1 Te tla a om te dap khuikah hlang rhoek loh a yaak uh vaengah a ngai hmang uh. 2 Rhihnah neh thuennah loh a thing vaengah tah pakhat a hui khaw rhing voel pawh. Kolvan ah khaw, tlang ah khaw yangyang boeih yong uh. 3 Bethulia khaepdan tlang kah aka rhaeh rhoek khaw yong hamla hlah uh coeng. Te dongah Israel rhalkap rhoek loh amih te a cuk thil. 4 Uzziah long khaw Betomasthaim, Khoba, Kola, Israel a kaelcong boeih ah hlang a tueih. Te dongah amih loh rhal kah rhaehhmuen ah aka thoeng neh amih aka phae a rhal rhoek te a loe la cuk thil ham a thui pah. 5 Te te Israel ca loh a yaak vaengah tah a rhal te huek a cuk thil uh tih Khoba duela a tloek uh. Jerusalem kah rhoek neh tlang kah rhoek khaw rhal kah rhaehhmuen aka thoeng te a thui pa dongah cet uh. Gilead neh Galilee khaepdan kah hlang rhoek long khaw Damasku khorhi hil hlang muep a ngawn uh. 6 Bethulia kah aka om pilnam rhoek long khaw Assyria rhaehmuen te a yalh thil uh tih a poelyoe uh dongah khuehtawn khaw muep a dang uh. 7 Israel rhoek te caem tloek lamkah a mael uh vaengah hnopai aka om te a loh uh. Tlang neh kolvan kah khopuei vangca rhoek long khaw kutbuem te muep a yet dongah muep a dang uh.

8 Khosoih ham Joakim khaw, Jerusalem kah Israel a hamca rhoek khaw Boeipa loh Israel hamla hnothen a saii te phong ham, Judith te hip ti umpo hamla cet uh. 9 Amah neh a hum uh vaengah tah huek a uem tih anih te, “Jerusalem kah thangpomnah la na om tih, Israel khuiah a lenkoek pomsangnah na dang coeng. Mah namtu khuiah khaw a lenkoek hoemdamnah la na om coeng. 10 Na kut loh he he boeih na saii coeng. Israel ham hnothen muep na saii coeng. Te dongah Pathen loh uem pai saeh. Tlungthang Boeipa loh nang te kumhal duela yoethennah m'pae saeh,” a ti uh. Te vaengah pilnam loh, “Amen” a ti.

11 Khohnin sawmthum khuiah pilnam loh rhaehhmuen te a poelyoe pueng. Te dongah Holofernes kah dap khaw, cakhli baelyak khaw, a thingkawng khaw, baeldung khaw, hnopai boeih khaw Judith a paek uh. Te te a loh tih muli-marhang neh, leng neh a phueih tih a soah a hmoek.

12 Israel nu boeih long khaw anih hip hamla cet uh tih a uem uh. Hlangvang loh lam neh anih te a thangpom uh. Te vaengah a kut dongkah samtoelrhui te a pom tih amah taengah aka om huta rhoek ham a tael pah. 13 Amah khaw, a taengkah rhoek long khaw olive lukhuem te a khuem uh. Amah te pilnam boeih kah a lam hmai ah cet tih huta cako te a mawt. Te vaengah tongpa rhoek a hnuk ah bang uh. A ban a lam uh tih rhaihulh a oi neh laa a sak uh.

14 Judith loh Israel boeih kah a hmai ah umponah he a tong tih koehnah laa he rhup rhup a sak uh.

<- JUDITH 14JUDITH 16 ->