1 Persia manghai Cyrus kah a kum khat nah dongah tah Jeremiah ka dong lamkah Boeipa ol aka thoeng te soep. 2 Boeipa loh Persia manghai Cyrus kah mueihla te a cahoeh pah. Te dongah a ram tom ah olhoenah a khueh tih a daek pah.

3 Persian manghai Cyrus tah Isarael kah Boeipa, Khohni Boeipa loh diklai pum kah manghai la kai n'khueh coeng. 4 Judaea kah Jerusalem kah im pakhat sak hamla ol m'paek coeng. 5 Pakhat khaw a pilnam la aka om boeih tah Boeipa te a Boeipai la om saeh lamtah a taengah om puei saeh. Anih te Judaea kah Jerusalem la caeh sak saeh lamtah Israel Boeipa kah im te sa saeh. Amah tah Jerusalem ah aka om Boeipa pai ni. 6 Te dongah Khotom rhali kah aka om boeih long khaw, amah kho ham tah sui neh, cak neh rhip bom uh saeh. 7 Kutdoe nen khaw, marhang nen khaw, saelhung neh khaw, te phoeiah Jerusalem kah Boeipa im ham olhlo nen khaw ka thap coeng lah ko,” a ti.

8 Te vaengah Judah imkhui neh Benjamin koca kah a lu khaw pai uh coeng. khosoih rhoek khaw, Levi rhoek khaw, Jerusalem kah Boeipa im aka sa la caeh ham te, Boeipa loh amih kah mueihla boeih a cahoeh pah coeng. 9 Te dongah a kaepvai kah khosak rhoek loh amih te a cungkuem la, cak neh, sui neh, marhang neh, saelhung neh a bom uh. A lungbuei a cahoeh pah rhoek hlangmi khaw a yet dongah a olhlo bangla kutdoe khaw muep yet. 10 Manghai Cyrus long khaw Boeipa im kah umam koep a thak. Te tah Nabuchodonosor loh Jerusalem kah loh tih mueirhol bawkim ah vik a khueh te ni. 11 Te vaengah Persian manghai Cyrus loh te rhoek te a loh tih tangka khoem Methradate kut a paek. 12 Anih long khaw Judaea khoboei Sanabassar kut ah a paek. 13 Te rhoek boeih te a pum la sui boengloeng thawng khat, cakben boengloeng thawng khat, cak tha om pakul pako, sui bunang sawmthum, cak te thawng hnih yali parha neh a tloe baelyak te thawngkhat lo. 14 Te dongah sui neh ca a khuen boeih te thawng nga yali sawm rhuk pako lo. 15 Te tah Sanabassar loh tamna rhoek neh Babylon lamloh Jerusalem la a mael puei.

16 Persian manghai Artaxerxes tue vaengah Belemus, Mithradates, Tablelius, Rathumus, Beeltethum long khaw, cadaekung Samellius neh amih te a bong uh tih Samaria neh a tloe hmuen kah khosa rhoek loh Judaea neh Jurusalem kah kawng te a dangkah bangla ca a pat uh.

17 Cil aka khoem Rathumus khaw, cadaekung Samellius khaw, a tloe khoboei rhoek khaw, Coelesyria neh Phoenicia kah laitloekung rhoek khaw na sal boeih ni.

18 Ka boei manghai taengah khaw mingphanah om pawn saeh. Nang taeng lamloh kaimih taengla aka lo Judah rhoek tah Jerusalem la ha pai uh coeng. Boekoek neh halang tih khopuei thoh ham a saii uh. Hnoyoih hmuen neh vongtung khaw a tlaih uh tih, bawkim kah khoengim khaw a up coeng. 19 Khopuei te a thoh uh tih vong te khaw a khah uh coeng. Mangmu paek ham a aal uh vetih manghai tloelh ham pai uh pawn ni. 20 Te phoeiah he bang hno he bawkim khuila kun tih a kut dongah om uh coeng. He bang he sawtsut ham moenih tila ka poek uh. 21 Te ka manghai boeipa taengah thui ham neh, na ngai ham khaw tueng. Na huem bal atah na pa rhoek kah cabu dongah khaw so nawn. 22 Khokhuencil dongah hekah olka adaek te khaw so nawn. He khopuei he boe a koek uh dongah manghai neh khopuei rhoek a patang sak te khaw ming nawn. 23 Judah rhoek he boekoek rhoek ni, a rhuem tue vaengah khaw rhal la thoo uh. Te dongah ni khopuei khaw imrhong la a yalh sak. 24 Te dongah ni ka boei manghai taengah kan yaak sak. Khopuei te thoh tih vong te a thai la tung koini, tahae lamkah long tah Coelesyria neh Phoenica la pawnhlainah om voel mahpawh,” a ti nah.

25 Te dongah manghai loh Cil aka khoem Rathumus khaw, cadaekung Samellius khaw, a tloe khoboei rhoek khaw, Coelesyria neh Phoenicia kah laitloekung rhoek khaw a dangkah bangla ca koep a pat.

26 Kai ham ca nan pat uh te ka tae ngawn coeng. Te dongah khenah khueh hamla ol ka paek coeng. Te vaengah, khopuei he a rhuem ah khaw manghai taengah boekoeknah a khueh te a hmuh. 27 Boekoek neh rhal la a thoh uh dongah Coelesyria neh Phoenicia aka uk tih mangmu aka lo manghai hlang tlung rhoek loh Jerusalem ah thinsanah a khueh uh. 28 Te dongah ol ka paek coeng lah ko. Khopuei aka sa hlang rhoek te khaw khoep mah uh tih. He ol neh kingkalh pakhat khaw saii pawt ham ngaithuen saeh. 29 Tebang halang bii aka saii rhoek loh manghai te ngae-lawn boel saeh,” a ti.

30 Manghai Artaxerxes kah a capat te a tae van neh, Rathumus, cadaek Samellius, a mih taengkah a rhoi boeih te a marhang neh, pilnam hlangping neh Jerusalem la koeloe thoeih uh tih, imsa rhoek te paa sak ham caemtloekneh rhong a pai. Te dongah Jerusalem bawkim kah a sak uh te khaw Persian manghai Darius kah a manghainah a kumbae hil paa uh.