2 Te vaengah, “A pa Simeon kah Pathen Boeipa aw, oila himbai aka phen tih anih aka poeih, anih aka hliphen tih yah aka bai, a bungko rhaidaeng la aka khueh pah kholong rhoek soah phulohnah khueh hamla a taengah cunghang na paek coeng. Saii boeh na ti lalah khaw a saii uh coeng. 3 Te dongah a boei rhoek te ngawn hamla na paek tih, laithae neh rhaidaeng la a khueh thingkong te thii neh na hluk pah. mangpa neh sal rhoek khaw, ngolkhoel sokah a mangpa khaw na ngawn. 4 A yuu rhoek te maehham la, a tanu rhoek te tamna la na paek. Te vaengah a maehham te nang hamla thahluenah neh aka hlut tih thii kah a tihnai aka tuei na lungnah a ca rhoek taengah na paek. Te dongah bomnah hamla nang kang khue. Aw Pathen, ka Pathen, kai nuhmai ol he hnatun mai.
5 Aka cat lamhma neh aka hnuk aka vai hno he khaw namah loh na saii coeng. Aka om coeng neh aka lo ham hno khaw na hmoel coeng. Na lungbuei aka te tah thoeng tangloeng coeng. 6 Na poek hno te amah om coeng tih “Kaimih la he,” a ti uh. Na longpuei khaw lamhma la boeih na rhoekbah coeng tih na laitloeknah khaw mingnah dongah om coeng.
7 Tahae ah Assyria rhoek tah thaomnah neh muep rhoeng uh coeng he. A marhang dongkah aka ngol neh hoemdam uh coeng. A rhalkap kah thadueng neh koevoei uh coeng. Patling neh, cai neh, lii thal dongah pangtung uh coeng. Namah te caemtloek aka po sak Boeipa ni tila ming uh pawh. Na ming tah Yahweh pai ni. 8 Na tlungnah neh a thadueng te phop pah lamtah a thaomnah te na kosi neh khah pah. Na rhokso he poeih hamla, na thangpomnah ming a omnah dungtlungim te tihnai sak hamla, na hmueituk ki te cunghang neh tloek hamla cai uh coeng. 9 A koevoeinah te so lamtah a lu soah kosi hawk pah. Kai nuhmai loh ka mangtaeng bangla thaomnah kut te kai taengah m'pae lah. 10 Ka hmuilai kah a cal he sal neh mangpa long khaw, mangpa neh a tueihyoeih long khaw, yook saeh. A mangkhak te huta kut loh phop saeh.
11 Na thadueng tah hlangmi dongah hangdang pawt tih, na tlungnah khaw thaomnah a hangdang moenih. Tedae namah tah tlayae rhoek kah Pathen, hlanghnaep kah bomkung, thahoeng aka duelkung, a hno rhoek aka tungaepkung, ngaidaeng rhoek kah khangkung la na om. 12 N'rhen mai dae, a pa Pathen, Israel kah rho Pathen, ka thangthuinah hnatum laem. 13 Na paipi soah, na im cim soah, Zion tlang ah, na ca rhoek kah a pang im soah, hnothae aka saii soah hmalaem neh tloh thoeng sak ham ka phuhlanah ol ka khueh coeng. 14 Namah kah namtu boeih neh koca boeih loh Pathen la na om te ming saeh. Thaomnah neh tlungnah cungkuem kah Pathen, namah bueng phoeiah tah Israel pilnam aka tungaep he a om moenih.
<- JUDITH 8JUDITH 10 ->