1 Solomona ese idau bese hahine momo herea ia ura henia. Ia ese Aigupito ena king ena natuna hahine sibona ia adavaia lasi, to Moaba, bona Amono bona Edoma bona Sidono bona Hiti hahine danu. 2 Unai bese edia hahine be Lohiabada ese Israela taudia dekena amo ia taravatua, ia gwau, “Unai bese taudia do umui adavaia lasi, bona idia ese umui do idia adavaia lasi, badina idia ese momokani emui lalona do idia veria, edia dirava do umui tomadiho henia.” To Solomona ese unai hahine momo ia ura henia dikadika.

3 Solomona ena adavana korikori, lohia hahine, be ibounai 700, ma hesiai hahine haida danu ibounai 300 ia adavaia. Inai hahine ese Solomona ena lalona idia hakererea, vadaeni ia ese Dirava ia rakatania. 4 Badina be Solomona ia buruka vadaeni neganai, iena adavana ese iena lalona idia veria, dirava idaudia dekenai, bona ia ese Lohiabada, iena Dirava, ia badinaia momokani lasi, iena tamana Davida ese ia badinaia bamona. 5 Badina be Solomona ese Asataroto, Sidono taudia edia dirava hahine, bona Milekoma, Amono taudia edia dirava dikana ia tomadiho henia.

6 Unai dainai, Solomona be Lohiabada ena vairanai ia kara dika, bona ia ese Lohiabada ia badinaia momokani lasi, iena tamana Davida ese ia badinaia bamona.

7 Vadaeni Solomona ese Kemoso, Moaba taudia edia dirava dikana, bona Moleka, Amono taudia edia dirava dikana danu edia tomadiho henia gabudia ia haginia, ororo ta ena latanai, Ierusalema ena dina daekau kahana dekenai. 8 Solomona ese danu iena adavana, bese idau hahine totona tomadiho gabudia ia haginia, idia ese unuseni edia dirava edia vairanai muramura mai bonana idia gabua, bona boubou danu idia henia.

9-10 Lohiabada, Israela ena Dirava ese nega rua Solomona dekenai ia hedinaraia, bona ia ese Solomona ia oda henia idau bese edia dirava do ia tomadiho henia lasi. To Solomona ese Lohiabada ena oda ia kamonai henia lasi. Unai dainai Lohiabada ese Solomona ia badu henia. 11 Lohiabada ese Solomona ia hamaoroa, ia gwau, “Oi ese oiemu gwauhamata lau danu oi negea momokani, bona egu taravatu oi kamonai henia lasi dainai, lau hereva momokani, oiemu basileia be oi dekena amo do lau kokia, oiemu opesa ta dekenai do lau henia.

12 “To, oiemu tamana Davida dainai, oiemu mauri dinadia lalonai basileia do lau kokia lasi, to oiemu natuna dekena amo, basileia do lau kokia. 13 Basileia ena kahana ibounai do lau kokia lasi, to iduhu ta be oiemu natuna dekenai do lau henia, egu hesiai tauna Davida dainai, bona Ierusalema, lau abia hidi hanua dainai.”

14 Vadaeni Lohiabada ese Solomona do ia hadikaia gwauraia tauna ta ia hatoreisia. Ia be Hadada, Edoma tauna, Edoma ena king ena bese tauna ta. 15 Guna, king Davida be Edoma dekenai ia tuari henia. Ioaba, Davida ena tuari biaguna badana, be Edoma dekenai ia lao, tuari dekenai idia mase taudia do ia guria totona. 16 Vadaeni Ioaba mai ena tuari taudia, be hua 6 lalonai Edoma dekenai idia noho, bona unai neganai, idia ese Edoma ena memero, uhau bona tau ibounai idia alaia ore. 17 To unai neganai, Hadada be mero sibona, vadaeni ia bona iena tamana ena Edoma hesiai taudia danu, be Aigupito dekenai idia heau. 18 Idia be Midiana dekena amo idia toreisi, Parana dekenai idia ginidae. Vadaeni idia ese Parana taudia haida danu idia haboua, bona Aigupito dekenai idia lao. Aigupito ena king dekenai idia ginidae neganai, ia ese Hadada dekenai ruma ta, bona tano, bona aniani ia henia.

19 Aigupito king ese Hadada ia ura henia, unai dainai ia ese iena adavana, kwini Tapene, ena tadina be Hadada dekenai ia henia. 20 Vadaeni Hadada ena adavana ese natuna merona ta ia havaraia. Mero ena ladana be Genubata. Vadaeni Tapene ese unai mero be Aigupito king ena ruma dekenai rata ia henia, bona ia naria. Inai mero, Genubata, be Aigupito king ena natuna memero danu ia noho hebou.

21 To Hadada be Aigupito dekenai sivarai ia kamonai, Davida be ia mase, bona Ioaba, tuari taudia edia biaguna danu ia mase vadaeni. Unai neganai, Hadada ese Aigupito King ia noia, ia gwau, “Mani emu kara, oi ese lau do oi ruhaia, egu tano korikori dekenai do lau lou lao.” 22 To king ia gwau, “Badina dahaka do oi lao? Lau ese gau ta oi dekenai lau henia lasi? Unai dainai oi ura oiemu gabu dekenai do oi giroa lao, a?”

Hadada ese king dekenai ia haere, ia gwau, “Lasi, to mani emu kara, do lau lao.” Vadaeni Hadada be iena tano korikori dekenai ia giroa lou.

Hadada be Edoma ena king dagi ia abia, bona ia ese Israela ia dagedage henia momokani.

23 Dirava ese danu Solomona hadikaia gwauraia tauna ta ma ia hatoreisia. Iena ladana be Resona Eliada. Ia ese guna iena biaguna Hadadesa, Soba ena king, dekena amo ia heau vadaeni. 24 Resona ese tau haida ia haboua, bona idia be dadidadi orea ta idia lao, Resona ese idia ia gunalaia. Davida ese Hadadesa bona iena Soba tuari taudia ia alaia ore murinai, Resona, mai ena orea taudia be Damaseko dekenai idia lao. Unuseni Resona be Suria ena king.

25 Solomona be Israela ena king neganai, Resona ese Israela ia dagedage henia momokani, Hadada ese ia dagedage henia hegeregerena.

26 Ieroboama Nebata, Eparaima tauna ta, Sereda dekena amo, Solomona ena hesiai tauna ta, iena sinana be vabu ta ladana Serua, ia ese danu king Solomona dekena amo ia raka siri.

27 Ieroboama ese Solomona ia dagedage henia ena badina be inai: Solomona ese Milo ena kohoro ia haginia, bona iena tamana Davida ena hanua maguna ena matuna ia hanamoa noho. 28 Inai eregabe tauna Ieroboama be mai ena aonega, bona Solomona ese ia itaia ia be gaukara bada tauna dainai, ia ese Iosepa ena iduhu gaukara taudia edia biaguna ia halaoa.

29 Dina ta, Ieroboama be Ierusalema dekena amo ia raka lao, vadaeni peroveta tauna ta, iena ladana be Ahaisa, Silono tauna, ese dala dekenai ia davaria. Inai Ahaisa be dabua matamata ta ia karaia noho, bona idia ruaosi sibona be unai taunimanima lasi tano ena dala dekenai idia noho. 30 Vadaeni Ahaisa ese iena dabua matamata ia kokia, ia darea, kahana 12. 31 Bona Ahaisa ese Ieroboama ia hamaoroa, ia gwau, “Kahana 10 do oi abia, oiemu, badina be Lohiabada, Israela ena Dirava ese oi dekenai ia hereva noho, ia gwau, ‘Lau ese basileia Solomona dekena amo do lau kokia, bona iduhu 10 oi dekenai do lau henia. 32 To lauegu hesiai tauna Davida dainai, bona Israela ena huanai lau abia hidi hanua Ierusalema dainai, Solomona ese iduhu ta do ia abia. 33 Inai bamona do lau karaia, badina be Solomona ese lau ia negea vadaeni, bona Asataroto, Sidono taudia edia dirava hahine, bona Kemoso, Moaba taudia edia dirava, bona Milekoma, Amono taudia edia dirava, ia tomadiho henia vadaeni. Solomona ese lau dekenai ia kamonai henia lasi, ia be kerere, lauegu Taravatu bona oda ia badinaia lasi, iena tamana Davida ese ia karaia bamona lasi.

34 “ ‘To lau ese basileia ibounai ia dekena amo do lau kokia lasi. Lauegu hesiai tauna Davida dainai, Solomona ese iena mauri dinadia ibounai lalonai king dagi do ia dogoatao noho. Badina lau ese Davida lau abia hidi, bona ia ese lauegu Taravatu bona oda ia kamonai henia. 35 To Solomona ena natuna dekena amo basileia do lau kokia, bona oi dekenai do lau henia, iduhu ibounai 10. 36 To Solomona ena natuna do lau koua momokani lasi. Lau ese ia dekenai iduhu ta do lau henia, do ia dogoatao. Unai dala dekenai, lauegu hesiai tauna Davida ena tubuna ta be nega ibounai Ierusalema dekenai king dagi do ia dogoatao. Badina be Ierusalema hanua be lau abia hidi vadaeni, ia be lau dekenai do idia tomadiho gabuna, bona lauegu ladana do ia noho gabuna. 37 Ieroboama e, lau ese Israela ena king oi do lau halaoa, bona oi ese oi ura henia tano ibounai do oi biagua diba. 38 Bema oi ese lau do oi kamonai henia momokani, lauegu Taravatu, bona lauegu oda do oi karaia, egu hesiai tauna Davida hegeregerena neganai, lau ese oi dekenai do lau noho nega ibounai. Lau ese king dagi oi dekenai do lau henia, bona oiemu natuna bona tubuna taudia do lau haginia, idia ese danu king dagi do idia dogoatao noho, Davida dekenai lau karaia hegeregerena. 39 Solomona ena kara dika dainai lau ese Davida ena tubuna taudia do lau panisia, to nega hanaihanai lasi.’ ”

40 Unai dainai Solomona ese Ieroboama ia tahua, do ia alaia totona. To Ieroboama be Aigupito dekenai ia lao, Sisaka, Aigupito ena king dekenai. Ieroboama be Aigupito dekenai ia noho ela bona Solomona ia mase vadaeni.

41 Solomona ena kara momo be inai buka dekenai idia torea lasi, to iena kara ibounai be Solomona ena Sivarai Bukana lalonai idia torea vadaeni. 42 Solomona be Israela ibounai ia gunalaia lagani 40, Ierusalema dekenai. 43 Vadaeni Solomona ia mase, bona Davida ena Hanua dekenai idia guria, bona iena natuna Rehoboama ese iena gabuna dekenai ia king.

<- 1 KING TAUDIA 101 KING TAUDIA 12 ->