3
Paulus kil Dehet Dais Banan na bel atuil Yahudi lo kas
1 Undeng muding Ama Lamtua Allah in nangan na lam, atuil Yahudi nol atuil Yahudi lo kas muik in bakisan lo, tiata Un nutus au, Paulus, le tek deng Yesus Kristus Dehet Dais Banan na bel mi atuil Yahudi lo, man ne kota Efesus sias. Auk lako-daek auk osa la, didiin auk tamang daid atuil bui son.
2 Mi kon tana noan, Ama Lamtua Allah nutus au, undeng Un le tulu Un dalen banan na bel mia.
3 Meman hmunan nu Ama Lamtua Allah tek atuli li lo bii, deng asa man Un in nutus son bel atuil Yahudi lo kas sa. Mo halas ni, Un tek auk dais na son. Tiata auk dulan dadaen tuun bel mia.
4 Eta mi les hidi son, halas-sam mi kon nangan taan deng asa man Ama Lamtua Allah in kom taung Yesus Kristus sa.
5 Ta hmunan nu, atuli li nangan taan Un in koma ka lo bii. Mo halas ni, Ama Lamtua Allah nini Un Koo Niu ka son, le tek Un in koma ka se Un mee-baha las, nol atuil in nutus sas.
6 Ta deng hmunan nu, Ama Lamtua Allah nutus elia: eta atuil Yahudi lo kas parsai Yesus Kristus Dehet Dais Banan na lam, oen kon tamas nal le daid Ama Lamtua anan, banansila el atuil Yahudi las kon. Undeng na le halas ni kit totoang daid mes son, nol kit leo-leo sium nal hangun deng kit Aman, Ama Lamtua Allah.
7 Ama Lamtua Allah tulu Un dalen banan na nini in huil nal auk le daid Un atulin in nutus. Nol Un kon bel auk Un in kuasa ka, le lako-daek Un osa la na. 8 Deng Ama Lamtua Allah atulin nas totoang, auk niam atuil ana dui. Mo ela kon no, Ama Lamtua huil auk le lako-daek Un os man in muun isi nia. Un in koma ka le, auk tek atuil Yahudi lo kas, deng Kristus dalen in banan isi, man atuli li in nangan hapun lo ka. 9 Ta ninin deng Ama Lamtua Allah in koet apan-kloma kia ka, Un in nangan le bel Kristus maa ka buni-napang nabale. Mo halas ni, Un in tao ka le auk tui-tek atuli li totoang halin oen nangan taan deng Un in koma ka. 10 Lole Un in nangan na nam, taan isi. Nol Un le pake Un atulin nas le tulu Un in tana ka, bel totoang in kuasa nol totoang man in kil prenta se apan-dapa kua ngas. 11 Oras Ama Lamtua Allah koet apan-kloma ki lo bii ka, Un nutus son le sai lalan, halin bel boa-blingin atuli lia. Tiata, Un nini kit Lamtuan, Yesus Kristus, le tao muid ela. 12 Undeng na le, kit man in parsai se Yesus Kristus son nias, lii-tiud in maa aa nol Ama Lamtua bakun na. Ta Un kom le sium kit oras ol tukun.
13 Nangan ne! Auk haup susa-daat undeng auk lii-lau mi atuil Yahudi lo kias. Ela kon no, mi dalen nas daat deken. Undeng auk lepa-haal susa-daat nia, le halin mi man sium in banan na.
Paulus kohe-kanas nodan mamo se Ama Lamtua Allah
14 Auk nangan net Ama Lamtua Allah dalen banan man muun isi ka lam, auk hai bukung ngi le nodan mamo se Una. 15 Ta totoang kit kaak-palin man in parsai ne apan-kloma kia nol in ne sorga nguas Amans sa, mo Un na.
16 Auk kohe-kanas se Ama Lamtua le halin Un bel mi hangun mamo-mamo muid Un dalen man banan isi ka.
Nol auk kon nodan le Un bel mi Un Koo Niu ka nol Un in kuasa ka, halin nam mi dalen nas daid kuat-tes.
17 Undeng mi in parsai napiut se Una ka, tiata auk nodan le Yesus Kristus nuli se mi dalen nas.
Nol auk kon kohe-kanas le mi nuil butu-kil dididi nol Un in namnau ka, banansila el kai man kuat taplaeng, undeng klaput ta dolo tama blatas sa.
✡ 18-19 Auk kon kohe-kanas, le mi nol Ama Lamtua atulin nas totoang, leo-leo taan nal Kristus in neka-namnau, man atuli li sukat hapun lo ka. Ta in neka-namnau na, tene isi, bluang isi, lihu isi, nol mamo isi!
Auk kon kohe-kanas le mi nataka taan Un in neka-namnau ka, didiin in neka-namnau na inu se mi dalen nas nol mi in nuli ka.
✡ 20 Ama Lamtua Allah in kuasa ka muun isi, dui deng totoang man kit in nodan, nol totoang man kit in nangan hapu ngas. Nol Un pake kuasa man muun isi na, le daek se kit dalen nias.
21 Undeng na, maa le kit man in butu-kil nol Yesus Kristus sias, nikit sakeng Un ngala ka lapa-lapa! Naka-nahalit napiut Una, deng halas nia lako lius didiin hidi nutus taan lo. Baktetebes ela!
<- Efesus 2Efesus 4 ->
