1 Solomon manghai a om vaengah Israel pum soah manghai. 2 Te vaengah anih kah mangpa rhoek he, khosoih Zadok capa Azariah, 3 Cadaek Shisha ca rhoi Elihoreph neh Ahijah, khokhan aka khoem Ahilud capa Jehoshaphat, 4 Caempuei sokah Jehoiada capa Benaiah neh khosoih Zadok neh Abiathar, 5 A sola aka pai Nathan capa Azariah, manghai kah olrhoep khosoih Nathan capa Zebud, 6 Im hman kah Ahishar neh saldong sokah Abda capa Adoniram,

7 Solomon taengah Israel pum yueng la aka pai rhoek he hlai nit lo tih manghai neh a imkhui te a cangbam uh. Cangbam ham te kum khat khui hla khat ah pakhat a om pah. 8 Amih ming he Ephraim tlang ah Benhur, 9 Makaz, Shaalbim, Bethshemesh neh Elonbeth ah Deker capa, 10 A taengkah Arubboth, Sokoh neh Hepher khohmuen pum ah Hesed capa, 11 Dore khamyai pum ah Abinadab capa. Solomon canu Taphath te anih kah yuu la om. 12 Taanakh, Megiddo neh Bethshan boeih, tekah hmatoeng Zarethan kungdak kah Jezreel hil, Bethshan lamloh Abelmeholah hil, rhalvangan kah Jokmeam hil he Ahilud capa Baana, 13 Ramothgilead ah Geber capa tih, Gilead ah Manasseh capa Jair kah vangca rhoek he khaw anih kah, Bashan ah Argob paeng, vongtung puei neh rhohum thohkalh khopuei sawmrhuk khaw anih kah, 14 Mahanaim ah Iddo capa Ahinadab, 15 Naphtali ah Ahimaaz tih, anih long khaw Solomon canu Basemath te a yuu la a loh. 16 Asher neh Bealoth ah Hushai capa Baana, 17 Issakhar ah Paruah capa Jehoshaphat, 18 Benjamin ah Ela capa Shimei, 19 Gilead khohmuen, Amori manghai Sihon neh Bashan manghai Oga khohmuen ah Uri capa Geber tih khohmuen pakhat ah khohung pakhat om.

20 Judah neh Israel he a hlangmi lamtah tuipuei kah laivin bangla ping uh tih a caak, a ok neh a kohoe. 21 Sue 15.18; 2Kh 9.26Solomon long he Philisti khohmuen kah tuiva lamloh Egypt khorhi duela ram tom te a taemrhai. Khocang te a khuen uh tih a hing tue khuiah Solomon taengah thotat uh.

22 Te vaengah hnin at dongkah Solomon kah a caak he, vaidam kore sawmthum neh buh kore sawmrhuk lo. 23 Saelhung pumlen pumrha, saelhung luemdawn pumkul, boiva yakhat, rhangrhaeh neh kirhang khaw, sayuk neh vathawt a thapaduek khaw om pueng. 24 Tiphsah lamloh tuiva rhalvangan boeih neh Gaza hil, tuiva rhalvangan kah manghai boeih te khaw a taemrhai. Te vaengah rhoepnah te anih ham kaepvai kah a rhalvangan boeih ah om. 25 Judah neh Israel kah hlang he Solomon tue khuiah tah Dan lamloh Beersheba hil amah misur hmui neh a thaibu hmuiah ngaikhuek la kho a sak. 26 1Mg 10.26; 2Kh 1.14; 9.25Solomon taengah a ngoldoelh ham marhang im thawng sawmli neh marhang caem thawng hlai nit om. 27 Te rhoek loh manghai Solomon te a cangbam uh tih a pai puei uh. Amah hla khat ah hlang pakhat neh manghai Solomon kah caboei taengla aka mop boeih khaw hnopai neh mueh uh pawh. 28 Marhang ham neh leng marhang ham cangtun neh cangkong khaw, hlang loh amah kah hamsum bangla a om nah hmuen la pahoi a thak uh coeng.

29 Pathen loh Solomon te cueihnah a paek dongah a lungcuei khaw muep ping. Te vaengah lungbuei te tuipuei tuikaeng kah laivin bangla a daang a ka pah. 30 Solomon kah cueihnah tah khothoeng ca boeih kah cueihnah lakah khaw, Egypt kah cueihnah cungkuem lakah khaw yet. 31 Tgt 89Hlang boeih lakah khaw, Mahol koca rhoek Ethan, Ezrakhi, Heman neh Khalkol, Darda lakah khaw cueih. Te dongah khotaeng namtom boeih taengah khaw a ming om.

32 Olc 1.1; 10.1; 25.1; Sol 1.1Thuidoeknah thawng thum a thui tih a laa khaw thawng khat panga om. 33 Thingkung te Lebanon kah lamphai lamloh pangbueng lamkah aka poe pumpiding hil khaw a thui. Rhamsa kawng neh vaa kawng khaw, rhulcai kawng neh nga kawng khaw a thui. 34 A cueihnah te a yaak uh vaengah pilnam cungkuem lamlong khaw, diklai manghai boeih lamlong khaw Solomon kah cueihnah te hnatun ham a paan uh.

<- 1 MANGHAI 31 MANGHAI 5 ->