1 Hlang dueng kah hinglu tah Pathen kut ah om tih, nganboh loh amih te ben mahpawh.

2 Aka ang rhoek kah mikhuh ah tah amih te aka duek kamboei la om tih, a vuenvanah khaw pocinah aka om ham bangla a poek

3 Mamih lamloh a nong uh a pocinah la om dae, ngaimong la om uh bal pueng.

4 Hlang mikhmuh ah khoboe yook bangla om dae, amih kah ngaiuepnah tah aka nguel hno neh cungkuem.

5 Toelnah he yool pueng tih a then he kum ngai. Pathen loh amih a noemcai tih amah neh tingtawk tila a hmuh.

6 Hmaihueng khuikah sui bangla amih te a noemcai tih, amih te hmueihhlutnah bangla a doe.

7 Amih a hipnah tue vaengah tah vang sui dae, Divawt hmaidi bang lamni a tloo eh.

8 Namtom te a uk uh vetih pilnam khaw a taem uh ni Boeipa loh amih te kumhal duela a manghai thil ni.

9 Amah dongah aka pangtung rhoek loh oltak a yakming vetih, uepom hlang te a lungnah dongah kho a sak ni. A hlang cim soah tah sitlohnah neh lungvatnah om tih, a hlang tuek te tah a dawn hueltue.

10 Lailak rhoek loh ammih kah kopoek thae bangla a yook, Amih loh duengnah a hnoelrhoeng tih, Boeipa te a tloelh pai ta.

11 Cueinah neh thuituennah aka hnawt tah khomap, A ngaiuepnah te a hong la poeh tih, a thakthaenah khaw a phu om pawh.

12 A yuu rhoek khaw ang uh tih, a ca rhoek khaw muen uh.

13 Amih koca ngawn tah kumhal duela thae a phoei thil coeng.

14 Hlueikhu khaw a kut a halangnah khueh pawt tih, Boeipa taengah halangnah a khueh pawt atah, a yoethen.

15 A then bibi he tah a thaih rhah tih, Yakmingnah kah a yung he khaw bawt tlaih pawh.

16 Tedae samphaih ca rhoek tah lungcuei la om pawt vetih, lailuk calai lamkah aka lo khaw paltham ni.

17 A hinglung vang mai cakhaw hinyahnah dang pawt vetih, A patong vaengah hlang loh a hnael ni.

18 A camoe ah duek cakhaw ngaiuepnah tal vetih, laitloeknah hnin ah khaw mongnah om mahpawh.

19 He tah aka dueng pawt rhoek ham, aka tlo koek a hmailong a bawtnah pawn ni.

<- Solomon Cueihnah 2Solomon Cueihnah 4 ->