1 Nicarnor neh a rhalkap rhoek rhal ah a cungku te Demetius loh a yaak vaengah Bacchides neh Acimus te Judea ah a pabae la, a bantang kah caem neh a tueih. 2 Amih te Gilgal la aka cet longpuei te a vai uh tih Arbel kah Mesloth kah rhaeh uh. Te vaengah pilnam muep a ngawn. 3 Kum ya sawmnga kum nit hla khat dongah tah Jerusalem a rhaeh thil uh. 4 Te phoeiah tah rhalkap thawng kul, marhang caem thawng nit neh Berea la khoong uh.

5 Te vaengah Judas te Elasa ah rhaeh tih anih taengah hlang coelh thawng thum om. 6 Caempuei hlang mi a yet te a hmuh uh vaengah tah bahoeng a rhih uh. Te dongah rhaehhmuen lam loh mueh yong uh tih hlang yarhet bueng la a cul pah.

7 A rhalkap rhoek toeitoei yong tih rhal a yoei te Judah loh a hmuh vaengah, a mueihla paep sut. Amih koep a cului ham khaw a tue om voel pawh. 8 A ko bawt tih aka om duen rhoek te, “Thoo uh, rhal te paan uh sih. Amih tloek ham tah thaomnah khaw a om khaming,” a ti nah. 9 Tedae amah te a sim uh tih, “Thadueng khaw ng'khueh uh voel moenih, Mah hingnah mah huul uh pawn sih, mah huiko taengla mael sih lamtah amih te tloek sih, maih he bahoeng n'yol uh coeng,” a ti uh. 10 Tedae Judas loh, “Savisava oe, te bang amih taeng lamloh yong ham ol te tah. Mamih ham a tue om koinih, maih huiko ham tah thinom neh duek sih, mamih kah rhuepomnah aka toeh he om boel saeh,” a ti nah.

11 Te vaengah Bacchides kah caem tah rhaeh hmuen lam loh khong te Judas a pai thil. Marhang caem te rhoi nit la a paek tih, payai aka om khaw, lii aka pom khaw caembong hmai a hlangrhalh boei kah a thui bangla cet uh. 12 Bacchides tah bantang cet tih caemtloek rhoinit loh a thingthung. Pumlen loh olueng ol neh a lamhma phai vaengah Judas long khaw olueng te a ueng van. 13 Caem kah ol loh diklai a hinghuen sak tih, caemtloeknah he min cang lamloh hlaem duela om.

14 Bacchides kah a thadueng he a bantang ben ah om tila Judas loh a hmuh. Te vaengah a thinom hlang rhoek khaw a taengah a caeh pah. 15 Te dongah a bantang ben te a phop tih Azotus tlang duela a hloem. 16 Bantang kah a phop pah te banvoei kah rhoek loh a hmuh, te dongah a hnuk la bung tih a hnuk longah Judas neh a hlang rhoek te a hloem uh. 17 Rhal te bahoeng a tlung dongah voeivang kah hlang te hmalaem neh aka duek khaw yet. 18 Judas khaw te vaengah duek tih a tloe rhoek te yong uh. 19 Jonathan neh Simon loh a manuca Judas te a loh rhoi tiah Modein kah a napa rhoek kah phuel ah up uh. 20 Anih te a rhah uh tih, Isarael pum loh anih muep rhaengsae uh, anih ham khohnin a yet rhungrhap uh tih, 21 Balae tih hlang tlung a cungku, Israel kah khangkung yamvat ah,” a ti uh.

22 Judas kah a bibi, a caemtloeknah, rhalthen neh a saii boeih te khaw, a lennah khaw muep a om aih dongah boeih khoem uh lek pawh.

23 Judah a dueknah hnukah tah Israel khuiah hnukpoh rhoek neh boethae aka saii rhoek te phoe paluep. 24 Te vaengah khokha khaw bahoeng tlung tih, a khohmuen khaw a khaepdan la boeih cet. 25 Bacchides loh Pathen aka ming mueh te khohmuen a hut sak. 26 Amih long te a khe uh tih Judas kah paya rhoek te a tlap phoeih Bacchides taengla a thak uh. Amih soah tawn a loh tih luemhnangnah la a khueh. 27 Israel soah kothaenah muep pai. Te bang kothaenah te tonghma rhoek aka hma parhi te a om noek moenih.

28 Te phoeiah tah Judas kah paya rhoek te tingtun uh tih Jonathan taengah, 29 Na manuca Judas aka duek parhi te mamih rhal neh Bacchides aka muk ham khaw, mamih aka hmuhuet namtu aka saii ham khaw hlang a om moenih. 30 Te dongah nang the tihnin ah kaimih kah ukkung neh mawtkung ham khaw, mamih kah caem aka tloek ham kan tuek uh coeng,” a ti nah. 31 Te dongah a manuca Judas yuengla mawtnah te Jonathan loh a doe.

32 Bacchides loh a yaak vaengah Jonathan te ngawn hamla a taeng. 33 Jonathan neh a manuca Simon long khaw, anih taengkah boeih long khaw tekah a yaak uh dongah Tekoa khosoek la yong uh tih Asphar tuibuem tui taengah rhaeh uh. 34 Te te Bacchides loh Sabbath hnin ah a ming te a rhalkap boeih te Jordan te kat.

35 Te dongah Jonathan loh a manuca te hlangping kah mawtkung la a tueih. Te vaengah a paya la aka om Nabateans taengah hnopai aka om boeih te khoem sak ham a bih. 36 Tedae Medeba lamkah Jambri cako te khoem a pawk pah dongah Johan neh a koe te a tuuk pah tih pahoi a khueh.

37 He phoei lamlong tah Jonathan neh a mana Simon taengla puen uh tih, “Jambri cako loh yulueinah a len la a saii uh ni, yulokung neh vasakung khaw Kannaan hlangcong boei canu Nabath te a tanu rhoek neh ha pawk ni,” a ti nah. 38 A mana Johan a ngawn te te khaw a poek coeng dongah tlang hlaep la luei tih thuh uh. 39 A sawt uh vaengah hnophueih neh muep thoeih uh uh kholumlawk la cet uh. Yulo kung khaw a hui neh, a manuca rhoek neh, kamrhing, tumbael, pumcunah neh muep cet uh. 40 Te vaengah tangpuem khui lamloh a cuuk thil tih koe a ngawn. Te dongah muep hmalaem uh tih cungku uh. A tloe rhoek te tlang la yong uh. Te dongah a hnopai te Judah rhoek loh a loh pah. 41 Yulohnah te rhungrhahnah la poeh tih, a tumbael ol khaw rhok kah rhahlung la a poeh pah. 42 A manuca kah thii phu te boeih a loh phoeiah tah Jordan sih la mael uh.

43 Bacchides loh a yaak vaengah tah Sabbath hnin ah rhalkap a yet neh Jordan tuikaeng la cet uh. 44 Jonathan long khaw a taengkah rhoek te, “Thoo uh sih lamtah mah hinglu ham tloek uh sih, tihnin kah hno he hnuk vaengkah bang voel moeni. 45 So uh lah caemtloek ham he mamih kah a hnuk ah khaw, a hmai ah khaw om coeng, Jodan he benla khoep, ke benla khoep, sihnok tangpuem neh khoep om coeng, maelnah a longpuei khui pawh. 46 Vaan kah taengah pang uh laeh, te daengah na thunkha kut lamloh n'loeih sak eh,” a ti nah. 47 Te dongah caemtloeknah te koe a tong uh. Jonathan loh a ku a thueng tih Baccides te a tloek voek a phaelhael tih vik yong. 48 Te phoeiah Jonathan neh a taengkah hlang rhoek te Jordan tui dongla cungkung uh tih rhalvangan la kat uh. A rhal rhoek tah amih tloek ham te kat uh voel pawh. 49 Te khohnin ah Baccides kah hlang rhoek thawng khat tluk a cungku pah.

50 Bacchides te Jerusalem la mael tih Judea ah khopuei vongcak rhoek te a sak. Rhalmah im te Jericho, Emmaus, Bethhoron, Bethel neh, Timmnah, Pharathon, Tephon aha a khueh tih vongtung a sang la vongka kah thohkal khaw boeih a khueh. 51 Israel te nganboh aka pae a khuiah pumom rhoek boeih a khueh. 52 Bethzur neh Gaza te khaw a cak la koep a saii tih rhalmah im neh, caak khuehnah ham rhuengim khaw a sak. 53 Khopuei hlang rhoei kah a ca rhoek te tlansum la a tloh tih Jerusalem kah rhalmah im ah khak a khoh.

54 Kum ya sawmthum kum thum kah a hla bae vaengah tah Alcimus loh hmuencim kah a khui pangbueng te phae hamla ol a paek. 55 Koengloeng ham koe a tong vaengah Alcimus te tlo tih a bibi te a hlavawt. A ka khaw a mueh pah vik a thoek pah. Te dongah ol khaw cal thai pawt tih a im ham khaw uen thai voel pawh. 56 Ngaihmang tangkik tue vaengah Alcimus te duek. 57 Alcimus a duek te Bacchides loh a hmuh vaengah manghai taengla koep mael. Te dongah Judah khohmuen he kum nit tah a mong la om.

58 Lailak rhoek boeih loh a taeng uh tih, “Jonathan neh a hlang rhoek tah ngaimong ngaitoe la kho a sak uh. Te dongah Bacchides taengla thak uh pawn sih. Hlaem pakhat ah mah amih te a tuuk bitni,” a ti uh. 59 Te dongah cet uh tih Bacchides neh thui uh thae. 60 Thadueng a len ngai neh cet tih Judea kah a huitai taengah a huep ca boeih a pat. Jonathan neh a hlang rhoek te tuuk hamla a thui pah. Tedae a mangtaengnah te vik a phoe pah coeng dogah tuuk ham coeng thai pawh. 61 Jonathan kah hlang rhoek loh a khohmuen kah hlang sawmnga a tuuk uh. Amih te hnukpoh ham aka mawt la a om uh dongah a ngawn uh.

62 Jonathan neh a hlang rhoek khaw, Simon khaw Bethbasi khosoek la vik nong uh. Ka po tangtae khopuei te koep a thoh uh a cak la a khueh uh. 63 Bacchides loh te te a yaak vaengah tah rhalkap koep a coi tih Judea kah hlang rhoek taengah khaw o a pat. 64 Te phoeiah tah amah te cet tih Bethbasi te a rhaeh thil. Te te khohnin a sen a tloek tih caemtloek seh khaw a saii.

65 Tedae khohmuen khuila a kun taktak vaengah tah Jonathan loh a mana Sinmon te khopuei khuiah a khueh, hlang yol neh vik cet. 66 Anih long te Odomera neh a huiko rhoek, Phasiron kah pilnam khaw a mah dap a ngawn. 67 Te phoeiah pahoi a tloek coeng tih a rhalkap neh caemtloeknah khuila kun. Simon neh a hlang rhoek khaw khopuei lamloh coe uh tih caemtloeknah seh te hmai a hoeh pah. 68 Amih loh Bacchides a cuuk thil uh tih a phop uh. Anih te a kuel ka hlak la a tloek uh. A mangtaengnah te a phoe pa vik dongah a ngaiuepnah a hong la a poeh pah. 69 Te dongah a khohmuen ah anih taengla aka cet tih aka puen hnukpoh rhoek taengah khaw a thin toek tih amih te muep a ngawn. Te phoeiah ni amah khohmuen la mael ham a cai pueng.

70 Jonathan loh te te a ming vaengah tah anih neh rhoepnah saii khaw, tamta a tuuk te koep hlawt ham khaw laipai a tueih. 71 Anih long khaw ko a vai puei coeng dongah, a thui bangla a saii van. Te vaengah a hing khui tah amih patangnah paek pawt hamla Jonathan taengah ol a hlo. 72 Hnuk vaengah Judah khohmuen lamkaha a khuen tamna rhoek te khaw a loeih sak. Te phoeiah amah khohmuen la mael tih Juhdah khorhi te cawt voel pawh. 73 Te tlam te Judah lamkah cunghang khaw duem van. Jonathan he Michmash ah kho a sak tih pilnam ham lai a tloek pah. Te dongah Israel khuikah Pathen aka ming mueh rhoek te boeih a phae.

<- Makkabi Cabu Pakhat Nah 8Makkabi Cabu Pakhat Nah 10 ->