12
Jeremiah kah Kohuetnah
1 Namah taengla kang rhoe vaengah
BOEIPA namah tah na dueng coeng.
Tedae laitloeknah te namah taengah ka thui koinih
balae tih halang rhoek kah longpuei tah
thaihtak tih hnukpoh rhoek loh
a hnukpoh boeih khaw a dingsuek?
2 Amih te na phung tih
a yung a hlak dongah a thaih cuen.
A ka nen tah na yoei uh dae
a kuel lamloh hla coeng.
3 Tedae BOEIPA namah loh kai nan ming.
Kai he nan hmuh tih
ka lungbuei khaw na noem coeng.
Amih te maeh la namah taengah
boiva bangla bawt lamtah
ngawnnah khohnin kah ham rhoe laeh.
4 Diklai he me hil nim a nguekcoi vetih
khohmuen boeih kah baelhing a rhae ve.
A khuikah khosa rhoek kah boethae dongah
rhamsa neh vaa te a khoengvoep tih,
“Kaimih kah hmailong he khui pawh,” a ti uh.
BOEIPA kah Hlatnah
5 Rhalkap neh na yong vaengah
pataeng na ngak atah metlamlae te
marhang taengah na sai eh?
Ngaimong kho ah pataeng na palyal atah
metlamlae Jordan kah mingthennah khuiah na saii eh?
6 Amih na manuca neh na pa imkhui long pataeng
nang taengah hnukpok uh coeng.
Amih te nang taengah khuk pang uh tih
nang kah na then te thui uh cakhaw amih te tangnah boeh.
7 Ka im te ka hnoo vetih ka rho te ka phap ni.
Ka hinglu pumting te a thunkha kut ah ka tloeng ni.
8 Kamah taengah ka rho la om dae
kai taengah duup kah sathueng bangla a ol neh ha thoeng.
Te dongah ni anih te ka hmuhuet.
9 Ka taengkah ka rho he rhikrhek vatlung nim oe?
A taengkah vatlung kilkoel nim oe?
Cet uh, kohong mulhing boeih coi lamtah caak hamla lo.
10 Aka dawn rhoek loh ka misurdum muep a phae tih
ka hmakhuen te a suntlae uh.
Ka hmakhuen sahnaih te khosoek khopong la a khueh uh.
11 Khopong la a khueh vaengah
kamah taengah nguekcoi uh.
Diklai pum he a dingrhak la pong coeng tih
lungbuei ah aka dueh hlang khaw om pawh.
12 Aka rhoelrhak ham te
khosoek kah caphoei cuk boeih soah ha pawk coeng.
BOEIPA kah cunghang tah
diklai khobawt lamloh diklai khobawt duela
a hlap tih pumsa boeih tah a ngaimong pawh.
13 Cang a tuh dae hling la a ah uh dongah
a kha uh akhaw hoeikhang uh pawh.
BOEIPA kah thintoek thinsa lamloh
na cangvuei khaw yak coeng.
14 Kamah pilnam Israel taengah ka phaeng rho dongah aka moi uh ka imben boethae boeih ham ni BOEIPA loh a thui tangkhuet. Kai loh amih te a khohmuen dong lamloh ka phuk tih Judah imkhui te amih lakli lamloh ka phuk. 15 Tedae ka phuk hnukah amih te ka mael thil vetih amih ka haidam khaw om bitni. A rho taeng neh a diklai la rhip rhip ka mael sak ni. 16 A tue a pha atah Baal lamloh toemngam ham ka pilnam a tukkil uh bangla mulhing BOEIPA kamah ming neh toemngam ham ka pilnam longpuei te a tukkil rhoela a tukkil ni. Ka pilnam lakli ah tlingtlawn uh ni. 17 Tedae a hnatun uh pawt atah namtom te phuk tih milh sak ham ka phuk van ni. He tah BOEIPA kah olphong ni.
<- JEREMIAH 11JEREMIAH 13 ->