1 Te vaengah tue aka aka om tah, Antiokus ah Persian ram lamloh pathaeng phayang la mael coeng. 2 Te vaengah Persepolis aka ming nah khopuei kun tih, bawkim te rheth phoeiah khopuei te buem hamla cai. Te dongah pilnam loh a cuk thil tih khopuei te a huul dongah Antiocus neh a rhalkap rhoek tah yawk uh. A hnuk ah Antiokus te a yahhat la a kaep a vai ah yong. 3 Ecbanata aha om vaengah tah Nicanor neh Timothy kah caem taengah aka om olthang te a yaak. 4 Te dongah a kosi loh a payawk, anih salaem la aka yong sak Judah rhoek ni tila a khotohnah. Te dongah leng aka mawt te longpuei a mawt hil duem muehla yong laeh a ti nah. Vaan lamkah laitloeknah loh anih soah a om dongah a thinlennah neh, “Ke la ka pha vaengah Jerusalem teh Judah rhoek kah phuel la ka poek sak bit ni,” a ti.

5 Te dae cungkuem aka hmu Israel kah Pathen Boeipa loh anih te a hmui longah aka hoeih thai pawh tloh neh a ngawn. A cal bawt ah tah a bung khuiah tloh loh a pha coeng. A khui lamkah a tloh loh a kolek coeng tih a dim pa voel pawh. 6 Tloh neh nganboh a tloe tloe loh anih muep a ngawn te bahoeng tiktam ngawn coeng. 7 Te lalah khaw a thinlennah te toeng pawt tih, a thinnahnah muep hah pueng, Judah rhoek taengah a sai te hmai la rhong coeng. Te dongah leng le a loe la mawng ham ol a paek. Rhaih a caeh vaengah tah leng dong lamloh tla khungdaeng tih a tloh ka hlak la pum dongkah a vaerhuh te khaw pueng a dae. 8 A thinthahnah neh tuipuei tuiphu khaw ka voek thai a ti rhuet ca vaengah diklai la tla tih pa dongah a koh uh. Pathen loh a thadueng te boeih a tueng sak pai coeng. 9 Halang kah a pum tah a rhit long ni a bol. A hing pueng tah tloh neh patang a yook. A mah te khaw rhong coeng tih a rhalkap boeih long khaw anih kah a rhong te a tuei uh coeng. 10 Amah loh vaan kah aisi pataeng ka hlan ni a ti ngawn dae kolkalh ah a hik bo te ueh thai pawt anih aka kawt ham hlang khaw om voel pawh.

11 A mueihla te paeng tih, a thinthahnah te a hlah vaengah tah Pathen kah toelnah hmuiah, nganboh loh vawpvawp a phaep vaengah tah, a cueih te koep om. 12 Amah kah a bova te a ueh tloel vaengah tah he kah ol neh, “Pathen taengah bakuep ham tueng pai, hlang he Pathen neh vanat la om ham khaw poek ham moenih,” a ti.

13 Te dongah anih soah sitlohnah a khueh ham pawt aka hlang muen pa loh Boeipa taengah olhlonah a khueh tih, 14 khopuei cim mai te koeloe ka cet tih ka cirhong la ka hnil phoeiha phuel ka ka khueh ni ka ti dae sayalh la om ham ka hoe pawn eh, 15 Judah rhoek te khaw up ham a tueng pawt bangla ka poek tih a ca rhoek khaw rhamsa neh vaa hamla voei la ka cai dae, Athens khosa rhoek vanat ka ka khueh pawh eh, 16 Rhokso cim te khaw ka poel ka yoe coeng dae hlutnah a then koek he ka puhlu mai eh, hmuencim kah hnopai te a pueh la ka thung pawn eh. Hmueihhlutnah ham a hnonah te ka mangmu dong lamkah ka hno na eh, 17 Judah hlang ka om van mai saeh lamtah a kaepvai ka caehnah ta kuem ah Pathen kah thaomnah kawng te ka thui mah eh a ti.

18 Tedae Pathen kah laitloeknah anih soah a tiktam la om coeng tih a patangnah a dimnah ham a long om voel pawh. A ngaiuepnah ham khaw a bawt coeng dongah a dangkah capat dognah Judah rhoek taengah rhenbihnah ca a pat. Te kah ca dongah tah,

19 Amah Judah khosa la aka tueng rhoek taengah manghai neh rhalboei Antiokus loh thinko tangla Kuttuuknah kan pat. A sadingnah neh a hoeikhangnah dongah uemnah lungbuei ka khueh.

20 Nangmih neh na ca rhoek khaw a sading saeh lamtah na ngoe ngaih ha soep saeh. Vaan ke ka ngaiuep coeng dongah ka kohoe tangkik. 21 Nangmih kah lungloeinah neh lungbuei then te ka poek ngawn. Persian lamloh ka mael te ka patang tih tloh n'noi coeng. Te vaengah hlang boeih ham hiluepnah khueh pah ham te khaw ka poek. 22 Ka coeng dongah ngaiuepnah a bawt moenih. Ka tlohnah lamloh ka hoeih ham khaw ngaiuepnah a len koek ka khueh. 23 A so ben khohmuen la ram ka loh vaengah tah a pa loh amah yueng la hlang a tuek te ka poek. 24 Te daengah ni poekmueh hno he om tih olthang thae ha pai mai koinih, ram tom kah pilnam he ngaihmang la a om pawt vetih, uknah he u taengah a khueh khaw a ming eh. 25 Te phoeiah ka ram khorhi neh kaepvai kah mangpa rhoek loh a tuethen te a dawn tuh tih metla aka thoeng ham khaw a lamtawn uh. Te dongah ka capa Aniochus te manghai la ka tuek. Amah ka uepnah yoeyah tih nangmih kawng khaw boeih ka uen coeng. Kai tah a hluen kah ram ah thintawn la ka cet oeh coeng. Te dongah heka ka daek he tih anih ham ka daek pah. 26 Te dongah yinhnuk ah khaw, langya ah khaw na poek uh hamla kan hloep uh. Naming loh tahae kah boethen he kai taengah khaw, ka capa taengah khaw rhip khueh uh. 27 Ka longpuei he a vai veih nangmih khaw rhennah, sitlohnah neh n'taemrhai ni tila rhep ka tangnah ngawn,” a ti.

28 Hlang ka ngawn tih aka soehsal loh hlang tloe taengah a haemtaek bangla amah kah a tloh te muep a yok coeng. A yoethae tangkik nih kholong rhalvang kah molmae ah ni a hingnah a bawt. 29 A patai Philip loh a rhok te im la a khuen pah ngawn dae, Antiokus capa te a rhih coeng dognah Egypt kah Ptlolemy Philometor taeng la yong.

<- 2 MAKKABI 82 MAKKABI 10 ->