1 Ecbatana la a kun rhoi vaengah, Tobias loh anih te, “Manuca Azariah, mah manuca Raguel taengla thaeng n'caeh puei,” a ti nah. Te dongah anih te Raguel im la a khuen. Te vaengah amih rhoi vongtung thohka ah ana ngol te a hmuh rhoi. Amih rhoi loh anih te lamhma la a voek rhoi hatah anih loh, “Omngaih la kan doe, manuca rhoi, kan uem, sading rhoi nama,” a ti nah. Te phoeiah amih rhoi te amah im la a khuen.

2 A Edna te khaw, “Cadong pa long he ka hui Tobit phek a loh he,” a ti nah.

3 Te vaengah Edna loh amih rhoi te a dawt tih, “Ka nganpa rhoi melamkah rhoi lae?” a ti nah.

Amih rhoi loh, “Kaimih rhoi Ninevah ah vangsawn la aka om, Naphtali kah tiingan la ka om rhoi,” a ti nah.

4 Amah loh amih rhoi te, “Ka hui Tobit te na ming rhoi a?” a ti nah.

Amih rhoi long khaw, “Ue ta ka ming rhoi ta,” a ti nah.

Te phoeiah amih rhoi te, “Anih te a dading a?” a ti nah.

5 Amih rhoi loh, “Ue ta, sading la kho a sak ngawn ta,” a ti nah. Te phoeiah Tobias loh, “Anih te kai napa ni,” a ti nah.

6 Te vaengah Raguel te dawm soi tih anih te a rhah neh a mok. 7 Anih te amah hui bangla, “Ka ca na yoethen coeng ne, hlang then neh hlang rhoei capa ni. “Te bang rhimom tlohthae a om pah mai tih hlang rhoei mai mikdael la poeh mai,” a ti. Te phoeih amah huiko Tobia te a kop tih rhap. 8 A yuu Edna khaw anih ham te rhap. Te phoeiah tah a canu Sarah khaw tangrhoei rhap. 9 Te phoeiah tah Raguel loh boiva khui lamkah tutal pakhat a ngawn tih amih rhoi te bahoeng baetue la a doe.

Amih rhoi te tui a hluk te a pumrho a silh phoeiah tah buh te a vael uh. Te vaenagh Tobias loh Raphael te, “Manuca Azariah, Raguel te dawt lamtah Sarah te ka yunah mai eh,” a ti nah.

10 Tedae Raguel loh hat a doo tih camoe te, “Ca lamtah o rhoi, hlaem ah khaw omngaih la om rhoi. Ka manuca nang phoeiah tah ka canu Sarah aka yunah ham koi a om moenih. Te dongah anih he nang lakah hlang tloe taengah paek ham khaw ka moeihoeinah a om moenih. Nang tah kamah huiko la rhep na om. Tedae ka ca nang, ka khosaknah te a caih la boeih han thui lah. 11 Anih he kamah huiko hlang parhih taengah ka pae coeng. Tedae a taengla a caeh kah khoyin ah boeih duek uh. Te cakhaw ka ca aw, ca lamtah o mai ngawn. BOEIPA loh nangmih rhoi yueng la a saii bitni,” a ti nah.

Te vaengah Tobias loh, “Kai kah olka aka om te nan hmoel hlan atah ka ca pawt vetih ka o bal mahpawh,” a ti nah.

Te dongah Raguel loh, “Kan saii ngawn ca. Anih he Moses cabu dongkah oltloek bang nang taengah kam paek coeng. Vaan lamkah oltloek te a om coeng dongah anih he nang taengah kam paek coeng. Namah yuu la lo laeh. Tahae lamkah tah a nganpa la na om coeng tih anih khaw na ngannu la om coeng. Anih te tihnin lamloh kumhal duela nang taengah kam paek coeng. Vaan kah BOEIPA loh ka ca nang n'hoihaeh saeh. Tihnin hlaem ah khaw nangmih rhoi te n'thaihtak sak saeh lamtah rhennah neh ngaimongnah nangmih rhoi m'pae saeh,” a ti nah.

12 Te phoeiah Raguel loh a canu Sarah te a khue. Anih te a taengla a pha vaengah tah a kut ah a tuuk tih Tobias taengla a paek. Te vaengah, “Moses cabu dongkah a daek olkhueng neh oltloeknah bangla anih he namah yuu la lo laeh. Anih te lo lamtah na pa taengah sading la pha puei. Vaan kah Pathen loh amah kah ngaimongnah rhangneh nan longpuei han khui sak saeh,” a ti nah.

13 Te phoeiah a manu te a khueh tih, “Cadaeknah hnopai te hang khuen,” a ti nah. Te phoeiah tah yulohnah cabu te daek. Te phoeia tah Moses olkhueng dongkah oltloek bangla a yuunah hamla a paek. 14 Te daengah te a caak tih a ok pueng

15 Raguel loh a yuu Edna te a khue tih a taengah, “Ngannu, imkhan a tloe te hoeng pah lamtah anih he pahoi khuen,” a ti nah. 16 Te dongah anih te cet tih a thui pah bangla imkhan pakhat ah thingkong a phaih pah. Te phoeiah Sarah te a khuen.

17 A canu ham te rhap dae a mikphi te bat a huih tih, “Ka canu namning sak, vaan kah Boeipa loh kothae yuengla omngaihnah m'paek coeng. Ka canu, namning sak,” a ti nah. Te phoeiah anih khaw cet.

<- TOBIT 6TOBIT 8 ->