1 Kum ya sawmrhuk kum vaengah Antiokus capa Alexander Epiphnes tah cet tih Ptolemais te a loh. Anih te a doe uh dongah pahoi a uk. 2 Te te manghai Demetrius loh a yaak vaengah anih te caemtloeknah neh doe hamla rhalkap muep a coi tih a khoong puei. 3 Demetrius loh Jonathan taengah rhoepnah ol a pat nih a thangpom. 4 Amah long tah, “Alexander loh kaimih lakah a saii hlanah, rhoepnah ka saii lamhma eh. 5 Anih soah a manuca rhoek so neh, a namtu soah boethae ka saii boeih te poek pueng coi ni,” a ti. 6 Te dongah Demetrius loh Jonathan te rhalkap a khueh ham khaw, lungpokhaica a pom ham khaw, amah rhalkap neh a pongpa ham khaw khuehnah ham anaa a paek. Te phoeiah rhalmah im kah saldong rhoek te hlah pah ham khaw ol a paek bal.

7 Jonathan te Jerusalem la cet tih rhalmah im ah pilnam pum kah a yaak hamla ca te a tae pah. 8 Mahai loh anih te rhalkap koep khueh ham anaa a paek tila a yaak uh vaeng let uh akcuek. 9 Tedae rhalmah im kah tamna te Jonathan taengla a hlah pa tih a manu napa taengla mael uh.

10 Jonathan loh Jerusalem ah omnah a loh tih khopuei sak ham neh thoh hamla a tong. 11 Vongtung aka sa rhoek te khaw amah loh rhep a taem tih, Zion tlang te khaw hinboeng lung neh boeih a tung. A then la a cak sak a tinah bangla a saii uh van.

12 Te vaengah Bacchides loh a sak hmuencak ah aka om kholong rhoek tah yong uh. 13 Amih loh a imhmuen te a caetak tih amah khohmuen la mael uh. 14 Olkhueng neh olpaek aka hnawt rhoek bueng te Bethzur ah om tih yingnah hmuen la a khueh uh.

15 Demetrius loh Jonathan taenga olkhueh neh ca a pat te manghai Alexander loh a yaak. Jonathan neh a boeinaphung loh caem a tloek te khaw, rhalthen neh bi a sai te khaw, khodaeng patang a ueh te khaw a yaak. 16 Te dongah, “Amih bangla a tloe om m'hmuh aya? Ha lo, anih te mah paya neh huitai la khueh sih,” a ti. 17 Te dongah a dangkah ol he ca neh a daek tih a pat.

18 Manghai Alexander loh a manuca Jonathan te kut kan tuuk. 19 Na kawng te ka yaak uh vaengah hlangrhal hlang tlung la na om dongah kamih paya la na om ham tueng pai. 20 Te dongah tihnin ah nang he na namnu kah khosoih boei la kan tuek coeng. Nang tah manghai paya lam khaw ng'khue saeh. Ka kaep ah rhep ngol lamtah mamih kah payanah he khoem sih,” a ti nah. Anih te daidi hnikul neh sui rhuisam te khaw pahoi a pat.

21 Te dongah a cim himbai te Jonathan loh kum ya hlai rhuk kah dap im khotue vaengah a bai. Rhalkap khaw koep a khueh tih a coihpawk la pumcumnah neh a thoeihcam. 22 Demetrius loh a yaak vaengah a kothae tih, 23 “Kaimih tah balae ka saii van coeng he? Alexander tah Judah rhoek paya la koilawnah dongah kaimih lakah lamhma tih a thaom coeng. 24 Amih te ca ka pat sih lamtah ol neh thaphohnah khaw, amih tangpomnah olkhueh neh ka pat van eh. Te daengah ni amih kah bomnah ka dang eh? a ti. 25 Te dongah a dangkah olka neh amih taengah ol a pat.

Manghai Demetrius loh Judah namtu boeih te kut kan tuuk. 26 Nangmih neh kaimih laklo kah kotluepnah na khoem parhi te, kamih neh paya la om khaw phat cak ngawn. Kaimih kah rhal ben ah khaw na pai ngawn pawt te ka yaak uh dongah ka omngaih uh. 27 Kaimih soah tangnah khaw phat khueh ngawn. Kaimih soah na saii uh te hnothen nen kan thung uh bitni. 28 Nangmih te loeihnah neh kutdoe khaw muep kan paek uh van bitni.

29 Kai loh Judah boeih te cawn neh lungkaeh mangmu khaw, rhuisam kutthoh a paek ham koi te kan loeih sak coeng. 30 Canghum pathum ah pakhat te khaw, thingthaih rhak thuem ka loh te khaw tihnin lamloh phat kan loeih sak coeng. Te boeih te tah Judah lamkah te a paeng pathum Samaria neh Galile lamkah khaw tihnin neh a voelvai due ka coi voel mahpawh. 31 Jeru salem eh a khuikah boeih he khaw hmuencim la a om dongah mangmu khaw ka loeih sak. Parha pakhat boeih khaw amah Jerusalem hamla om saeh. 32 Jerusalem kah rhalmah im ka tuuk te khaw ka hlah tih khosoih boei kut ah ka paek coeng. Te dongah amah loh te te aka tawt ham amah ngaih te tuek saeh. 33 Judah lamloh ka ram khuiah la a khuen tamna boeih te a phu thui muehla ka hlah coeng. Boiva dongkah mangmu te khaw langya la boeih ka hnawt coeng.

34 Khotue boeih neh Sabbath vaengah khaw, hla sae ah khaw, a tue a khueh hnin ah khaw, khotue hlanah hnin thum, khotue phoeiah hnin thum tah ka ram khuikah Judah hlang boeih hamla bihoep neh duemnah hnin la om saeh. 35 Amih taeng lamkah te mebang hno dongah khaw, mebang ol dongah khaw a mangkhak la hoe ham saithainah khueh boel saeh. 36 Manghai rhalkap dongah he Judah hlang thawng sawmthum thum van saeh. Amih kah a thapang te khaw manghai rhalkap kah bangla a paek van ni. 37 Amih khuikah a ngen tah manghai kah hmuencak ah a khueh vetih a ngen tah manghai loh a uepnah hmuen ah a khueh ni. A rhalboei neh a rhoiboei khaw mah khuikah la om saeh. Manghai loh Judah khohmuen ham ol a paek vanbangla amah olkhueng bangla khosa uh saeh.

38 Samaria khohmuen lamkah paeng pathum tah Judea taengla ka thapnah coeng. Te rhoek te Judah kah ngancawn la om saeh lamtah mawtkung pakhat neh khosoih boei kah anaa phoei tah a tloe ol te ngai boel saeh. 39 Plolemais neh a khoyun boeih te Jerusalem kah hmuencim dongah kutdoe la kan paek. 40 A tuengta hmuen lamkah manghai mangmu te khaw kum takuem cak shekel thawng hlai nga te kan paek ni. 41 Te phoeiah lamhma kum ah barhan bibikung rhoek paek dongkah aka coih boeih te bawkim kah bibinah dongkah ham ka paek pawn ni. 42 Kum takuem bawkim bibinah dong lamkah a hmuh tih ka dang tangka shekel thawng nga te khaw ka hlah pawn ni. Te tah bibikung khosoih ka a hut pawn ni. 43 Manghai kah tangka a ba tih, laiba a khueh, pinyennah khat khat dongah Jerusalem kah bawkim la aka kuep boeih te khaw ka hlah pah coeng. Ka ram khuiah amih kah koerhang aka om te tah amih taengah ka hlah pah coeng.

44 Bawkim koep thoh ham neh sak ham vaengkah a phu te khaw manghai mangmu dongkah ka hnonah pawn ni. 45 Jerusalem vongtung koep sak vaengkah neh, a kaepvai bingbo vaengkah khaw, Judea vungtung koep sak vaengkah a phu khaw manghai mangu dongah kah ni ka hnona eh,” a ti nah.

46 Demetrius loh Israel soah boethae a saii tih amih te mat a hnaemtaek aih dongah, he ol he Jonathan neh pilnam loh a yaak vaengah a tangnah moenih. 47 Alexander kah ol te ni a tangnah. Anih long tah amih taengah lamhma loh rhoepnah ol a thui. Te dongah amih te amah tue khuiah tah patai la phat a khueh uh.

48 Mangah Alexander long khaw caem muep a hueh tih Demetrius te a rhaeh thil coeng. 49 Manghai rhoi te caemtloeknah neh hum uh rhoi tih Demertrius kah rhalkap rhoek muep yong uh. Te dongah Alexander loh anih te a hloem tih a rhalkap te khaw a thup pah. 50 Khomik a tlak duela caemtloek neh a hnah tih amah khohnin ah Demetrius te cungku.

51 Alexander loh a dangkah olka bangla Egypt manghai Ptolemy taengah laipai a tueih. 52 Ka ram la ka mael tih a pa rhoek kah ngolhmuen ka loh parhi te, ka ukknah khaw ka thoh coeng, Demetrius khaw ka phop tih ka ram taerhainah khaw ka dang coeng. 53 Anih te caemtloeknah neh ka hum uh vaengah kaimih loh anih neh a rhalkap rhoek khaw ka neet uh coeng. Te dongah ram khuikah a ngolkhoel dongah ka ngolhmuen ka loh coeng. 54 Te dongah khat neh khat he paya la om pawn sih. Na canu kah kai yuu la m'pae lamtah, nang kah cava la ka om eh. Anih ham neh nang ham khaw kutdoe kan pae sae lamtah na rhaenghmuen te khoem saeh,” a ti nah.

55 Te dongah Ptolemy manghai loh a lan tih, “Na pa rhoek kah khohmuen la na mael tih, a ram kah ngolhoel dongah na ngolhmuen na loh te omngaihnah khohnin pawn ni. 56 Na capa dongkah bangla nang ka saii pawn ni. Tedae kai neh Ptolemais hmu uh rhoi sih lamtah khat neh khat hum uh rhoi sih. Te vaengah na thui bangla na masae la ka om bitni,” a ti nah.

57 Te dongah Ptolemy te Egypt lamloh hlah uh tih a canu Kleopatra te a khuen. Kum ya sawmrhuk kum nit vaengah Ptolemais te a pha. 58 Manghai Alexander loh anih te doe tih, a canu Kleopatra te a yuunah hamla Jonathan taengah a paek. Yulonah te khaw manghai kah a saii noek bangla Ptolemais ah omthen tangkik la a saii uh.

59 Jonathan te a taengla cet tih amah neh hum uh hamla Alexander loh Jonathan hamla ca a pat. 60 Te dongah a suibai neh thoeih tih manghai rhoi neh hum uh hamla Ptolemais la cet. Amih rhoi neh a paya rhoek te cak khaw, sui khaw, kutdoe khaw muep a paek tih amih taengah maelmaithen a dang. 61 Israel khuikah bunoih rhoek neh hnukpoh rhoek te tung tingtun uh tih a taengah Jonathan te a thuithet uh. Tedae amih te ngaiyaknah pawh. 62 Jonathan kan himbai te pit tih daidi himbai bai sak ham ol a paek dongah a thui bangla a saii uh. 63 Manghai loh anih amah taengah a ngol sak tih a boei rhoek te, “Khopuei tollung ah cet uh lam tah hoe uh laeh, mebang olka dongah khaw saeh anih tolhpaelnah he hang khuen uh boel saeh, mebang poeknah nen khaw anih he thinngan la khueh boel saeh,” a ti nah. 64 Thangpomnah a paek te khaw, olhoenah a khueh pah te khaw tholh aka pael rhoek a hmuh vaengah amamih vik yong uh. 65 Manghai loh anih te a thangpom phoeiah paya a tanglue la a khueh. Jonathan te amah paengah tah rhalboel neh khoboei a len la a khueh. 66 Te dongah Jonathan tah omngaih ngaimong neh Jerusalem la mael.

67 Kum ya sawmrhuk kum nga vaengah tah Demetrius capa Demetrius tah Greek tuisanglak lamloh a napa khohmuen la koep mael. 68 Te te manghai Alexandar loh a yaak vaengah ngaihlih tangkik neh Antiok mael. 69 Demetrius loh Apollonius te Coelesyria kah khoboei la a khueh. Te phoeiha caem te muep a hueh tih Jaminia te a rhaeh thil. Te phoeiah a dang kah ol he khosoih Jonathan taengla a pai.

70 Nang bueng loh kai nan tlai thil. Nang kongdongah nueibu kamrhing la ka om tih yah ka poh. Balae tih tlangah anaa na khueh neh kan nan tloelh? 71 Na rhalkap te na uepnah atah kolvan la rhum lamtah kai neh hum uh rhoi sih. Teah te khat neh thadueng noek uh rhoi sih. Kamah ngawn tah khopuei kah thaomnah khaw ka khueh. 72 Kai he u lae tih khaw dawt lamtah, a tloe loh kai m'bom khaw na ming bitni. Napa rhoek khaw amah khohmuen ah tih hnavoei ka tloek coeng. 73 Kolvan ah khaw tah kai nan oel tloel pawn ni. Ka marhang caem neh caempuei khaw kolvan ah om. Teah tah na paluet ham lungto neh na yongnah hmuen khaw a om moenih,” a ti nah.

74 Apollonius kah ol te Jonathan loh a yaak vaengah tah a mueihla a cahoeh pah coeng. Te dongah hlang thawngrha te a coelh tih Jerusalem lamloh hlah uh. Te vaengah a manuca Simon khaw anih bom hamla a caeh pah. 75 Joppa hmai rhaeh uh dae pilnam loh khopuei vongka khoep a khaih. 76 Te dongah te khopuei te koe a tloek uh. Khopuei pilnam long khaw a rhih dongah vongka a ong pah.

77 Apollonius loh a yaak vaengah tah marhang caem thawngthum te a coi tih a caempuei neh Azotus ah ka cet eh a ti bangla cet. Amah te vaengah kolvan la ana lamhma coeng. Kolvan kah marhang caem a khueh te a uepnah mangkang dongah. 78 Jonathan loh anih te Azotus hil a hloem tih caemtloek neh a tintah. 79 Te vaengah Apollonius loh a marhangcaem te a hnukah a huep la a khueh. 80 A hnuk long hlang a rhongngol uh te Jonathan loh a ming. A rhalkap te a kaepvai long a vael tih mincang lamloh khothun due vaan la palaa a kah uh. 81 Tedae hlang rhoek te Jonathan kah olpaek bangla khak a pai uh dongah a rhal kah marhang khaw boeih a bong pah.

82 Te vaengah Simon loh a rhalkap te a thoeih puei tih, caembong rhoek te a paan. Te vaengah rhalkah marhang tah boeih bong coeng. Amih te tawnba uh coeng tih boeih yong uh. 83 Marhang caem khaw kolvan ah phathaeng phayang la om uh. Azotus la yong uh a daemnah hamla mueirhol bawkim Bethdagon khuila kun uh. 84 Tedae Jonathan loh Azotus neh a kaepvai khopuei te a hlup pah ti a poel a yoe. 85 Te vaengah tumca dongkah aka cungku khaw, a hing la a hoeh khaw hlang mi he thawng rhet lo.

86 Jonathan loh Askalon te khaw a rhaeh thil dae khopuei pilnam te cet tih anih kholumlawk tangkik la a doe uh.

87 Amah a taengkah rhoek khaw Jerusalem la kutbuem neh muep mael uh. 88 Te te manghai Alexander loh a yaak vaengah Jonathan te ta-aep a thangpom. 89 Anih ham te sui lamko a pat pah. Te bang te manghai kah huiko ni a dawk a paek. Te phoeiah anih te Ekron neh a kaepvai boeih te amah khohut la a paek.

<- Makkabi Cabu Pakhat Nah 9Makkabi Cabu Pakhat Nah 11 ->