1 Te vaengah tue ah Antiokus loh a pabae la Egypt te a muk. 2 Te tla a om vaengah khopuei sokah khohli dongah marhang caem te sui pumcumnah te tueng. A rhoihui boeih loh khaw cai neh cunghang a pom uh. 3 Caemtloek hamla aka sikim marhang caem rhoek loh khat neh rhaltloeknah te a sai uh, photling a thueng uh, cai te a khoh uh, thal hmai te a kah uh, pumcumnah boeih te sui hnopai te kah a aa khaw laklak phaa. 4 Te dongah tekah aka tueng boeih long khaw bihma loh hnothen la a thuinah hamla thangthui uh.

5 A hong mai te Antiokus duek coeng tila a puen uh vaengah tah, Jason loh hlang thawng khat lakah a yet a khuen tih khopuei pueng a muk. Te vaengah vongtung sokah caem rhoek khaw a hnuk la a dong dongah khopuei te a loh uh tih Menelaus te rhalmah im ah bakuep. 6 Jason loh a paca boeinah hmaeng hmaeng a ngawn tih mah huikoi soah om he yoethaenah a lenkoek ni ti khaw ming voel pawh. A pacaboeina soah pawt tih a thunka soah caemthang rholik a tai bangla a ngai. 7 Tedae ram uknah te a dang van bal moenih, a pacaboeina taengkah mingthae te a phueih tih Ammon khohmuen la yong. 8 A tloihsoi ah yoethae ni a puei. Aram kah boei Aretas hmaiah anih te a toe uh. Khopuei pakhat phoeiah khopuei pakhat la yong, hlang tom loh a haek uh. Olkheung te a tloelh tih a thihnah, a ram neh a pacaboeinah te khaw a ngawn dongah Egypt la a hawt uh. 9 Amah khohmuen kah rhoek loh vangsawn lamkah vangsawn patoeng la boeih a vai uh. Te dongah amah huikoi la aka om rhoek kah hoeptlangnah ka dang pawt nim a ti tih, Lacedaemonian la a caeh vaengah ah uh. 10 Anih loh rhok a up muehla muep a voeih dongah anih ham aka rhap he pakhat khaw om van pah. Anih kah rhokhlaknah khaw khueh pawt tih a napa rhoek kah phuel ah khaw tla bal pawh.

11 Olthang aka om loh manghai taengla a pha vaengah tah, Judea ram ah boekoeknah om coeng tila a poek. 12 Te dongah a khuikah thintoeknah neh Egypt te a caeh tak tih hlithae bangla khopuei te a loh. A rhalkap rhoek te khaw a hum uh hlang boeih te hmanghmang tloek ham neh imkhui la kun tih ngawn hamla ol a paek. 13 Tedongah camoe patong boeih a ngawn uh, cadong rhoek neh huta camoe khaw cungku uh. Huta cahmang khaw a ngawn uh. 14 A pum boeih la hinthum khuiah, hlang thawng sawm rhet a ngawn uh, a kut kut ah a hnueih tih aka duek he thawng sawmli lo tih sal la muep a yoih uh.

15 Antiokus loh te nen te dam ti pawt tih diklai hmankah hmuencim koek te muk a ngaih pueng. Te vaengah Menelaus loh long a tueng. Anih he a ram khaw a yoih tih olkhueng aka poe la om. 16 A kut muen neh hnocim te dawih a loh tih manghai rhoek loh hmuencim hinyahnah ham kutdoe la a khueh hnopai te khaw a rhalawt kut neh a loh. 17 Antiokus te mueihla a hoehham pa coeng dongah Boeipa kah thinsanah a om te ming voel pawh. Khopuei kah khosa rhoek kah tholhnah kongnah ni Boeipa loh hmuen cim rhaih a hlahpham mai dae. 18 Amih te tholhnah dongah muep buek uh pawt koinih te tlam te om u pawt sui dae. Manghai Seleucus loh hmuencim kah thakvoh sawt sak ham a tueih vaengah thinlen neh aka cet Heliodorus taengkah bangla a taengah tlek a thoeng pa vetih yut uh sui dae. 19 Tedae Boeipa loh hmuencim hamla namtom te tuek pawt tih, namtom ham ni hmuen cim te a khueh. 20 Te dongah hmuencim kah aka yoethaenah boeih namtom long khaw a bawn vetih a hoeikhangnah khaw a cut puei ni. Boeipa kah moeithennah a pai vaengah tah a kosi neh a voeih tangtae khaw tlungthang loh thangpomnah cungkuem neh koep a thoh ni.

21 Antiokus loh bawkim kah sui talent thawng khat yarhet a phueih tih, Antiok la tlek mael. A koevoeinah neh khohmuen ka lan tih a lungbuei cahoeh bangla tuitun khaw ka hlaikan coeng a ti. 22 Jerusalem ah pilham aka hnaemtaek hamla khoboe aka muen Phrygian Philip te amah loh khoboei la a tuek pah. 23 A paca boeina so boethae tangkik la aka boei, Gerizm, Andronicus neh Menelaus lakah khaw anih loh Judah hlang a thinah he bahoeng nah. 24 Antiokus loh Mysian rhalboei Apollonius te caem thawng kul thawng hnih neh a tueih tih tongpa lungcuei te boeih ngawn ham neh, huta camoe boeih te sal la yoih ham ol a paek. 25 Jerusalem a pha vaengah tah rhoepnah aka saii la sa uh Sabbath hnin cim hil te a rhing sak. Judah rhoek te bi sai voel pawh tila a hmuh vaengah tah a lambong te lungpok haica a muk sak. 26 Te te so ham aka cet boeih te a cuk uh thil tih cunghang dongah boeih a ngawn te pilnam hlangmi khaw muep yet.

27 Tedae Judas Mekkabi neh a tloe pako tluk tah khosoek la yong uh tih amah te thuh uh. A hui rhoek neh tlang khohong rhamsa bangla hing uh. A hing te khohong kah thingdawn rhohu neh a cong uh. Te dongah amih te rhalawt hno neh poeih uh pawh.

<- 2 MAKKABI 42 MAKKABI 6 ->