Tevaengah lungbuei ngaihmang neh a rhik tangkik la ka haenghang. 4 Ka mueihla tah, “He kai soah nan khueh mai, nang he Khohning kah a longpuei ni na khe. 5 Ka lungbuei ah ka maw tih ka mueihla khaw a thahnoeng tangkik pueng. Kai dongah thadueng tetca khaw a paih moenih. Tihnin hlaem ah tah rhihnah a len koek loh kai n'hih coeng. 6 Te doongah Khohni te ka toeh mai pawn saeh lamtah a bawtnah hil kai he m'moem mai saeh,” ka ti.

7 Te phoeiah, “Boeipa sangluen aw, na mikhmuh ah kolonah ka dang tah, na hmaiah duengnah neh a puekan la muep ka tae atah, ka thangthuinah he na hmai la ha pawk atah, 8 na sal taengah he rhihom mangthui kah thuicaihnah neh thuingainah he n'tueng lah. Te daengah ni ka hinglu khaw rhep na hloep van eh. 9 A tue abawtnah neh a hnukkhueng tue kah aka om te tueng hamla, ka taengah a tingtawk la lai na tloek,” ka ti nah.

10 Anih loh kai te, “He tah mangthai na hmuh kah a thuingaihnah pawn ni. 11 Tuitun lamkah atha pali aka thoeng te tah na manuca Daniel taengah aka thoeng mangthui dongkah ram a palinah ni. 12 Tedae ka thuicaih he khaw, nang taengah ka thuicaih bangla anih taengah ka thuicaih moenih. 13 Diklai dongah ram a pai nah khohnin tah ha pawk saeh. Lamhma kah aka ram boeih lakah khaw a rhim om ngai saeh. 14 Mang hai hlainit loh pakhat phoeiah pakhat manghai thil saeh. 15 Tedae a pabae long tah a tloe hlainit khui lakah a sen ngai manghai saeh. 16 A phae hlainit na hmuh kah a thuingaihnah tah he pawn ni.

17 Na yaak van bangla ol a thui te khaw atha lu lamkah pawt tih a pum khui lamkah ni ti he a thuingaihnah ni. 18 Ram kah a tue bangli ah thingthuelnah a len koek pai ni. Cungkunah mueirhih la om ni. Tedae bat cungku pawt vetih lamhma kah saithainah te koep a loh ni.

19 A phae ca parhet na hmuh van bangla a bae rhoek te rhep ben uh. A thuingaihnah tah he pawn ni. 20 A khui ah manghai parhet phoe ni, amih tue tah bawn vetih a kum khaw yue khum ni. 21 Amih khuikah panit tah a tue yoei bangli vaengah poci ni. Pali rhoek bal long tah a tue a bawtnah vat a pha vetih, panit tah a bawt due la om ni.

22 A hoei la a lu pathum na hmuh van bangla a thuingaihnah la he tlam pawn ni. 23 Khohnin hnukkhueng vaengah tah Khohni loh manghai pathum a phoe sak ni. Amih loh a thai la hno muep a saii vetih diklai a uktaem uh ni. 24 Amah khosa boeih te khaw amih hmaikah aka om rhoek boeih lakah a phaep ngai ni. Te dongah nih amih te atha lu la a khue. 25 Amih tah a halangnah neh a khoboe hnukkhueng te aka cului la om uh. 26 A lu len vik a hma te na hmuh van bangla, manghai khat tah a thingkong dongah patang la duek ni. 27 Panit aka om rhoi bal te khaw cunghang loh a yoop ni. 28 Pakhat te khaw amah kah a cunghang loh a yoop vetih a hnukkhueng pakhat te cunghang dongah cungku ni.

29 Bantang ben ah aka om a lu soah a phae ca rhoi a caeh te na hmuh van bangla, 30 a thuingaihnah he tah, Khohni loh a khueh atha kah a bawtnah coeng ni. A uknah khaw toi vetih na hmuh bangla longlonah khaw hah ni.

31 Na hmuh van bangla khohong lamkah sathueng khaw haenghang tih kawk. Atha te a voek tih a khoboethae te khaw a toel pah khaw a ol bangla boeih na yaak coeng. 32 He tah Khohni loh khohnin a bawtnah hil a khueh Messiah ni. Anih tah David cadil lamloh thoeng vetih amih te a voek ni. Amih kah lailaknah khaw, a halangnah khaw a cawh pah ni. Amih hmaiah a ngaihlihnah a khueh te khaw a yaal pah ni. 33 Amah kah laitloeknah ngolkhoel taengah amih te a hing la a khuen vetih amaih te a thup ni. 34 Tedae pilnam kah a meet te khaw, ka khorhi pum kah aka daem rhoek te khaw a rhennah neh a hlah ni. Lailtoeknah hnin a bawtnah hil amih te omngaih la a khueh ni. Te ni nang taengah a tong lamloh ka thui. 35 He he mang na man la om tih, he ni a thuingaihnah van coeng. 36 Khohni kah olhuep aka ming ham khaw nang bueng ni a tingtawk la na om coeng. 37 Te dongah na hmuh boeih te cabu dongah daek lamtah a huephael hmuen ah khueh laeh. 38 Na plinam khuikah aka cueih, a thinko a khinglang tih olhuep aka khoem thai tila na ming rhoek te cangpuei laeh. 39 Tedae namah ngawn tah, heah he hnin rhih koep rhing dae. Te daengah ni Khohni loh nang taengah tueng ham a ngaih boeih te a tueng pueng eh,” a ti. Te phoeiah tah kan n'caeh tak coeng.

40 Hnin rhih a poeng hil khopuei la ka mael pawt te pilnam loh boeih a yaak vaengah tah, boeih tingtun uh. A yit lamloh a len hil khaw ka taengah la ha loh tih ol a thui uh. 41 “Kaimih loh nang metlam kan tloelh, nang soah a tloh la balae ka saii uh, balae kaimih nan toeng tih he hmuen la na ngol? 42 Tonghma boeih khuiah nang bueng loh kaimih nan caeh tak, tawnhnu kah misur bom bang mai la, khohmuen hmuen kah hmaithoi bang mai la, hlipuei lamkah aka daem sangpho bangla. 43 Kaimih taengah puenthae aka pai he rhoeh hlan nim? 44 Kaimih nan hno va atah Zion a ung vaengah ka tlum uh palueng vetih kaimih ham then bet mai mako. 45 Ka duek uh lakah aka then he kaimih a om moenih,” a ti uh. Te vaengah amih te a ol a len la rhap uh.

46 Te dongah amih te, “Israel aw namning sak, Jakob imkhui ah kothae sak boeh. 47 Khohni loh nang m'poek tih Tlungluen loh na thingthuelnah te a hnilh moenih. 48 Kai khaw, nangmih te kan hnoo pawt tih, nangmih taeng lamloh ka vi uh moenih. Zion a pongnah kong ah thangthui ham neh, mamih kah rhokso a tlayaenah kawng dongah rhennah bih ham ni he hmuen la ka caeh. 49 Nangmih te na im la boeih mael uh laeh, tahae khohnin phoei lamkah tah tangmih taengla ka lo bitni,” ka ti nah. 50 Te dongah amih taengkah ka thui bangla pilnam khaw khopuei la cet uh. 51 Tedae kaimah ngawn tah puencawn kah olpaek bangla khohong ah hnin rhih ka ngol pueng. Khohong kah rhaipai te dawk ka caak tih amah te vaeng tue kah baelhing te ka buh la om.

<- 2 ESDRAS 112 ESDRAS 13 ->