1 Kum hlairhet nah, hla khat hnin kul hnin nit vaengah Assyria manghai Nebukhadnezzar im ah ram tom soah tawnlohnah a khuen te, a thui tangtae bangla koep a thui. 2 A mangpa boeih neh a boei boeih te te a khue tih a hmai ah a ngol sak. Te vaengah a huep la cainah khaw, halang khohmuen kawng te khaw a hmuilai neh a hah la a thui. 3 Te dongah anih ol aka ngai pawt boeih te tah phae hamla ol a tloek uh. 4 A mangtaengnah te a coeng phoeiah tah Assyria manghai Nebukhanezzar loh amah hnukthoi, amah caem kah rhalboei Hlophernes te a khue. 5 Te vaengah anih te, “Diklai pum kah boei, manghai boei loh he ni a thui. Ka mikhmuh lamloh nong lamtah a thadueng na uepnah hlang te khuen. Kho neh aka cer rhalkap te thawng ya pakul saeh lamtah, hnopuei te thawng hlai nit saeh. 6 Khotlak kah khohmuen te boeih paan uh laeh. Amih te ka olpaek a ngai uh moenih. 7 Diklai neh tui a rhoekbah ham khaw amih te thui pah. Amih te ka thintoek ne ka paan coeng. Diklai hman boeih te ka caem kah kholaeh neh ka et pawn ni. Amih te poelyoe ham ka tloeng pawn ni. 8 Soklong neh tangrhom tangbue khaw amih rhok loh a et vetih tuiva ah amih duekrhok bae ni. 9 Amih te diklai khobawt hil tamna la ka sol pawn ni. 10 Cet uh lamtah amih kah ram boeih te kai hmai ah ana lo uh laeh. Amih te amah ah nangmih taengla ha yalh uh bitni. Amih dantanah hnin duela amih te ana tuu uh. 11 Nangmih aka mah rhoek te khaw rhen boeh. Amih te maeh aka ngawn kut ah tloeng uh lamtah a khorhi kah boeih te tah poelyoe uh. 12 Ka ram kah thaomnah neh ka hing dongah, ka thui coeng te tah ka kut neh ka coeng sak ni. 13 Nangmih khaw na boeipa kah olpaek te poe pawt ham ngaithuen, kai loh nang kanguen te buelh saii, uelh muehla saii laeh,” a ti nah.

14 Te dongah Holophernes tah a boei mikhmuh lamloh nong. Te phoeiah rhalboei rhoek, caemtloek boei, neh Assyria caem kah rhoiboei boeih te a khue. 15 Caem te a loh tih a soep phoeiah tah a boei soh saii sak ham a uen bangla a boel. Te vaengah amih te thawng ya paul loh tih marhang hnuk ah lii aka pom he thawng hlainit lo. 16 Anih loh a cului rhoek boeih te muep yet tih camuepuei caempa la om. 17 Te phoeiah kalauk khaw, hnophuei muli-marhang neh khaw, taelek na pawh saelhung neh boiva khaw, cakok khaw muep a tung. 18 Caemtloek rhoek loh lampu khaw a cung la a dang uh tih, sui neh cak khaw manghai thakvok dong lamkah muep a dang uh.

19 Te dongah a caemtloek boeih te manghai Nebukhadnezzar kah a hmai ah a caeh sak ham diklai hmai boeih ah leng khaw, marhang caem khaw, lipom rhoek te lampu aka phuei rhalkap khaw a yaal. 20 Amih hmatoeng ah namcom caempuei te kaisih bangla, diklai hmankah laipi bangla toeklek toekna pawt hil cet uh. 21 Nineveh lamloh Bectileth kol hil he hnin thum cet uh tih a so Cilicia kah tlangpuei tlang kah Bectileth ah rhaeh uh. 22 Te phoeiah Holofernes loh a caem khaw, leng khaw, marhang caem khaw, a rhalkap boeih te a khuen tih tlang ram la luei uh. 23 Anih long te Put neh Lud a thup phoei Chellean ram tuithim kah, khosoek rhi, Rassis neh Ishamale te khaw a poel a yoe. 24 Te phoeiah Perath te a vai tih Messopotamia khaw a poeng. Abron solong kah hmuencak khopuei rhoek neh tuitunli duela a paeh. 25 Cilicia khorhi duela a loh tih anih aka mah boeih te khaw a ngawn. Arabia imdan kah Japheth khorhi tuithim duela cet. 26 Median pum te a dum tih a dap te a hlup pah phoeiah a tuping khaw a poelyoe pah. 27 Yenthaih cangah tue vaengah tah Damasku kol la cet bal tih loh te boeih a hlup pah. A saelhung khaw, boiva khaw a thup pah tih a khopuei rhoek te a hinghoek pah. A khohmuen te a thup pah tih, tongpa cadong boeih te tumca dongah a kaeh pah.

28 Te dongah anih te tuikaeng kah khosa pilnam boeih long khaw, Sidon neh Tyer kah long khaw, Sur neh Ocina khaw khosa rhoek long khaw, Jamia kah khosa boeih long khaw a rhih uh tih thuen uh. Azotus neh Askalon kah khosa rhoek long khaw anih te lutlut a rhih uh.

<- JUDITH 1JUDITH 3 ->