1 Kai taengla puencawn han tueih te a ming tah Uriel ni. 2 Anih long te kai n'doo tih, “Diklai kawng na poeknah he rhep hloo coeng, Khohni kah a khosing nueh hamla na coeng ni tila na poek ah?” a ti.

3 Te dongah, “Ue ta, ka Boeipa,” ka ti nah hatah, kai te, “Na kan tueng ham longpuei pathum kan tueih tih, na taengah olkael pathum kang khueh. 4 Te khuiah pakhat khaw kai taengah lai na rhoe thai tah, hmuh na ngaih longpuei te nang kan tueng bitni. Te vaengah lubuek kah a thae khaw kan thuituen bitni,” a ti.

5 “Ka Boeipa, thui lah,” ka ti nah hatah,

Kamah taengah te, “Cet, kai hamla hmai kah a khiing te khiing lah, khohli kah a phit khaw han nueh lah, khum tangtae khohnin te kai ham hang khue lah,” a ti.

6 Ka doo tih, “Te bang aka saii thai hamla u nim aka thaang coeng, te bang olka khaw kan nan dawt mai?” ka ti nah.

7 Te vaengah kai taengah te, “Nang kan dawt mai koinih, “Tuitun li kah a lungui ah khosa meyet a om? a dungnah ka a hnun ah sokca meyet a om, vaan bangyai ah sokca meyet a om? Saelkhui kah vongrhai te melae? Paradai kah vongka tah melae? 8 Kai taengah he, “A dung khuila ka caeh thuk noek moenih, Saelkhui ah khaw, vaan lamkah na luei noek moenih,’ na mai khaming. 9 Tedae hmai neh, khohli neh, khohnin kawng bueng ni kan dawt, na ming noek hno kawng dae, na paekboe thai pawt tih, a kawng te donah khaw na khueh thai moenih,” a ti. 10 Kamah taengah khaw, “Na rhoeng puei hno khaw na yaakming thai moenih, 11 metlam lae Khohni kah a khosing te na khinglang thai pai eh,” a ti. 12 He he ka yaak vaengah tah ka maelhmai ka buenglueng tih amah te, “Kamih ham tah tahae kah aka om lakah aka thoeng ham nim, Pathen ming mueh la khosak he pawt ni, patang ham he nim, balae ti yakming pawt he nim, aka then ngai mai pawn eh? ka ti coeng.

13 Kai n'doo tih, “Kovan kah thingkho duup la ka cet tih mataengnah ka khueh. 14 Te vaengah thing loh, “Halo, cet uh sih lamtah tuitunli taengah caemtloek sih, te vaengah mamih hmai ah kak saeh lamtah mamih ham duup la muep saii sih,” a ti uh. 15 Amah tlam phek te tuitun kah tuiphu loh mangtaengnah a khueh tih, “Halo, cet uh sih lamtah koval kah duup ke hum sih, te vaengah mamih kah khorhi muep ka saeh,” a ti. 16 Tedae hmai ha pawk tih boeih a hlawp dongah duup kah mantaengnah khaw a hong la poeh. 17 Tuitun li khaw palang lungcang loh khak a kha dongah tuitun tuiphu kah mangtaengah te a hong la poeh van. 18 Nang mai konih te rhoi lakloh metlam ol na tloek eh? Me lae na tang sak vetih melae na boe sak eh?” a ti.

19 Ka doo tih, “A anglat ni a mangtaengnah rhoi te, lan khaw duup ham la a khueh coeng, tuitun kah a hmuenhma long tuiphu a thoh sak coeng tah,” ka ti nah.

20 Anih loh n'doo tih, “A thuem la ol na tloek ngawn, tedae balae tih namah olka tah lai na tloek pawh? 21 Khohmuen he duup hamla a khueh tih tuitunli ham khaw tuiphu a khueh coeng. Te dongah diklai khosa loh diklai ah aka om te a yaak ming tih, vaan dongah aka om loh vaan hmuensang dongkah te a ming van,” a ti.

22 Te phoeiah ka doo tih, “Ka Boeipa nang kang khue, balae tih kai he yakmingnah dongkah thaomnah neh n'khueh? 23 Vaan kah a longpuei te caeh ham tah ka huem moenih, tedae hnin takuem kah ka tawng hno ni ka ti. Balae tih Israel namtom taengah rhaidaeng la na paek? Balae tih na lungnah na pilnam he lailak koca taengla na paek? A pa rhoek kah olkhueng khaw pocinah la a khuen tih paipi na daek khaw om voel pawh. 24 Diklai dongah kaisih bangla ka van uh tih ka hingnah khaw cingmai bangla om. 25 Rhennah dang ham khaw ka koih uh moenih. Kaimih m'phoei thil a ming ham te balae a sai pueng eh? He rhoek he ni nang kan dawt,” ka ti nah.

26 Anih loh kai n'doo tih, “Na hing atah na hmuh bitni, na hinglung a vang tah na limlum taitu bitni. Diklai tue a bawtnah ham a thin tawn coeng. 27 Amah a tue a khueh buelh vaengah aka dueng te olkhueh ham khaw aka khum tangtae hno te koep n'loh thai moenih. Taehae kah diklai tue he kothaenah neh citcai muep om. 28 Boethae kawng kai taengah nan dawt te khaw boeih phoe coeng, te dae cangah tah pha hlan. 29 A tuh tangtae te at pawt koinih, boethae a tuhnah hmuen te khum pawt koinih, a then a tuh nah khohmuen kah khaw thoeng mahpawh. 30 A moecuek lamloh cangti thae he Adam thinko ah ana tuh coeng dongah, tahae ah Pathen aka mingmueh khaw muep thoeng pai ni ta, cangtil tue a pha hil khaw thoeng pai ni ta. 31 Namh khaw poek uh laeh, cangti thae kah a vueithaih dong lamloh boethae meyet lae a thoeng coeng. 32 Cangvuei vueilue tae lek pawt hil a tuh te cangtil hmuen ah meyet lamlae muep a bae coeng!”, a ti.

33 Te vaengah ka doo tih, “Me hil nim? He kah hno he mevaengah nim a thoeng ve? Balae tih mamih kum he bawn tih a thae aih?” ka ti.

34 Anih loh kai n'doo tih, “Khohni taengah thintawn la muep om boeh. Nang namah bueng ham na thintawn dae, sangluen Pathen tah a yet ham a thintawn. 35 Hlang dueng rhoek kah hinglu loh he olka he a thingkong dongah a poek tih, ‘Hekah om khaw meyet nim koe coeng tih, mamih kah thapang doe ham khaw me vaengah nim cangah m'pha ve,’ a ti. 36 Te vaengah puencawn boei Jeremiel loh a doo tih, ‘Diklai tue he coi dongah a khiing coeng, na khohnin a cup vaengah tah, 37 a tue khaw cungnueh neh a nueh tih, a taenah neh a tue khaw a tae, a tue a cup hlan hil tah a niknuk la a thoeih moenih,’ a ti nah ,” a ti.

38 Te vaengah koep ka doo tih, “Tedae, tloengkhoelh Boeipa aw, kaimih he a thae neh ka cungkuem uh. 39 Kaimih kongah nim hlang dueng coinah a tue he a uelh? Diklai khosa rhoek kah tholnah kongah dae nim?” ka ti.

40 Anih loh kai n'doo tih, “Cet lamtah bungvawn nu ke dawt, anih te hla ko a cup phoeiah tah, a bungko loh a khui kah camoe te a tuk thai moenih,” a ti.

41 Te vaengah, “Pawh, Boeipa te te coeng pawh,” ka ti nah.

Anih loh kai taengah, “Saelkhui ah tah hinglu kah thingkong he, bungko bang lamni a om. 42 Huta te a bungtloh a pha vaengah tah ca-om bungtloh a poeng laeh a ngaih. Te banghui lamni a tong lamkah amih taengah a khueh hno rhoek te tah amah hmuen ah khueh ham a thintawn coeng. 43 Te dongah hmuh hamla na hue hno te tah nang hamla thuhphah voel mahpawh,” a ti.

44 Ka doo tih, “Na mikhmuh ah kolonah ka dang atah, te khaw a coeng thai a tah, ka tingtawk a tah, 45 a tue khum tangtae neh aka thoeng ham koi he melae aka yet? khum tangtae ah melae kaimih ham aka tanglue. 46 Aka khum tangtae tah ka ming dae aka thoeng ham tah ka ming moenih,” ka ti nah.

47 Tedaengah kai te, “Ka bantang ah pai lamtah, thuinuetnah kah a thuingaihnah te kan tueng eh,” a ti.

48 Ka pai ting ka sawt vaengah, a nunae, hmaitak hmaihluei loh ka mikhmuh ah cet, hmaitak bang a khum vaengah hmaikhu bueng te dawk om. 49 Te phoeiah khomai tui muep yaal tih khonal te ka mikhmuh ah tlanbuk tlanthim la tlan, te khohli loh bang a yawn vaengah tah tui bang cip tih khomai bueng dawk om bal.

50 Te phoeiah ka te, “Namah loh poek nawn, khotlan he tuicip la yet, hmai khaw hmaikhui lakah len, te tla aka len khaw bang a khum vaengah tuicip neh hmaikhu la cul,” a ti.

51 Te vaengah ka thangthui tih, “Te khohnin hil ka hing ni tila na poek a? Te khohnin ah u lae aka hing eh?” ka ti nah.

52 Te phoeiah kai n'doo tih, “Kai taengah miknoek nan tawn te a cungvang ni kan thui thai, nang kah khosak kawng thui ham kai n'tueih moenih, kai khaw ka ming van moenih,” a ti.

<- 2 ESDRAS 32 ESDRAS 5 ->