1 SAMUELA 18

1 Davida ese Saulo ia haere henia neganai, Ionatana ia kamonai. Vadaeni Ionatana bona Davida be idia turana karaia momokani. Ionatana ese Davida ia lalokau henia, ia sibona ia lalokau henia hegeregere. 2 Unai dina dekenai Saulo ese Davida ia dogoatao, ia oda, iena tamana ena ruma dekenai do ia giroa lou lasi.

3 Vadaeni Ionatana be Davida danu idia gwauhamata henia, badina be Ionatana ese Davida ia lalokau henia, ia sibona ia lalokau henia hegeregere. 4 Ionatana ese iena kouti badana bona iena tuari dabua ia kokia, iena tuari kaia bona iena peva, bona iena gaba gauna danu ia kokia, Davida dekenai ia henia.

5 Davida be Saulo danu ia noho, bona Saulo ese ia siaia lao gabudia ibounai dekenai, Davida ia kwalimu. Vadaeni Saulo ese iena tuari orea ena biaguna ta ia halaoa. Taunimanima ibounai, bona Saulo ena opesa taudia danu, ese unai kara dekenai idia moale.

Saulo ese Davida dekenai ia mama

6 Davida ese Goliata ia alaia murinai, ia bona tuari taudia be hanua dekenai idia giroa mai neganai, hahine taudia Israela hanua ibounai dekena amo idia raka mai, ane idia abia, mai mavaru danu. King Saulo danu idia hedavari, mai ane danu, edia tareko idia botaia, bona edia gita idia gadaralaia. 7 Edia moale lalonai idia ese inai ane idia abia:

“Saulo ese iena 1000, 1000 ia alaia ore,

to Davida ese iena 10,000, 10,000 ia alaia vadaeni.”

8 Vadaeni Saulo ia badu maragi lasi, unai hereva dekenai ia badu, ia gwau, “Idia gwau Davida be 10,000 ia alaia, to lau be 1000 sibona lau alaia idia gwau. Ma Davida be dahaka do ia abia? Lauegu king dagi do idia henia, a?” 9 Unai dina dekena amo, Saulo ese Davida dekenai ia mama.

10 Kerukeru dabai lauma dikana ta Dirava dekena amo ese Saulo ia dogoatao haraga, vadaeni iena ruma dekenai ia kavakava bamona. Davida ese gita ia gadaralaia noho, dina ibounai ia karaia bamona. Saulo ena imana dekenai be io ta. 11 Vadaeni nega rua io ia negea Davida dekenai, ia gwau, “Lau ese Davida be haba dekenai do lau gwadaia mase.” To Davida ese nega rua io ia dekea.

12 Saulo ese Davida dekenai ia gari, badina Lohiabada be Davida danu ia noho, to Saulo be Lohiabada ese ia rakatania. 13 Unai dainai Saulo ese iena vairana dekena amo Davida ia siaia, tuari taudia 1000 edia biaguna ia halaoa. Davida ese tuari dekenai iena tuari taudia ia gunalaia. 14 Bona Davida ese iena kara ibounai lalonai ia kwalimu, badina Lohiabada be ia danu ia noho. 15 Saulo ese ia itaia, Davida ena kara ibounai be mai edia anina, vadaeni iena gari Davida dekenai be ia bada daekau. 16 To Israela bona Iuda taudia ibounai ese Davida idia ura henia, badina ia be tuari dekenai iena tuari taudia ia gunalaia namonamo, mai kwalimu danu.

Davida ese Saulo ena natuna kekeni ia adavaia

17 Vadaeni Saulo ese Davida dekenai ia hereva, ia gwau, “Lauegu kekeni vara guna Meraba be inai. Oi dekenai do lau henia, do oi adavaia. To lauegu kekeni ena davana be inai: Lauegu tuari tauna goadana do oi lao, lau dainai do oi tuari, mai laloa tamona danu, bona Lohiabada ena tuari do oi karaia momokani.”

Badina be Saulo be inai bamona ia laloa: “Lau ese Davida do lau alaia lasi, to lau ura Pilistia taudia ese tuari dekena amo Davida do idia alaia mase.”

18 Davida ese ia haere, ia gwau, “Lau be daika, bona lauegu varavara taudia be daika, bona unai dainai lau be king ena ravana do lau lao?” 19 To nega ia ginidae, Saulo ena natuna hahine Meraba be Davida dekenai do idia henia neganai, idia ese tau ta ladana Adariele, Meholo tauna, dekenai idia henia, ia ese ia adavaia.

20 Saulo ena natuna kekeni ta, iena ladana be Mikala ese Davida ia ura henia. Haida ese Saulo idia hamaoroa, vadaeni Saulo be inai dala ia ura. 21 Saulo ese inai bamona ia laloa, ia gwau, “Lauegu kekeni be Davida dekenai do lau henia, ia ese Davida do ia hamanokaia, vadaeni Pilistia taudia ese Davida do idia alaia diba.” Vadaeni Saulo ese nega iharuana Davida ia hamaoroa lou, ia gwau, “Hari dina lau ese lauegu ravana oi do lau halaoa.”

22 Saulo ese danu iena hesiai taudia ia hamaoroa, ia gwau, “Davida dekenai hunia dekenai inai bamona do umui hereva, umui gwau, ‘Oi kamonai, king ese oi ia ura henia, bona iena hesiai taudia ibounai ese oi idia lalokau henia. Unai dainai harihari king ena ravana do oi lao.’ ”

23 Vadaeni Saulo ena hesiai taudia ese Davida dekenai unai bamona idia hamaoroa. Davida ia gwau, “Umui be umui laloa king ena ravana do lau lao, be gau maragina sibona, a? Lau be ogogami tauna, bona lau be dagi lasi tauna.”

24 Saulo ena hesiai taudia ese Davida ena hereva idia hamaoroa. 25 Vadaeni Saulo ia gwau, “Davida be inai bamona do umui hamaoroa, umui gwau, ‘King Saulo be iena kekeni ena davana ia ura lasi. To inai sibona ia ura: Ia ura Pilistia taudia ibounai 100 edia usi kopina, idia ivaia gaudia do oi mailaia. Inai kopidia king dekenai do oi henia, Pilistia taudia edia kerere davana karaia totona.’ ” Saulo be ia laloa Davida be unai kopidia ia abia gwauraia neganai, Pilistia taudia ese Davida do idia alaia mase.

26 Inai hesiai taudia ese inai hereva be Davida idia hamaoroa neganai, Davida be ia moale, bona ia ura king ena kekeni do ia adavaia. Vadaeni king ia gwauraia nega be idia ore lasi neganai, 27 Davida ia toreisi, iena tuari taudia danu, idia lao, Pilistia taudia 200 idia alaia, bona edia kopina idia utua. Inai kopina gaudia ibounai idia abia lao, king dekenai idia henia, Davida be king ena ravana do ia lao totona. Vadaeni Saulo ese iena natuna kekeni Mikala ia abia, Davida dekenai ia henia, idia headava.

28 Saulo ese ia itaia bona ia diba, Lohiabada be momokani Davida dekenai ia noho, bona Israela taudia ibounai ese Davida idia ura henia. 29 Vadaeni Saulo ese Davida dekenai ia gari henia bada. Unai dainai, Saulo ese Davida dekenai ia dagedage henia gwauraia, nega ibounai.

30 Vadaeni Pilistia lohia taudia be tuari totona idia raka mai lou, nega momo, to nega ibounai Davida ese ia tuari henidia, bona ia kwalimu. Saulo ena hesiai taudia ibounai edia huanai, Davida be ia namo herea. Unai dainai Davida ena ladana be ibounai ese idia hanamoa.

<- 1 SAMUELA 17 1 SAMUELA 19 ->