1 Hlang boeih loh, “Kai la paya” a ti uh, Tedae paya a ngen tah a ming hong ni paya la a om

2 Paya thintlo te thunkha la a poeh vaengah tah amah a duek bangla a kopoek a tloh moenih a?

3 Laithae neh diklai boeih khuk hamla, boethae taengla aka yoei nang melam kah ni na lo.

4 Pueipo a ngen tah paya kah omthennah dongah omngaih, Tedae a rhainah tue ah amah te hnap a tloelh uh.

5 Pueipo a ngen loh a bungpuei hamni paya a bom, rhalthohnah ah pataeng pohtling a dan pah.

6 Caemrhal vaengkah na paya te hnilh boeh, Kutbuem na rhae vaengah khaw anih te, poekmueh la om boeh.

7 Baerhoep boeih loh amah kah a paek cilsuep te a koeh, Tedae a ngen longtah amah kavelh ngaihnah dongah cilsuep a paek.

8 Te dongah baerhoep ti khaw rhalrhing, Lamhma balae a ngaih ti ming pah, Amah ham ni poeknah khaw a loh hae eh.

9 Nang taengah hmulung a naan vetih, “Namah ngaih la saii” a ti ni. Te vaengah hoei pai vetih, Nang sokah aka thoeng te a dawn ni.

10 Nang soah ngaihoihnah aka khueh khaw dawt boeh, nang aka uet taengah tah na mataengnah khaw phah.

11 Huta taengah a thimkalh kawng rhalyawp taengah caemtloek kawng, Thenpom taengah bitat kawng hnolai taengah hnoyoih kawng Moeithae taengah moeih kawng, Ngukngak taengah rhennah khawng Palyal taengah bibi kawng, bibi aka kohuet taengah bibi la aka tlung kawng, Sal bingak taengah bibi len kawng dawt boeh. Cilsuep a thui akhaw ngaiyaknah boeh.

12 Tedae Pathen hlang la om tih, Olpaek a tuem tila na ming hlang nen tah yok uh pai.

13 Na lungbuei kah cilsuep dongah tah na lu thuk pai, te soah namah lakah uepom hlang a om moenih.

14 Mah lungbuei kah long tah n'yaak lakah a then n'khoem bael thai, Rhaltoeng imsang kah rhaltawn parhi a ngol lakah khaw then.

15 Te boeih soah khaw Khohni taengah mah thangthui uh, na longpuei te oltak dongah a hoihaeng na saeh.

16 Bibi boeih he tongnah cuek la thulainah om, poeknah long cungkuem boeih lamhma la a kae,

17 Lungbuei he moeiboe kah imphu la om, Te dongah te a baek pali la cawn.

18 A thae neh a then, dueknah neh hingnah khaw, Hmuilai loh phat a uk a taem.

19 Pilnam a ngen tah hlang tloek cangpuei ham muep cueih Tedae amah tah a honghi la om.

20 Cal thai aih khaw hlang loh a thinah, anih te caak ni rhawp a vawtthoek mai eh.

21 Cueinah boeih neh a vawt rhi coeng dongah, toemngamnah kutdoe khaw Boeipa loh a buem pah.

22 Hlang he mah ah cueih lamhma koinih, a boethen thaih te khaw uem ham tueng pai.

23 Hlangcueih long a pilnam a thuituen, te dongah a thaih then khaw nguel yoeyah.

24 Hlang cueih tah koehnah loh a vuei, aka hmu boeih loh anih te a uem uh.

25 Hlang kah hingnah khohnin he a tae thai, Tedae Israel kah khohnin ta a tae lek moenih.

26 A pilnam hamla aka cueih tah hinyahnah te apang, Te dongah a ming khaw a yoeyah la hing.

27 Ka ca aw, na hng vaengah namah noem uh, namah aka thae te hmu lamtah a taengah pae uh boeh.

28 Hno boeih he hlang boeih hamla a then moenih, Hlang he hno boeih dongah a omngaih thai bal moenih.

29 Buhtui antui dongah khaw mo aih boeh, Cue uh muehla caak khaw ca boeh.

30 Caak voelh khaw tloh la om tih, carhut aih khaw loklai la hut.

31 Carhut aih dongah hlang muep duek, tedae aka cue uh a hing khaw sen van.

<- SIRACH 36SIRACH 38 ->