1 Kum yanga kumkhat vaengah Seleucus capa Demetrius neh Rome lamloh hlah uh tih hlang a yol te tuitunli kah khopuei cet, tih pahoi manghai. 2 A napa rhoek kah boei im la a kun vaengah tah caem loh Antiokus neh Lysias te a tuuk uh tih a taengla a khuen pah. 3 Te kah bisai a ming vaengah, “Amih maelhmai te m'hmuh sak boeh,” a ti nah. 4 Te dongah rhalkap loh amih rhoi te ngawn tih, Demertrius loh a ram kah ngolkhoel te koep a loh.

5 Anih taengah te hnukpoh neh Pathen aka ming mueh Israel hlang rhoek te cet uh tih, khosoih a ham bi aka ngaih Alcimus loh a hui uh. 6 Manghai taengah pilnam te he tholhpaelnah neh a thui uh. “Judas neh a manuca rhoek loh na paya khaw boeih a phae tih, mah khohmuen lamloh amih te a vai coeng. 7 Na uepnah hlang te tueih lamtah Jadas loh a phae te so saeh. Te te kaimih neh khohmuen manghai taengla ha puen saeh. Te vaengah anih aka bom te khaw dantat,” a ti nah.

8 Te dongah manghai paya khuiah tuiva rhal peng kah kah khoboei la aka om Bacchides te a tueih. Anih te ram khuikah hlang len la om tih manghai taengah uepom la om. 9 Anih te a tueih tih Pathen aka ming mueh Alcimus neh a puei sak. Alcimus te khosoih boei la a khueh tih Israel boeih taengah phuloh hamla ol a paek. 10 Te dongah khoong uh tih thaomnah a yet tloe neh Judah khohmuen te a pah. Te vaengah puencawn rhoek te Judah boeinaphung taengla a tueih tih thailatnah neh rhoepnah ol a thui sak. 11 Tedae hlang a yet neh a pawk uh coeng dongah anih ol te ngaiyaknah pawh.

12 Te vaengah cadaek rhoek muep pawk uh tih Alcimus neh Baccided a ol tiktam la a dawt uh. 13 Hasidean rhoek Israel ca taengah rhoepnah ol lamhma la a thui uh. 14 Te vaengah, “Aaron kaha khuui lamloh khosoih te caem neh ha pawk tih mamih he ngnboh m'pae mahpawh,” a ti nah. 15 Alcimus long khaw rhoepnah ol te amih taengah a thui tih olhlo neh amih taengah, “Nangmih taeng neh na paya rhoek taengah khaw nganboh kan pae uh mahpawh,” a ti nah. 16 Te dongah amih te a tangnah. Tedae anih long te hlang sawmrhuk a tuuk tih hnin at khuiah a ngawn. Te dongah a dangkah ol a daek tangtae bangla thoeng coeng.

17 na uemomnah hlang kah pumsa neh a thii tah, Jerusalem kaepvai ah a haeh uh coeng Amih te aka up ham hlang khat khaw om pawh. 18 Te vaengah rhihnah neh a let loh pilnam boeih te a tlak thil tih, “Amih taengah oltak neh tiktamnah a om moenih amih loh kotluepnah khaw, olhlo neha toemngam te khaw a poe,” a ti uh.

19 Bacchides te Jerusalem lamoh khoe uh tih Bethzaith ah rhaeh. Te vaengah hlang tueih tih a taeng lamloh aka yong rhoek te a tuuk sak. Pilnam a ngen te a ngawn tih tangrhom len khuiah a voeih. 20 Alcimus te khohmuen aka hutnah la a khueh tih aka bom la rhalkap khaw a khueh pah. Te phoeiah Baccides te manghai taengla mael.

21 Alcimus te khosoih boei la om ham thingthuel uh. 22 Te dongah a pilnam aka lawn rhoek te anih taengla boeih cet uh. Amih long te Judah ram boeih a buem uh tih Israel khuiah porhaknah muep a paek uh. 23 Israel soah Gentiles rhoek kah a saii lakah Alcimus loh a thae a saii ngai te Judas loh a hmuh. 24 Te dongah Judas te Judea saa kah kaepvai la boeih cet. Caemtuhnah aka khueh hlang boeih te phu a loh tih a ram khuila kun pawt ham khaw a khang pah. 25 Judas neh a taeng kah rhoek a thaa a om hang te Alcimus loh a hmuh vaengah amih te oel thai voel pawh. Te dongah manghai taengla cet tih amih kawng te a thae la a thui.

26 Te vaengah manghai loh a hinyannah mangpa Nicanor te a tueih. Anih loh Israel te a thinah tih a tuei. Te dongah pilnam te thup hamla ol a paek. 27 Te dongah Nicanor tah hlang a yet neh Jerusalem la cet. Judas neh a boeinaphung taengah khaw thailatnah la rhoepnah ol a pat. 28 “Nang neh kai laklo ah olpungnah om boel saeh, nang te maelhmai rhoi hum uh ham hlanga yol nen ni ka lo,” a ti anh. 29 Te dongah Judas neh amih loh khat neh khat rhoepnah om ham a kotluep uh. Te dae a rhal rhoek loh Judah te khoh hamla cai uh. 30 Nicanor loh thailatnah neh caeh hamla a cai te Judas taengah vik a phoe. Te dongah a rhih neh anih te koep hmuh ham ngaih voel pawh. 31 A mangtaengah vik a phoe te Nicanor loh a ming vaengah tah cet tih, Judas te Capharsala ah caemtloeknah neh a doe. 32 Tedae Nicanor kah rhalkap te hlang yanga tluk a cungku pah. A tloe rhoek tah David khopuei la yong uh.

33 Te phoeiah Nicanor te Zion tlang la luei. Te vaengah hmuencim lamkah khosoih hlangvang neh pilnam khuikah a hamca rhoe loh anih te boethen la a doe uh. Manghai hamla hmueih a phum uh te khaw a nih a tueng uh. 34 Tedae a nueihnah bueng kolla amih te a thaekhanah. Amih te a poeih tih mangkhak la ol a thui. 35 A thintoek ah tapnah neh, “Judas neh a rhapkap rhoek he tihnin ah ka kut dongla a pha pawt a tah, sading la im koep kam pha vaengah he im he ka hoeh ni,” ti la ol a hlo. Te phoeiah a thintoek angkueng la mael. 36 Te vaengah khosoih rhoek te ceth uh bawkim neh hmuituk hmaiah pai uh. A rhah uh doe la, 37 Na ming khuenah ham ni he im he na khueh, na pilnam ham khaw thangthuinah neh huithuinah la om. 38 He kah hlang neh a rhalkap soah a phu lo kangna, Amih te cunghang dongah cungku uh saeh. Amih kah salphamnah te poek lamtah, Amih te hing uh voel boel saeh,” a ti uh.

39 Nicanor te Jerusalem lamloh cetih Bethhoron ah rhaeh. Te vaengah Syria caem khaw anih taengla kibaeng. 40 Judas kha hlang thawngthum neh Adasa ah rhaeh. Te vaengah Judas te tangthui tih, 41 Manghai kah puencawn rhoek loh salphamnah thui sitoe cakhaw, na puencawn loh Assyria te thawng yakhat phoeiah thawng sawmrhet thawng nga a ngawn. 42 Tihnin ah kaimih hmaikah caem rhoek taengah khaw saii pah. Nicanor loh hmuencim soah halang ol a thui. Te dongah a halangnah bangla anih te thuung laeh,” a ti.

43 Adar hla hnin hlai thum vaengah tah caem rhoi te hum uh rhoi. Nicanor kah caem tah a phop uh, amah khaw caemtloek vaengah lamhma la cungku coeng. 44 Nicanor a cungku te a hlang rhoek loh a hmuh vaengah a pumcumnah te a voeih uh tih yong uh. 45 Te dongah Judah rhoek loh amih hnin at longcaeh, Adasa lamloh Gazar duek khaw a hloem uh. Caemtloeknah tuki te a ueng uh tih amih te a vai uh. 46 Judea vangca lamkah pilnam te suntla uh te rhal te khoep a mah uh. Te phoeiah amih aka hloem rhoek taengah ki a vai uh. Te dongah rhal te cughang dongah cungku uh tih khat khaw sueng pawh. 47 Judah rhoek loh kutbuem te a loh uh a poel a yoe uh. Mangkhak la kut aka thueng Nicanor kah a lu neh bantang kut khaw a tloek pa uh. Te te Jerusalem la a khuen uh tih vongvoel ah a tai uh. 48 Pilnam khaw bahoeng a omngaih dongah omngaihnah khohnin te a bul uh. 49 Kum takuem Adar hla hnin hlaithum te tah kum takuem bul hamla ol a tloek uh. 50 Te daengah khohmuen khaw rhalmongnah nah rhaih om.

<- Makkabi Cabu Pakhat Nah 6Makkabi Cabu Pakhat Nah 8 ->