1 Tuiphu aka tho longpuei caeh ham la aka cai loh, Amah aka phuei sangpho kaek lakah ah thing ngawn te a khue.

2 Sangpho aka mangtaeng long khaw a hoeikhangnah, om hamla a sai dongah ni a saii. Te te kutthai kah a cueihnah nen ni a sak.

3 Aw a pa, te te na khan tih, a caelong khaw na hoi pah. Tuituenli ah khaw caehlong na khueh pah tih, tuiphu soah khaw suengnah long na khueh.

4 Mueirhih cungkuem khui lamloh na khang thai te khaw tueng lah, Te daengah ni thoemnah aka vawt khaw tuituenli a kat thai eh.

5 Na cueihnah neh na bisai khuekct mueh la om ham na ngaih moenih, Te dongah pilnam loh a hinngah te thing ngawn ca dongah pangtung, tuli-lungpok te paan neh khat uh tih sading la lan a pha uh.

6 A tongcuek kah pumlen kaipoeh a poci vaengah pataeng, diklai kah ngaihnah la paan dongah ying ham na loh, Diklai ah tiingan neh a muu paih ham khaw na kut loh a hoihaeng.

7 Tedae duengnah aka pai sak thing tah a yoethen pa.

8 Tedae kut neh a saii mueirhol khaw, tetla aka saii khaw thae phoei thil saeh. Te te a saii phoei balah aka po thai hno te pathen a ti dongah.

9 Lailak neh hingcim mueh tah Pathen loh vanat la a thiinah.

10 A sai hno neh aka saiikung khaw vanat la dantatnah a yook ni,

11 Tete Pathen loh suen sitoe cakhaw, Sarhing koila poeh uh tih hlang hinglu ham hlaeh la, Hlang ang kah kho ham thangkui la a om dongah.

12 Mueirhol aka sai kah poeknah he cukhalh a tongnah la om Te te phuengnah khaw khosak a rhawpnah la om.

13 A cuekca ah te te om pawt tih, a hukhueng duela om yoeyah mahpawh.

14 Hlag rhangneh diklai ah a honghi he ha om tih, a bawt hnap ham khaw a taeng coeng.

15 Napa pakhat e a tuetang mueh kah kothae ngaithae loh a caeng vaengah, buengrhuet aka khum a ca kah a muei te a thuk, Hlang duek tangtae te pathen bangla a bawk uh, Tuisi tuem neh thothuengnah olhuep te a hmuikah taengah a pak uh.

16 Lailak kah khosing te a tue loh a rhoeng sak tih olkhueng bangla a ngai uh, Manghai kah olpaek dongah muei a thuk te khaw a bawk uh.

17 Pilnam he hla la kho a sak tih a manghai a hmai ah a bawk thai pawt vaengah, Khohla lamloh a mael hmai te a poek uh. Te dongah a hinyahnah manghai kah a muei te hmuh ham a saii uh. Te vaengah aka om pawt te aka om bangla a poek uh tih a thincavat uh.

18 Te vaengah kutthai kah a poeknah khaw a cahoeh coeng tih, a ming mueh manghai te bawk hamla a mangtaeng uh.

19 Amah long tah a boei kah kolonah khaw ngaih maco, a suisak a then tloe neh, a mueiloh la tha buelh a huel sak,

20 A bisai loh hlangping te a yoek tih a hmil, Hlang bangla rhaih a hinyah uh hno te, Bawknah hnopai lat a khueh uh.

21 He tla ni hlang hamla hlaeh a tung uh he, Manghai kah anaa loh pilnam kah a hmailong te a pin pah tih, Bulbo ham tueng pawh lungto thingngo hnopai ming a paek dongah ni.

22 Pathen mingnah kawng dongah a lol uh te a rhoeh bueng mueh la, Hnalvalnah dongah muep a thingthuel la kho a sak te, A thae ngaimongnah la a khue uh.

23 A khotue rhamtang ah camoe a ngawn uh tih, sungrhai a nawn uh, kholong kah khoboe neh cungpoeh uh tih a rhuihmil uh vaengah,

24 A khosaknah khaw, a im yuloh vasaknah khaw tuem uh voel pawh, khat neh hnukpoh la ngawn uh thae tih, khat neh khat soah samphaih uh.

25 Boeih khopo uh tih thii neh, hlang ngawnnah, huencannah, laithae, vuelvaeknah, hnukpohnah, soekloeknah, thailainah la om.

26 A then te a hmaang uh tih, kolonah khaw a hmaai uh. a hinglu a poeihnah neh, cukhalh lailuk dongah, yuloh vasak khaw kungrhap la, samphaih neh yalpo uh.

27 Mueirhol bawknah he a ming thui ham om pawh, Te tah boethae a tongnah, aka tong kung neh aka bawt sak kung ni.

28 Aka bawkung rhoek khaw thangpomnah neh caitawk uh, laithae la tonghma uh, a khosak khaw paihae, laithae thui ham oepsoeh uh.

29 Amih te aka mueirhol dongah pangtung uh tih, halang kah olhlo neh a toemngam uh dongah pantang te rhih kolla a lamtawn uh.

30 Tedae amih te dantatnah rhaep nit la a yook uh ni, Pathen kawng te a hloeh pa a poek uh mueirhol dongah a tlungmu uh. Hingcimnah te a sawtsit uh a holh la a toemngam uh.

31 Pilnam loh a toemngam thil hno te thaomnah a khueh moenih, Tedae aka tholh hlang tah dantatnah a om coeng, bothae kah boekoeknah loh a hloem yoeyah coeng.

<- Solomon Cueihnah 13Solomon Cueihnah 15 ->