JUDITH

JUDITH CABU KAWNG

Judith cabu he lamhma cuek kah Hebrew ol la a tael dae Bible cungnueh (canon) dongah thum sak uh pawh a ti. AD 397 Carthage Council tunpuei neh, AD 1549 Trent tunpuei ah tah canon dongah a hlum uh. Judith dongah he Antiokus Epiphanes (175–164 BC) tue vaengkah khosaknah kawng tueng. Te vaengah he bang catael he muep muep om. He cabu long tah Palestine kah Jews rhoek taengah a rhal te oel ham neh Pathen olkhueng dongah uepom la om ham a a thaphoh. Rhainah meyet om mai cakhaw thincak thin-om lah Pathen olkhueng dongah pai ham te a thui.

Sawt Yoeinah

Jews rhoek a hnaemtaek uh1.1—7.32

Judith loh namtu a hlawt8.1—14.19

Jews rhoek loh tanah a dang 15.1—16.25

1 He tah Nebukhadnezzar kah ram a kung hlainit vaengah om. Anih tah Assyria kah khopuei tanglue Nineveh ah manghai. Te vaengah tue Arpakshad khaw Mede Ecbtana ah manghai van. 2 Anih loh Ecbataba kaepvai kah vongtung te dong thum aka thah tih thongrhuk aka sen lung rhaih neh a sak. Vongtung te dong sawmrhih a sang neh, dong sawmnga a ka la a saii. 3 Vongka kah rhaloengim te a sang dong yakhat neh a khoengim te dong sawmrhuk lo. 4 A vongka te dong sawmrhih sang tih a ka dong dong sawmrhuk lo. Te dongah caemtloek la aka cet caempuei caempa khaw muep ael rhoeh. 5 Te vaengah manghai Nebukhadnezzar loh manghai Arpakshad te Ragau korhi la van a len ah a vathoh thil. 6 Teah te tlang khohmuen kah pilnam boeih khaw, Euphares, Tigris neh Hydaspes kah khosa boeih khaw, kolvan kah Elymean manghai Ariockh khaw anih taengla khong uh. Te dongah namtom rhoek tah Chalden caem taengla muep om uh.

7 Assyria manghai Nebukhadnezzar loh puencawn rhoek te, Persia kah kaha khosa rhoek taengah khaw, khotlak kah aka om boeih taengah khaw, Cilicia, Damasku, Lebanon, Antilebanon kah khosa rhoek taengah khaw, tuikaeng kah kho saengah khaw, 8 Gelead Karmel kah namom taengah khaw, a so Galilee neh Esdraelon kolvan puei ah khaw, 9 Samaria neh a khopuei rhoek ah khaw, Jordan rhalvanga hil khaw, Jerusalem neh Bethany ah khaw, Chelous nehKadesh ah khaw, Egypt tuiva ah khaw, Tahpanhes nek Raamses, Gpshen khohmuen pum ah khaw, 10 Tanis neh Memphis voelah khaw, Egypt khosa boeih neh Ethiopia khori due khaw a tueih. 11 Tedae khorhi boeih kah Assyria manghai Nebukhadnezzar loh a khue te a aal uh. Anih taengah caemtloek la caeh te ngaih uh pawh. Anih te a rhih uh moenih. Tedae anih te hlang pakhat van boeiloeih lamni a poek uh. Te dongah puencawn rhoek te kuttling neh yahtoe la a tueih uh. 12 Te dongah Nebukhadnezzar tah a khorhi kah boeih taengah a thintoek te sai. Te dongah Cilicia khorhi boeih khaw, Damasku neh Syria khaw tawnloh hamla, Moab khohmuen kah boeih boeih, Ammon pilnam khaw, Judea boeih, Egypt booeih khaw, tuitunli rhoi, tuikaeng hil khaw cunghang neh ngawn ham ol a hlo.

13 Kum hlai rhih dongah a tah manghai Arpakshad te caem neh a paan. Te dongah caemtloek vaengah anih yawk. Te vaengah Arpakshad kah caem khaw, lambong khaw, leng khaw boeih a palet pah. 14 A khopuei kah khoyo te a loh te Ecbataba duela a pha. A hmuensang te a loh pah, a hnoyoih hmuen khaw a poelyoe pah, thangpomnah te khaw yahpohnah la a khueh pah. 15 Arpakshad te khaw Ragau tlang ah a tuuk tih caai neh a daeng. Te dogah anih te bangtlang boeih a phae. 16 Te phoeiah ah tah Nineveh la mael tih a caempuei neh a lambong pum te koep a cului. Te vaengah a caempuei duem tih hnin ya hninkul khuiah ah kho a tue uh.

JUDITH 2 ->