to ogogami momokani taudia sibona.

15 Nebukanesa ese Iehoiakini ia abia lao Babulonia dekenai. King Iehoiakini ena sinana, bona iena adavana taudia, bona iena tau badadia, bona Iuda ena lohia taudia danu be Nebukanesa ese ia abia lao Babulonia dekenai. 16 Babulonia ena king ese danu Iuda tuari taudia 7000 bona imana gaukara diba taudia, bona auri gaukaralaia taudia 1000 Babulonia dekenai ia abia lao. Idia ibounai be mai edia goada bona tuari idia diba taudia. 17 Bona Babulonia ena king ese Matanaia, Iehoiakini ena vavana ia abia, king dagi ia henia. Ia be Iehoiakini ena gabu dekenai ia king. Bona Nebukanesa ese Matanaia dekenai ladana matamata ia henia, Sedekaia.

Sedekaia, Iuda ena king

18 Sedekaia ese king dagi ia hamatamaia neganai, iena mauri lagani be 21. Ia be king Ierusalema dekenai lagani 12. Sedekaia ena sinana ena ladana be Hamutala, Ieremia, Libina hanua tauna ena natuna. 19 Sedekaia ese Lohiabada ena vairana dekenai kara dika ia karaia. Iohoiakimi ena kara ibounai hegeregere ia karaia. 20 Lohiabada ena badu ia toreisi momokani Ierusalema bona Iuda taudia dekenai, ela bona nega ia ginidae, ia ese iena vairana dekena amo ia luludia lao.

<- 2 KING TAUDIA 23 2 KING TAUDIA 25 ->