Matius 5

Lamtua Yesus tui se leten dapa

1 Nikit Yesus net atuil hut mamo nas in maas muid Un ela ka kon, Un saek lako se leten ana mes dapa, le daad se la. Un ima-ii man in huil nal son nas, maas dadani le hii se Una. 2 Hidi kon Un mulai tui oen noan,

Atuil in haup ulat baktetebes sas

(Lukas 6:20-23)

3 “Ulat bating atuil kasiang ngas,

undeng Ama Lamtua Allah esa, man daid Laih banan taung one.

4 Ulat bating atuil in dalen ili ngas,

undeng mam Ama Lamtua Allah esa, man halmui-halmau one.✡

5 Ulat bating atuil man in dalen deng dadale ngas,

undeng mam oen sium totoang hangun, man Ama Lamtua Allah in hid son nas.✡

6 Ulat bating atuil in kom isi le haup Ama Lamtua lalan lolo ka ngas,

undeng mam Ama Lamtua beles asa man oen in komang nas.✡

7 Ulat bating atuil in dalen lila ngas,

undeng mam Ama Lamtua Allah kon tulu Un dalen lila la bel one.

8 Ulat bating atuil man dalen niu ngas,

undeng mam oen siis man net Ama Lamtua Allah.✡

9 Ulat bating atuil man mole-daem atuli ngas,

undeng Ama Lamtua Allah tek noan, ‘Oen nam mo, Auk anang.’

10 Ulat bating atuil in haup susa, undeng muid Ama Lamtua Allah ngas,

ta Ama Lamtua nam, oen Lahin.✡

11 Mi kon ulat, etan atuil didang tao susa-daat saol mia, undeng mi in muid Au ka. Eta oen aa mi dadaat, nol dehet nole-lilung le tao didaan mi ngaal banan na lam, mi kon ulat.✡Petrus mesa la 4:14 12 Elol kon no, mi musti dalen kolo tutungus, undeng mam Ama Lamtua Allah bel seda mi in hapu mamo isi se sorga. Mo nangan ne! Suma mi siim man haup susa-daat ela lo, ta hmunan nu atuli las tao Ama Lamtua Allah mee-baha las dadaat ela kon.”✡Dehet deng Bangsa Israel nol Bangsa Yahuda lalis dua la 36:16; Dehet deng Aan in Nutus sas 7:52

Atuil in muid Lamtua Yesus sa, banansila el sila nol langa ka

(Markus 9:50; Lukas 14:34-35)

13 “Etan kit le tao mingis in kaa mesa lam, kit musti buli sil le. Mi niam kon daid sil se apan-kloma kia. Tiata atuli-atuil in ne apan-kloma ki ngias, nuting mia. Mo eta sila la milu lo son nam, taon elola le un daid milu pait ta? Suma kat soleng lako se lalan, le atuli li kida deng dapa tuun.✡Markus 9:50; Lukas 14:34-35

14 Mi in nuli ka kon musti banansila el hadut ta, le halin nam atuli mamo ngat net nol babanan. Nol un langa ka kon banansila el kota mes ne leten dapa, man atuli li totoang ngat netan na.✡Yuhanis 8:12; 9:5 15 Atuli hoet hadut, hidim tamang lako mul-dale dalen lo. Mo oen todo hadut ta se maan lalapa, le halin laang totoang uma la dalen na.✡Markus 4:21; Lukas 8:16; 11:33 16 Mi in nuli ka kon musti langa ela, le halin atuil tenga las net mi in nuil babanan na. Eta oen net mi in nuil ela ka lam, mam oen naka Ama Lamtua Allah noan, ‘Wuii! Mi Aman in ne sorga ku, muun isi ko!’ ”✡Petrus mesa la 2:12

Lamtua Yesus maa, le tao inu Ama Lamtua Allah atorang ngas

17 “Mi nangan noan, Auk maang se apan-kloma ki le kose soleng Ama Lamtua Allah atorang, man Un beles son se upung Musa ka deken. Nol nataka noan, Auk tiu-hii lo nol Ama Lamtua Allah mee-baha las in tek meman son deng hmunan nua ka deken. Ta Auk in maa nia, le tao nas totoang daid muid asa man oen in dehet meman son na. 18 Undeng na le, hii babanan ne! Eta totoang daid muid Ama Lamtua Allah atorang ngas lo bii kam, apan-dapa ku nol apan-kloma ki bisa dudus lo. Titik-koma mes deng atorang nas kon, kose soleng nalas lo.✡ 19 Atuli kaliut Ama Lamtua atorang nga, undeng un nangan noan, ‘Eh, atorang ni kahan tuun, muik nahin lo!’ Hidim un tui atuil tenga las ela kon nam, mam Ama Lamtua Allah in ne sorga ku, tao un daid atuil ana dui. Mo atuil man daek muid Ama Lamtua Allah atorang ngas totoang, hidim un tui atuil tenga las ela kon na, mam Ama Lamtua Allah tao un daid atuil in muik nahin. 20 Parsai se Au! Eta mi nuil lolo dui deng guru agama las nol atuil Farisi las lo kam, mi tamam nal le daid Ama Lamtua Allah atulin lo.”

Lamtua Yesus tui atuli las le komali nol apa deken

(Lukas 12:57-59)

21 “Mi taan upung Musa atorang man un tek kit upu kia-kaon nas meman son noan, ‘Keo atuil deken, ta asii keo atuli lam, taon elol kon un tom in hukung.’✡Dehet in Puit deng Dale Mesir 20:13; Dehet Ulang deng Lalan in Nuli 5:17 22 Molam Auk le tek elia: komali nol apa deken, ta eta asii komali nol un pail-kakan nas sam, un tom in hukung. Atuil in ngau un palin tamlom un kaka ka, hidim tekan noan, ‘Ku ngengo hinin!’ kam atuling na musti laok taal se blalan-blalan agama las. Nol atuil in ngau un kaka, tamlom un palin na le tekan noan, ‘Ku nuin!’ nam, mam un tom in hukung se ai naraka lua.

23 Tiata eta ku kil in bele, le bel Ama Lamtua Allah, mo ku nangan net noan, ku pail-kakam mes koon-mali nol ku nabale lam, 24 tamang sa-saa in beleng nas deken le. Ku musti laok babanan nol ku pail-kakam ma muna le, hidi halas-sam laok tamang in beleng nas bel Ama Lamtua Allah.

25 Eta atuli le tao dais nol ku lam, banan dui ka ku lalaba laok daem nol un muna. Eta lo kam, mam atuling na kil nol ku lako ngada se atuil in nutus dasi ngas. Hidim atuil in nutus dasi ngas tunang ku lako se polisi las, kon oen tamang ku lako bui dalen. 26 Auk in aa ni tom baktebes! Etan ela son nam, ku daad napiut se bui ka dalen, didiin ku baen nuli ku hningin nas totoang.”

Lamtua Yesus tui atuli li le laok kula nol apa deken

27 “Mi taan upung Musa atorang man noan, ‘Nong deken’ na son.✡ 28 Mo Auk le tek elia: atuil man ngat net bihata mesa, hidim un kom isi le niin nolan el un sapa ka lam, biklobeng na laok kula nol bihatang na ne un dalen na son. Ela kon nol bihata lia. 29 Eta ku tao kula nini ku matam kanan na lam, sukin soleng tuun tia. Ta ku tama sorga nol matam beas mes sii kam banan dui deng, oen soleng ku lako ai naraka lua, nol ku matam beas sas duas tetema.✡ 30 Nol etan ku tao kula nini ku imam kanan na lam, liuh soleng tuun. Ta ku tama sorga nol iman halin sii kam banan dui deng, oen soleng tamang ku lako ai naraka lua, nol ku imam mas duas tetema.”✡

Lamtua Yesus tui le atuil in saap son nas, dai apa deken

(Matius 19:9; Markus 10:11-12; Lukas 16:18)

31 “Mi taan upung Musa atorang nga son, man noan, ‘Atuil in dai soleng un sapa-bihatan na ka, un musti bel surat in dai se bihatang na.’✡Dehet Ulang deng Lalan in Nuli 24:1-4; Matius 19:7; Markus 10:4 32 Mo muid Au lam, elia: bikloeb man dai soleng un sapa-bihatan na, molota un sapa-bihatan na laok kula net lo, mo hidi na kon, bihatang na saap nol atuil didang lolen nam, na banansila el un sapa-bikloben hmunan na, man tao un le nonga. Nol eta biklobe mes saap bihata mes man dai neta, lam, oen duas kon nong apa son na.”✡Matius 19:9; Markus 10:11-12; Lukas 16:18; Korintus mesa la 7:10-11

Lamtua Yesus tui deng nikit in hida

33 “Mi taan upung Musa atorang in bel kit upu kia-kaon nas son, man noan, ‘Eta ku nikit in hida nini Ama Lamtua Allah ngala ka lam, ku butu-kil nol in hida na son.’✡ 34 Mo Auk le tek elia: eta ku nikit in hida kam, nini sumpa deken. Sumpa nini sorga ngala deken, undeng sorga na mo Ama Lamtua Allah maan in dada ka.✡ 35 Sumpa nini apan-kloma ki ngala deken, undeng apan-kloma ki niam mo, Ama Lamtua Allah maan in tian iin na. Nol sumpa nini Yerusalem ngala ka deken, undeng Yerusalem na mo Lahing Tene ka kota.✡ 36 Sumpa nini mi bon nas deken. Ta mi muik kuasa le prenta klanga mes halin daid mitang tamlom muti lo. 37 Tiata eta mi nikit in hida noan, iya lam, tek tuun noan ‘Iya’. Mo eta lo kam, tek tuun noan ‘Loo’. Ta eta mi tek dui deng na nini in sumpa bili-ngala kam, na maa deng uikjale kas son na.”

Lamtua Yesus tui noan balas in daat ta nini daat deken, molam musti lii-lau nol babanan dui pait

(Lukas 6:29-30)

38 “Mi taan upung Musa atorang nga son, man noan, ‘Eta muik atuli in tao didaan ku matam ma kam, tao didaan un mata ka kon. Nol eta muik atuli in tao nahu ku siim ma kam, tao nahu un siin na kon.’✡Dehet in Puit deng Dale Mesir 21:24; Atorang deng Tulu Agama las 24:20; Dehet Ulang deng Lalan in Nuli 19:21 39 Mo Auk le tek elia: balas in daat ta nini daat deken. Eta atuli papas ku pipim halin na lam, nang le un papas ku pipim halin na kon. 40 Eta muik atuli in tao dais nol ku, le noan kat ku kado la lam, bel taplaeng ku kaod metes sa. 41 Eta muik tentara mes dising ku le lep belen sa-saa las katang nga kilu mesa lam, lep napiut belen didiin kilu dua. 42 Eta muik atuli nodan ku sa-saa lam, belen tuun lako. Nol eta muik atuli le nodan tahang ku sa-saa mesa kam, belen lako.”

Lamtua Yesus tui le namnau atuil man kom kit lo ngas

(Lukas 6:27-28, 32-36)

43 “Mi ming atuli tek noan, ‘Namnau ku nenam in namnau ku ngas, mo namnau ku musu las deken.’✡Atorang deng Tulu Agama las 19:18 44 Mo Auk le tek elia: ku musti namnau atuil in kom ku lo ngas. Nol nodan le Ama Lamtua bel hangun se atuil in tao susa-daat saol ku ngas. 45 Eta ku tao ela lam, ku tulu bel noan, ku niam mo Ama in ne sorga ku ana. Undeng Un tao lelo la le langa taung atuil banan nas, nol Un tao lelo la le langa taung atuil daat tas kon. Un kon niung ulan bel atuil in lako-daek muid Un prenta la ngas, leo-leo nol atuil in labang Un prenta la ngas. 46 Tiata eta ku suma namnau atuil man in namnau ku ngas siis sam, ku bali noan Ama Lamtua Allah musti balas ku nini hangun ne? Loo! Ta atuil daat tas kon namnau oen tapan man namnau one ngas. 47 Tiata eta ku suma aa boa-blingin, se ku tapam mas tuun nam, in dui ki asa la? Ta atuil in parsai Ama Lamtua Allah lo ngas kon tao ela. 48 Tiata nangan ne! Ku Amam in ne sorga ku namnau atuli li totoang. Ta ku kon musti daek muid ela!”✡Atorang deng Tulu Agama las 19:2; Dehet Ulang deng Lalan in Nuli 18:13

<- Matius 4 Matius 6 ->