1 Hlangdueng tah amih aka hnaemtaek rhoek tih, a thakthaenah nueihbu la aka khueh rhoek mikhmuh ah khaw thincaknah a lenkoek neh pai ni.
2 Amih te a hmuh vaengah rhihnah neh thuen uh vetih, Hlangdueng ham khangnah pakcak a om te a ngaihmang uh ni.
3 Pakhat loh a hui taengah yutnah neh a thui vetih, a mueihla a paepnah neh kopang uh ni.
4 Te vaengah, “Amih te n'nueih thil uh tih, ol nen khaw n'soehsal uh uh coeng, Te khaw mamih ni n'ang uh coeng. Amih kha khosaknah he hlangang ni, A hmailong khaw hinyanah om mahpawh,” n'ti uh.
5 Balae tih amih tah Pathen ca lakli ah a thum sak, Balae tih amih kah hmulung tah hlangcim lakli ah a om.
6 Te dongah mamih long he oltak longpuei m'hmaang uh coeng, hlangdueng kah vangnah tah mamih ha sae pawt tih, Mamih ham khomik a thoeng moenih
7 Halangnah neh pocinah longpuei ah a bae la n'pongpa uh tih, khosoek namtlak ah n'cet uh. Tedae Boeipa kah longpuei tah m'ming uh moenih.
8 Mamih kah koevoeihnah he balae a hoeikhang tih, Mamih kah hoemdamnah loh khuehtawn hangkhuen a?
9 Te boeih te khokhawn bangla khum tih, a tuenpa ol bang lamni a hmata mai.
10 Tui phu sokah sangpho bangla cet tih tih, a khum a pael khaw tueng voel pawh, Tuphu lakli ah a hawn khaw tueng voel pawh.
11 Khohli dongah vaa aka ding khaw, a hmuethma a ming pha moenih. A phae te yanghoep cala a yah tih khohli khaw a muk dae, A hnuksul khaw a ming pha moenih.
12 Palaa long khaw khohli phak a aal dae, tlek ben uh tih a caeh long te a ming pha moenih.
13 Mamih khaw n'thang coeng dae pahoi m'hma, Te dongah n'khuelnah miknoek he om pawh.
14 Lailak rhoek kah ngaiuepnah tah cangkik bangla khohli loh a khuen tih, cingmai bangla khohli loh bang a cing sak. Yilh loh hmaikhung bangla bang a khuen tih, Hnin at kah lampah yinlai m'poek bangla, Cet tih khum pael mai coeng.
16 Te dongah Boeipa kut dong lamkah thangpomnah rhuisam neh, lukhueng then te a dang uh ni.
17 Boeipa loh thahluenah te a caempho la a bai sak tih, A saihluen boeih te rhal a tloek vaengah tubael la a khueh pah.
18 Duengnah te rhangpho la a buen vetih, Tiktamnah te thilumuek la a muek ni.
19 Cimcainnah te patling aka ning la a bai ni.
20 A kosi aka tlo te cunghang aka hat bangla a pom vetih, a rhal tloek ham te a saihluen rhoek bom uh thae ni.
21 Boeipa kah rhaek loh phek a nuen tih a dueng la thui, Te dongah khomong phuk a va hil aka muk thal bangla miknoek te a kah.
22 Boeipa kah payai loh rhaelnu khaw a dong tih, Tuitunli loh kosi neh a et phoeiah, Tuiva loh phaeng a hawt ni.
23 Hlipuei loh amih te phaeng a yawn vetih, Cangkik bangla cangpalam loh boeih a haeh ni.
<- Solomon Cueihnah 4Solomon Cueihnah 6 ->