1 Gorgias loh rhalkap thawngnga neh aka phaep uh tangtae marhangcaem thawng khat a khuen tih khoyin ah rhaehmuen lamloh nong. 2 Jerusalem rhalmah hmuen kah hlang te longtueng la a khuen. Judah rhalkap te buengrhuet muk hamla cai. 3 Tedae Judah tah Emmaus kah manghai caem te tloek hamla a taeng tih a hlang rhoek neh cet. 4 Gorgias neh a lambong rhoek tah rhaehhuen lamloh thoeih uh li pueng. 5 Gorgias neh a rhalkap rhoek tah tekah hlaem ah Judah rhaeh hmuen a pha tih, hlang khat khaw hmu uh pawh. Amih long tah Judas neh a hlang rhoek te yong uh coeng, te dongah amih te tlang ah tlap sih,” a ti uh.

6 Mincang ah tah Judas te kolvan ah hlang thawngthum neh phoe. Amih te a ngaihbangla caempho a khueh moenih. 7 Gentile caem tah lambong neh marhangcaem loh muep thingthung te a hmuh uh. 8 Tedae Judah loh amih te, “Rhalkap he yet dongah lakueng uh boei, amih na tloek vaengah khaw rhih uh boeh. 9 A pa rhoek te Egypt manghai loh a rhalkap neh a hloem dae Carhaek Tuili ah metlam a daem uh tite poek uh. 10 Mamih soah rhennah a khueh hamla Boeipa mah dawt uh sih. Thangthui uh sih lamtah a pa rhoek taengka a paipi te a hinyahnah bitni. Tihnin kah n'tloek rhalkap he khaw a phop bit ni 11 Te vaengah Gentile rhoek loh Israel tah amih aka khang tih aka hlawt Pathen a khueh tila a ming uh bitni,” a ti nah.

12 Judas neh a hlang rhoek caemtloek ham a hlah uh te Gentile rhoek loh a hmuh. 13 Amih te tloek hamla rhaehmuen lamloh thoeih. Te vaengah Judas neh a hlang rhoek loh olueng te a ueng uh tih a tloek uh. 14 Te dongah Gentile rhoek tah phuk paek tih kolvan la yong uh. 15 Tedae aka suvaih rhoek tah a ngawn uh. Israel loh a rhal rhoek Idumea kolvan kah Gezer, Azotus neh Jamia duela a hloem uh. Rhal te thawngthum tluk tah rhenten a ngawn uh. 16 Amih aka hloem lamloh Judas neh a rhalkap rhoek te mael uh. 17 Te vaengah hlang rhoek te, “Kutbuem ham te moo uh boeh. Gorgias ne a rhalkap rhoek a yoei kah tlang ah om pueng. 18 Mamih hmai ah a nah la tloek ham om pueng. A cak la pai si lamtah tloek sih. Te phoeiah kutbuem na ngaih te bidip la na loh uh bitni,” a ti nah.

19 Judah loh a thui te bawt a khah vaengah, a rhal rhoek te tlang lamloh a suntlak te a hmuh uh. 20 Amih long te a rhalkap rhoek a yoeng uh khaw a hmuh uh. Tetah a rhaehmuen te a hoeh pa tih hmaikhui a luei long te a mingpha sak coeng. 21 Te a hmuh tih hlaw a let uh vaengah Judas kah a rhalkap loh amih te tloek ham kolvan ah a mah te a hmuh. 22 Te dongah amih te Philistia la yong uh. 23 Te phoeiah tah Judas tah a rhal ka rhaehhmuen ah kutbuem te a paan. Sui khaw, caka khaw, himbai a thim neh daidi, muep a loh uh tih a poelyoe uh. 24 Judah rhoek te amah rhaehhmuen la a mael uh vaengah laa a sak uh. Boeipa tah koeh hamla tueng pai, a sitlohnah tah kumhal duela cak,” a ti uh. 25 Te khohnin ah tah Israel pilnam loh tanah a len koek a hmuh uh.

26 Gentile lambong aka loeih rhoek te Lysias taengla cet uh tih aka thoeng boeih te puen uh. 27 Caemtloek vaengah a lambong a yawk te Lysias loh a yak vaengah tih, manghai olpaek bangla Israel a duek pawt a thinnaeh. 28 A kum bae tah tah Lysias loh rhalkap thawng sawmrhuk a coi tih, marhangcaem thawngnga te Judah rhoek tanah hamla a khueh. 29 Amih te Idumea la khong uh tih Bethzur ah rhaeh uh. Amih aka doe ham te Judas loh hlang thawngrha a khuen.

30 A rhal ben kah rhalkap muep a yet teh Judas loh a hmuh vaengah tah, “Israel khangkung namah kan koeh eh, pumlen kah a tloek khaw na sal David kut nen ni a phae. Philistine caem boeih khaw Saul capa Jonathan kah hnopai aka phuei cadong kut ah ni a duek sak. 31 Te tlam van te na pilnam Isarael loh ka rhal he ta van saeh. Amih loh rhalkap neh marhang a uepnah mangkung te amih loh yakpok saeh. 32 Amih te rhih sak lamtah, a thinomnah khaw paci saeh, a tlaknah hmai ah amih thuen saeh. 33 Namah kan lungnah tih nang kan bawk, ka thunkha te ka ngawn uh saeh lamtah, nang koehnah te ka sa uh eh,” tila thangthui.

34 Caem tloek a tong neh a kut, kut ah hnuei uh thae tih Lysias kah hlang rhoek te thawngnga tluk a ngawn uh. 35 Te vaengah Lysias loh a rhalkap a duek te a hmuh tih, Judah neh a hlang rhoek kah a thinomnah a paa pawt tih, hinyahkap la a duek a hing ham a sikim uh te khaw a hmuh vaengah Antiok la koep mael. Rhalkap a yet neh Judea te koep paan hamla tangka neh rhapkap te koep a paang.

36 Te phoeiah Judas neh a manuca rhoek loh, “Mamih kah thunkha nawng n'phop coeng. Cet sih lamtah rhokso te cilpoe sih, ciim pawn sih,” a ti uh. 37 Te dongah rhalkap te tingtun uh tih Zion tlang la cet uh. 38 Rhoso khaw pong tih, hmueihtuk khaw tangrhong coeng, vongka khaw a ung coeng te,” a hmuh uh. Vongup khaw sulrham te tangpuem bangla poe ti tlang bangla om. Te vaengah khosoih rhoek kah imkhan khaw boeih a poci te a hmuh uh. 39 Te dongah a himbai te a phen uh tih rhahlung neh muep rhap uh. Amamih te hmaiphu neh phul uh. 40 A maelhmai te diklai buluk uh. Tuki a ueng tih a yaksak uh vaengah vaan la oeloe tih rhap uh.

41 Rhokso te a cilpoe khuiah tah rhalmah im te tloek hamla Judas loh hlang a khueh. 42 Olkhueng dongah aka tlungmu tih aka cuembuet khosoih rhoek te a tuek. 43 Amih loh rhokso te cilpoe uh tih rhalawt hmuen kah lung thae te a khoe uh. 44 Tanghong la a khueh hmueih phumnah hmueihtuk kawng te a thui uh. 45 Hmueihtuk he phil palueng ni a then. Te daengah ni a hnukhueng ah Gentile rhoek loh phil pawt vetih a poeih pawt eh, a ti dongah hmueituk te a phil uh. 46 Lungto te metla saii ham khaw aka thui hamla tonghmang a phoe hlan hil atah bawkim tlang kah hmuen a naep ah a khoem uh. 47 Te phoeiah lungtote a pum la a loh uh tih olkhueng kah a thui bangla hmueihtuk te lamkah kah phek la a sak uh. 48 Rhoso khaw, bawkim khuiben khaw, hmuencim vongup khaw koep a sak uh. 49 Umam khaw, hmaitung khaw, hmueituk kah bo-ul khaw, bawkim kah caboei khaw a thai a saii uh. 50 Hmueituk dongah bo-ul a nawn uh tih hmaitung dongkah hmaithoi khaw khaw a tok uh vaengah Bawkim te vaengah a paek uh. 51 Caboei dongah buh a tawn uh tih hniyan te koep a yan uh.

52 Tekah a hla la aka om kum ya sawmli kum rhet, Chislve hna hnin kut hnin nga mincang ah tah thoo uh. 53 Te vaengah hmueih te olkhueng loh a thui bangla hmueih te a thai la a suem hmueihtuk dongah a nawn uh. 54 Gentile rhoek loh hmueihtuk a tanghnong sak nah khohning neh khohnin buel ah hmueihtuk a thai te laa neh, rhotoeng neh, vingvoeng neh a nawn uh. 55 Te vaengah pilnam boeih te maelhmai a buluk uh tih a bawk uh phoeiah amih aka hoeih sak vaan ke yoethen a paek uh.

56 Te dongah nawnnah te hnin rhet khuiah a saii uh. Omngaihnah neh hmueihhlutnah a saii uh. Sadingnah hmueih khaw, uemonah hmueih khaw a nawn uh. 57 Bawkim kah a hmaiben te sui rhuisam neh, photling ca neh, a cam uh. 58 Pilnam taengah omngaihnah a lek koek om tih, Gentile rhoek loh yah a bai te khaw a khoe uh.

59 Te vaengah Judas neh amah boeinaphung khaw, Israel rhaengpuei khaw, amah tekah khoning neh, khohnin ah tah hmueihtuk nawnnah te a poek uh tih omngaih kohoenah te hnin rhet khuiah a bul uh. Te te Chilve hla hnin kul hnin nga vaengah a tong uh.

60 Amah te vaengkah a tue ah Zion tlang te khaw vongtung a sang neh a thung uh tih a kaepvai boeih ah hnuk vaengkah bangla Gentile rhoek ha lo vetih tilnoi ve a ti dongah rhaltoeng im a sak uh. 61 Judas loh te te aka tawt hamla rhaltawt khaw a khueh. Te te aka tawt hamal Bethzur ah khaw a cak la a saii. Te dongah Idumea rhalvang kah pilnam tah a cakrhuet la om uh.

<- Makkabi Cabu Pakhat Nah 3Makkabi Cabu Pakhat Nah 5 ->