1 Tobias a voel a bal a ngaih hnin yet te Tobit loh a hnin, hnin ah khohin a sen puet a tae coeng. A capa a caeh khohnin lamlong te a phoe pah voel pawh. 2 Amah long tah, “Anih a sa dueng dae nim? Gabael nim a duek vettih tangka a paek mueh la a om vet,” a ti. 3 Amah tah pahoi lakueng coeng.

4 A yuu Anna long khaw, “Ka capa he polpai coeng tih mulhing lakli ah om voel pawh,” a ti. Te dongah rhap tih a capa ham rhaengsae neh, 5 “Anunae kai aih he, ka capa la ka ming ham vangnah la aka om dae. Nang te yin la ka caeh sak vik mai,” a ti.

6 Tedae Tobit hil a phah tih anih, “Duem om lamtah mawnnah khaw toeng laeh. Ka cangyaeh aw anih te boeih then ta. Teah khat khat om buengrhuet mai khaming. Anih aka caeh puei te uepom hlang ni, mah huiko ni. he ha pai tom coeng,” a ti nah.

7 Tedae amah te, “Namah te duem om, kai nan phok khaw paa laeh, ka capa te polpai coeng,” a ti nah. Hnin ta kuem longpuei yong tih a capa te a toem dae pakhat long khaw oei pah pawh. Khomik yip a tlak nen tah khoyin puet te rhap tih ip voel pawh.

Yuluei poei a sai te hnin hlaili a bawtnah khaw a pha coeng. Raguel ongah a canu ham ol a kam te a ngaithuen. Te dongah Tobias te a tang la cet tih, “Kai n'tuei laeh, a nu neh a pa te ka ming coeng. Amih rhoi loh kai m'hmuh ham te a tangnah rhoi moenih. Te dongah a pa nang taengah kam bih. A pa taengla ka mael pawn ni. Metla kan caeh tak khaw namah taengah ka thui coeng,” a ti nah.

8 Tedae Raguel loh Tobias te, “Ka ca om dae, kai taengah om dae. Na pa Tobit taengah puencawn ka tueih bitni. Amih loh nang kawng te a thui pa bitni,” a ti nah.

9 Tedae, “Pawh, a pa taengla nan tueih ham te kam bih,” a ti nah.

10 Te dongah Raguel loh Tobias te a yuu la Sarah a paek. Te phoeih a koe rhakthuem te khaw a paek. Salnu neh salpa rhoek khaw, vaito neh tu khaw, muli-marhang neh kalauk khaw, hnicu neh tangka khaw, imkhuikho kah hnopai a paek. 11 Te vaengah amih te ngaikhuek la a sawt. Tobias te a kop tih, “Ka ca, kan phih tanglang coeng, longpueng ah sading la ne. Vaan kah Boeipa loh nang neh na yuu Sarah te n'thaihtak sak saeh. Ka duek hlanah na ca rhoek khaw ka hmu eh,” a ti nah.

12 Te phoeiah a canu Sarah te khaw a mok tih, “Ka canu, na mani neh na marhang te hinyahnah ne. Tahae lamlong tah amih rhoi te nang aka cun na nu na pa la om coeng. Ka canu sading la cet ne. ka hing khuiah tah nang kah na thang a then mah ka ya eh,” a ti nah. Te phoeiah amih rhoi te phihnah a saii pah tih a tueih.

Te vaengah Edna loh Tobias te, “Ka capa neh ka nganpa aw, vaan kah Boeipa loh sadingla m'mael puei saeh. I duek hlanah tah nang neh ka canu Sarah kah a ca rhoek ka hmuh ham hil khaw ka hinglung sen bitni. Boeipa mikhmuh ah khaw ka canu he nang kut dongah kan tloeng coeng. Na hing khuiah tah anih ham kothaenah koi saii boeh. Mamih n'hing uh khuiah tah n'hoeikhang uh bitni,” a ti nah. Te phoei amih rhoi te a mok tih a kodam la a sawt. 13 Tobias khaw Raguel taeng lamloh omngaih kohoe la mael. Te vaengah vaan neh diklai kah BOEIPA, a cungkuem boeih kah Manghai te a thangpom. Amah long ni a longpuei khaw a khui sak pai. A hnukkhueng ah Raguel neh a yuu Edna te a uem tih, “Ka hingnah tue khuiah tah nangmih rhoi hinyah ham te, BOEIPA rhangneh ka toemngam coeng,” a ti nah.

<- TOBIT 9TOBIT 11 ->