Dehet deng Aan in Nutus sas 4

Tulu agama Yahudi las tene-tenen nas haman Petrus nol Yuhanis maas tala

1 Petrus nol Yuhanis nahdeh nabael nol atuil nas sam, atuil tene at ila lo maas. Oen nam tulu agama Yahudi las nol atuil deng partei agama Saduki, nol tulu in doh se Um in Kohe-kanas Tene ka ka. Oen maas le kaen nol Petrus duas Yuhanis. 2 Atuil tene nas komali nol Petrus duas Yuhanis, lole taom oen duas tek atuli las noan, “Yesus nuli pait son deng Un in mate ka! Hidim Un sai lalan bel atuil in mateng ngas, le oen kon haup in nuli pait.”[a] 3 Tiata oen tadu oen atulin nas le laok daek Petrus duas Yuhanis. Mo undeng lelo la le dene son, tiata oen hutun tamang oen duas lakos se bui dalen tuun. Le ola ka halas-sam, nehan oen duas dasi la. 4 Mo deng atuil man kom in ming Petrus duas Yuhanis sas, muik atuli hut mamo hao son noan, asa man oen duas in tui ka, meman tom baktetebes. Undeng na, tiata oen atulin nas mamo keko lako, nataka le atuli lihu lima.

5 Ola ka kon, atuli-atuil tene Yahudi las nakbua se kota Yerusalem. Nas, atuil in kil prenta ngas, blalan-blalan hadat tas, nol guru-guru agama Yahudi las. 6 Nol tulu tene deng agama Yahudi la kon, baab se na. Un ngala ka Hanas. Atuil tene tenga las, el Kayafas, Yuhanis, Aleksander, nol Hanas pail-kakan tenga las kon, baab se na. 7 Nikit oen tamas totoang kon, oen tadu atuli le laok kil nol Petrus duas Yuhanis maa situ-taal se atuil tene nas. Ti Petrus nol Yuhanis tamas kon, oen ketan duas noan, “Taon elola le mi taih banan nal atuling in hlukut-kait ta lia? Mi pake asii kuasa ka? Hidim asii man bel isin, le mi brain tao ela lia?”

8 Kon Ama Lamtua Allah Koo la tao Petrus le brani, ta un siut noan,

“Amas totoang, man daid atuli-atuil tene nol blalan-blalan hadat deng bangsa Israel! Komali deken ta kaim nangan taan amas in keket na isi lo. 9 Tuladang el mi le tao dais nol kami, undeng kaim taih banan atuling hlukut-kait mesa. Hidim mi ketan le kaim pake asii kuasa ka? 10 Tiata auk le siut elia: Amas taon elola ko, nangan net atuling Nasaret man ngala Yesus sa nabale. Un na mo Kristus, man Ama Lamtua tulu meman son lolo hmunan nua. Mo mi pauk tele Un son se kai sangsuli lu dapa. Molam Ama Lamtua Allah belen nuli pait son deng Un in mate ka. Auk in koma ka le amas nol totoang bangsa Israel li tana, noan, kaim taih banan atuling hlukut-kait ta, nini Yesus in kuasa ka. 11 Yesus ni, man oen dulan meman son ne Ama Lamtua Allah Buk Niu ka noan,

‘Muik batu mesa, man tukang ngas nikit soleng son;

mo halas ni baut na daid baut netes.’[b]

12 Papmes apan-kloma kia, Ama Lamtua sai lalan didang lo son, le bel boa-blingin kit deng kit in kula-sala ngas. Suma lalan mes sii, na Yesus. Etan Un lo kam, muik atuil didang pait lo, man bel boa-blingin nal kita.”

13 Atuli-atuil man in daad se la ngas, tana noan Petrus duas Yuhanis nam mo suma atuil ana tuun, tuladang el atuil in dula-les taan lo ka. Mo oen herang-herang nol oen duas in brani ka, undeng oen aa buni-buni lo. Hidim oen tana noan, atuil at dua nas iin mes nol Yesus. 14 Tukun nam oen bahan nas tema, didiin oen aa mamo pait lo son. Dudui pait ta, atuling man banan son deng un in hlukut-kait ta, dil baab se na kon, se oen sila-matan. 15 Tiata oen tadu Yesus anan in nutus at dua nas noan, “Mi putim tahang le!” Hidim oen tek apa le nuting lalan. 16 Oen aa nol apa noan, “Kaka-pali me! Kit musti tao saa nol atuil at dua nias sa? Lole totoang atuil in se Yerusalem mias taan son noan, oen duas man tao taad herang nia. Tiata kit le kaen elol pait ta, muik bukti son nam! 17 Ta in banan dui ka kit nuting lalan, le halin nang dais ni holhising lako se ola-ol deken. Maa le kit tao liing oen duas tukun, le halin oen boel tui dehet deng Yesus Lalan in Nuli ka pait deken. Eta oen ming lo kam, oen taan esan tuun!”

18 Hidi kon oen haman tamang atuil at dua nas pait, le tekas noan, “Doha loo! Mi boel tui atuli las pait deng Yesus lo ka!”

19 Mo Petrus nol Yuhanis situs noan, “Olan amas nangan esan! Ol man banan dui? Muid amas in prenta ka tam, muid Ama Lamtua Allah in prenta ka la? 20 Ta kaim net dasi mamo nol kaim matan esan, nol kaim kon ming dehet mamo son nini kaim hngilan esan. Lam taon elola le kaim tek atuli li deng asa man kaim in ming son nol net son nas lo kia!”

21 Mo atuli-atuil man in daad le nehan dasing nas, kaing ulang oen duas pait. Hidim oen sao aan in nutus at dua nas, undeng oen taan le hukung oen duas elola ka lo. Nol oen kon lii, tamlom mo atuil hut mamo in se likun na ngas, haung keng nol one la. Lole atuil nas naka-naka Ama Lamtua, undeng atuling hlukut-kait ta banan son. 22 (Atuling na hlukut-kait dui deng taun buk aat son, halas-sam un laok nala.)

Lamtua Yesus atulin nas kohe-kanas le halin oen lii deken

23 Nikit oen sao Petrus duas Yuhanis kon, oen duas pait lakos se oen tapan nas. Hidim oen dehet totoang asa man tulu agama Yahudi las, nol blalan-blalan hadat tas in kaing one ka. 24 Ming ela kon, oen duas tapan nas totoang nakbua nol dalen mesa le kohe-kanas noan, “Ama Lamtua Allah man in Kuasa Dudui. Ama man koet apan-dapa kua nol apan-kloma kia, nol isin nas totoang.[c] 25 Hmunan nu Ama Lamtua Koo Niu ka pake upung Daud le daid Ama Lamtua mee-baha. Un tek meman son noan, mam atuli labang nol Yesus. Un kon dul noan:

‘Atuil deng bangsa-bangsa didang komali son undeng dehet hlales-angin;

Oen tao dadahut tuun le tao dais man in muik tula-peke lo ngas.

26 Lahi-laih man in se apan-kloma ki ngias nakbua, le hote-dait labang nol Ama Lamtua;

nol tulu-tulu ngas koo mesa, le lakos labang Ama Lamtua Allah nol Kristus,

Atuling man Ama Lamtua tulu meman son deng hmunan nua ka.’[d]

27 Asa man upung Daud in dula ka, halas ni daid son. Nol un nahin na kon, halas ni daid langa son. Meman se kota ni, laih Herodes nol gubernur Pontius Pilatus, blalan-blalan Israel las, nol tulu-tulu deng bangsa-bangsa didang ngas nakbua son. Hidim oen koo mesa, le labang Yesus, Atuling man Ama Lamtua hulin meman son na.[e] 28 Mo halas ni kit tanan son noan, nas totoang tom nol asa man Ama Lamtua in koma ka, nol muid asa man Ama Lamtua in nutus meman son, deng lolo hmunan nua ka. 29 Ama Lamtua, oen aa liing kami, le halin kaim lii. Tiata, kaim nodan le Ama Lamtua bel kaim in brani. Le halin kaim laok tek Ama Lamtua Dehet Dais Banan deng Yesus sa, bel atuli-atuli las se ola-ola, nol in lii-tidu lo. 30 Nol kaim nodan le Ama Lamtua bel kaim kuasa, le tao banan atuil in ili ngas. Kaim kon nodan kuasa le kaim tao taad in herang bili-ngala, le halin atuli las tana noan, kuaas na maa deng Yesus, Ama Lamtua Atulin in Loka-tadu Niu ka. Ama Lamtua, kaim in kohe-kanas sa pes ela.”

31 Oen kohe-kanas mamaus ela lam, um man oen in nakbua na heheko. Hidim oen totoang haup Ama Lamtua Koo Niu ka. Tiata oen putis le lakos tek Ama Lamtua Allah Dehet Dais Banan na nol in buni-buni lo.

Atuil in parsai ngas nuil leo-leo nol koo-dalen mesa

32 Hidi kon totoang atuil in parsai se Yesus sas koo-dalen mesa, nol oen nuil namnau apa. Muik in kila apa lo, oen kom in bating apa sa-saa. Asa man oen nena kam, oen ator le halin oen pake leo-leo.[f] 33 Hidim Ama Lamtua bel kuasa se Un anan in nutus sas, halin tek atuli las noan, oen net nol matan esa, le Lamtua Yesus nuli pait son deng Un in mate ka. Nol Ama Lamtua beles hangun mamo-mamo. 34-35 Deng atuil nas, muik in hee oen dale kas esan, tamlom mo oen uma las esan. Hidim duit ta oen belen lako se Ama Lamtua atulin in nutus sas, halin oen pake taung in urus atuil hut mamo kas in parlu ngas. Undeng na, tiata oen dabun sa-saa mes lo kon.

36-37 Tuladang el Yusuf, deng nusa Siprus. Un niam mo Lewi in hua-koet. Ama Lamtua atulin in nutus sas ngali un noan, ‘Barnabas’, nahin na noan, ‘atuil in hulung atuil didang le halin makoe’. Un lako hee un dale teb mesa, hidim un duit ta, un laok belen se Ama Lamtua anan in nutus sas.

<- Dehet deng Aan in Nutus sas 3 Dehet deng Aan in Nutus sas 5 ->