1 A hnin thum dongah tah a thangthuinah te boeih. A thothuengnah hnicu te boeih a dul tih himbai then neh amah phuekhlak uh. 2 Te vaengah boeilen tangkik la thoeihcam uh. A cungkuem aka hmu Pathen neh Khangkung kah bomnah te a phoei tih a tanu panit te a khuen. 3 Pakhat dongah te duem hangdang tih, 4 pakhat loh a duel doela a hnuk a vai. 5 Amah te sakthen neh a soep lah hlukhluk phaa tih omngaih la, lungloeinah la tueng. Tedae a lungbuei tah tuikhal la poeh. 6 Thohkah te boeih a poeng phoeiah tah manghai mikhmuh ah pai. Manghai mah tae boei ngolkhoel dongah ngol. A boei himbai te khaw boeih a bai. Amah sui neh lungthen neh thing uh. Tevaengah anih te a rhiim bahoeng om. 7 Maelhmai a dangrhoek vaenagh a boeilennah hluk phaa tih a thintoek thinsa ne a sawt. Te vaengah manghainu tah boklep neh yaidekhlek la om tih pawh sop uh. A lu khaw a hmai ah aka mawt a tanu pum dongah sut hangdang.

8 Te vaengah Pathen loh manghai kah lungbuei mueihla te a yaai la vik a maelh pah. A ngolkhoel dong lamloh hlat thoo tih a ban te Esther amah a phanah rhi hil a doe. Te phoeiah anih olding neh a thaphoh. 9 “Esther metla na om, kai na va ni, na rhalthen sak. 10 Na duek mah pawh, mah olkhueng he mah kuthmui kah taengah ni hnonah eh. Halo phai,” a ti nah. 11 Te phoeiah sui mancai te a thueng tih Esther kah a rhawn te a nawt pah. 12 Anih te a kop tih kai taengah thui lah saw,” a ti nah.

13 Amah te, “Ka boeipa namah he Pathen kah puencawn bangla kan hmuh coeng. 14 Na thangpomnah dongah ka lungbuei khaw thuen coeng. Ka boeipa nang tah kopoekrhai la na om pai. Na uknah khaw lungvatnah neh bae,” a ti nah.

15 A cal li vaengah bong tih bung. 16 Te dongah manghai khaw hit sut. Tedae a sal rhoek loh manghainu te ngaimong la koep a hloep uh.

17 Manghai loh anih te, “Esther balae na ngaih? Nan bihnah te ba lae? Ka ram rhakthuem hil khaw nang kan paek ni ta,” a ti nah.

18 Tahae khohnin he kai ham olpuei la om. Manghai loh ngaih mai koinih amah neh Haman loh hampan hamla tihnin ah hlaembuh ka saii mai mako,” a ti nah.

19 Te vaengah manghai loh, “Haman te a loe la khue uh lamtah, Esther kah kongaih bangla ka rhoi pa eh,” a ti. Te dongah Esther kah a thui bangla hlaembuh te bok a paan rhoi. 20 Misurtui a ok uh li vaengah manghai loh Esther te, “Manghainu Esther, ba dae lae? Nang taengah kam paek bitni,” a ti nah.

21 Te vaengah, “Ka huithuinah neh bihnah khaw om ngawn. 22 Manghai mikhmuh ah maelhmaithen ka dang bal oeh atah amih rhoi manghai neh Haman ham ka saii pah hlaembuh te ham paan mako. Tihnin kah ka saiibangla thangvuen ah khaw ka saii ni,” a ti nah.

23 Te dongah Haman tah manghai taeng lamloh lungbuei omngaih kohoe la cet. Tedae vongup kah Judah hoel Mordekai a hmuh vaengah tah a thintoek te hah. 24 Te cakhaw im la cet tih a hui rhoek neh a yuu Zosara te a khue. 25 Te vaengah boei kawng neh manghai loh anih soah thangpomnah a khueh kawng khaw, ram khuiah banhman lamhma la a om kawng khaw a thui. 26 Te dongah Haman loh, “Manghainu long he manghai he kai phoeiah tah ukhaw a khue moenih. Thangvuen ah khaw kai n'khue bal pueng. 27 Tedae vongup kah Judah hoel Mordekai ka hmuh hno long tah kai kolonah m'pae pawh,” ati.

28 Te vaengah a yuu Zorosa neh a hui rhoek loh amah te, “Kui-ok rhui neh tung a sang dong sawmnga ka sai uh eh. Thangvuen ah manghai te thuipah lam tah Mordekai te kui-ok sak. Te phoeiah hlaembuh te manghai neh omngaih la paan rhoi,” a ti nah. Te poeknah te Haman loh a uem tih kui-ok rhui te a saii.

<- ESTHER (GREEK) 4ESTHER (GREEK) 6 ->