1 למנצח בנגינות מזמור לדוד בקראי ענני אלהי צדקי בצר הרחבת לי חנני ושמע תפלתי׃ 2 בני איש עד מה כבודי לכלמה תאהבון ריק תבקשו כזב סלה׃ 3 ודעו כי הפלה יהוה חסיד לו יהוה ישמע בקראי אליו׃ 4 רגזו ואל תחטאו אמרו בלבבכם על משכבכם ודמו סלה׃ 5 זבחו זבחי צדק ובטחו אל יהוה׃ 6 רבים אמרים מי יראנו טוב נסה עלינו אור פניך יהוה׃ 7 נתתה שמחה בלבי מעת דגנם ותירושם רבו׃ 8 בשלום יחדו אשכבה ואישן כי אתה יהוה לבדד לבטח תושיבני׃