1 Te vaengah Judea kah khosa Israel ca rhoek loh Assyria manghai Nebuchadnezzar kah rhalboei Holofernes loh namtom taengah a saii te khaw, a bawkim tom a phae pah tih a metla a poelyoe pa te khaw a yaak uh coeng. 2 Te dongah amih khaw, anih loh ham paan ham te mat thuen uh. Te dongah Jerusalem ham neh a Pathen Boeipa im ham te rhalrhing la om uh. 3 Amih khaw vangsawn lamloh paipaek uh pueng tih Judea kah pilnam boeih neh huek humcui uh. Te dongah tuisi-am neh hmueihtuk khaw, a bawk im khaw a tihnai khui lamloh a ciim uh. 4 Te dongah ol te Samaria paeng la, Kona, Bethhoron, Belmain neh Jerikho la, Khoba neh Aesora la, Salem kol la a pat uh. 5 Tlang som boeih te koe a hul uh tih a vangca te a thung uh. Caemtloeknah hamla caak te khaw a tuung uh. Te vaengah amih lorhing cang boeih khoem a ah coeng.
6 Te vaeng tue kah Jerusalem ah khosoih ham la aka om Joakim loh Bethulia neh Betomesthaim kah pilnam ham ca a pat. Te tah Dathan kaep kah kol Esdraelon rhaldan ah om. 7 Amih te tlang naeng te hul hamla a uen. Te lamkah te amih loh Judea te a muk thai dongah. Te ah aka kun boeih te khoep mah hamla yoei ca. Te kah naeng te caek ka hlek tih va a ael vaengah hlang panit ni a ael rhoeh.
Thangthuinah neh Yaehnah
8 Jerusalem kah ngoltunnah dongah Israel ca rhoek neh a hamca rhoek long khaw khosoih ham Joakim loh amih a uen vanbangla a saii uh. 9 Israel hlang boeih te Pathen taengah a tloh la bungbung pang uh. Te vaengah amamih khaw yaehnah neh kunyun uh. 10 Amamih neh a yuu rhoek khaw, a ca rhoek khaw, a im kah yinlai boeih khaw, kutcoep boeih khaw, a hlang lai rhoek khaw, a pumpu ah tlamhni boeih a vaep uh. 11 Israel hlang tah tongpa khaw, huta khaw, camoe khaw Jerusalem kah rhoek tah amamih te bawkim hmaiah bakop uh. Boeipa mikhmuh ah tlamhni a bai uh tiah a lu dongah hmaiphu a phul uh. 12 Hmueituk te tlamhni neh a khuk uh tih huekhuek pang uh. A ca rhoek a loh pah pawt ham neh a yuu rhoek te kutbuem la a khuen pawt ham, rhokso te a tihnai pawt ham, namtom kah nueihbu nueihkam la om pawt ham te Pathen taengah ngaelngael thangthui uh.
13 Pilnam he Judea pum neh Jerusalem kah Tlungthang Boepa rhokso hmaiah khaw khoyin a sen a yaeh uh dongah, Boeipa loh amih kah thangthuinah neh a yaak tih amih phacipphabaem te khaw a hmuhming pah. 14 Khosoih ham Joakim neh Boeipa hmaiah aka pai khosoi rhoek khaw Boeipa taengah thotat uh. A pumpum te tlamhni a bai uh hnin takuem hmaihlutnah hmueih khaw, paelnaeh hmueih khaw, pilnam kah moeihoeih hmueih khaw a hlut pah. 15 Israel imkhui te a kolonah neh sawt ham amah kah saithainah boeih neh, a lupong sokah hmaiphu neh Boepa taengah pang uh.
