2 A kut a thueng vaengah khuet tangkik tih, a cunghang loh khopuei rhoek khaw a saih.
3 Anih hlang unim a cak la aka pai? anih tah Boeipa ham ni caem a tloek.
4 Anih rhangneh khomik khaw duem tih, hnin at mai te hnin nit bangla puh.
5 Thunkha la hnukhmai la a nen vaengah, anih long Samrhang Khohni ni a khue. Te dongah Boeipa boeilen loh anih te, tlungthang thaomnah rhaelnu neh a voek.
6 Caemtloek vaengah namtom khaw thup tih, tuibah ah a thinnaek rhoek khaw a thup. Te dongah namtom loh anih kah caemtloeknah khaw a ming. Anih tah Boeipa mikhmuh a vathoh tih, Tlungthang hnukah bang hamla tlungmu.
7 Joshua tue vaengah anih khaw, Jephunneh capa Kaleb khaw Moses loh hlangtang la a khueh coeng. Anih loh hlangping khaw a oelh tih Pilnam te tholhnah lamloh a hlawt. Te vaengah amih kah halangnah te dup a hnah.
8 Camoe thawng ya rhuk khuiah tah sueng rhoi, Te dongah pilamnah rhopangnah khuila a khuen. Te khohmuen ah suktui neh khoitui khaw long.
9 Boeipa loh Kaleb te thadueng a paek, Te te a patong hil amah taengah om, Te dongah tlang ram la cet tih, a cadil ham rho la a khueh pah.
10 Te dongah Israel pum loh hmu van saeh, Boeipa hnuk aka bang kah a then tangkik te.
11 Laitloekkung rhoek khaw a ming hinyahnah kap amih kah thinko tah mueirhol taengah a hoi moenih, Boeipa taeng lamloh taengphael uh pawt, amih poekkoepnah tae a yoethen pai.
12 A rhuh pataeng a yalhnah kung lamloh, a thai la a hingnah koep a om khaw, hinyah aka kap rhoek a ming te khaw, a ca rhoek taeng duela koep om saeh.
13 Samuel tah Boeipa loh a thintlonah Boeipa tonghma la om tih ram a pai sak, Pilnam ukkung rhoek te khaw a koelh.
14 Boeipa kah olkhueng bangla rhaengpuei lai a tloek, Boeipa loh Jakob te a dawndah.
15 A uepomnah soah anih te tonghma la a pom, a olthui dongah anih te uepom khohmu la a ming.
16 Anih te voeivang kah rhal loh a nen vaengah, Samrhang Boeipa te a khue tih, Tu sukyawn te hmueih la a nawn.
17 Boeipa loh vaan lamkah rhaek a hlak tih ol a cai sak vaengah rhihom ol a yaak uh.
18 Anih loh a thunkha kah mawtkung rhoek neh, Philistine mawt kung rhoek khaw boeih a hlak.
19 Dungyan a ih tue a pha tom vaengah, Boeipa neh a koelh hlang hmai laipai la om, Khokhom yungnit khaw a yet hnopai khaw, pakhat taengkah ka loh nim?” a ti vaengah. Anih aka boe sak te a om moenih.
20 A ihnah kungla a yalh phoeiah khaw tonnghma tih manghai dueknah te a thui. Lairhi lamloh ol a huel tih, a olphong loh hlang thae te boeih a khoe.
<- SIRACH 45SIRACH 47 ->