1 Merikɨtsɨ tawarita neneutanierixɨani, hikɨ xapa kwikwiekame nekaniuxeiya nehɨxie 'u'enirɨmeme. 2 Niuki tuayame kaneniuta'iwawiya: «¿Ketita petixeiya?» Neta mɨpaɨ nekatinita'eiya: «Xapa kwikwiekame nepɨxeiya 'u'enirɨmeme, tamamata meturuyari tewime 'auxɨwime meturuyari 'atayeume».[a]

3 Hikɨ niuki tuayame mɨpaɨ kanetiniutahɨawe: «'Ikɨ kanihɨkɨtɨni 'axakememɨtepitɨarieni 'inɨariyari naitsarie kwiepa kemɨtitaweni. Kemɨre'uxa mɨkɨ xapatsie, yunaime memɨtenawaya wahetsie katininakimɨkɨ meta memɨte'itawa. 4 'Ayumieme 'ikɨ 'uximatɨarika neputatua mɨtinawaya kiita meutahanikɨ meta yakɨ mɨtikuxata netsihaterɨwatɨ kename yuri 'utaine. Kiitana kaneutahamɨkɨ hikɨ kanika'unamɨkɨ, meta naime 'ikitsaraɨteya meta tenariyari kanika'unamɨkɨ, mɨpaɨ kanaineni Yawé Naimekɨmɨtɨrɨkaɨye».

5 Hikɨ niuki tuayame nehamatɨa mɨtikuxatakai newayani, mɨpaɨ kanetiniutahɨawe: «Keneutanierixɨa kene'a'ɨwiya 'ikɨ matsiɨkɨtɨ mɨratɨa hepaɨtsita».

6 Mɨpaɨ nekatinita'iwawiya: «¿Ketita tihɨkɨ?» Mɨkɨ mɨpaɨ kanetiniuta'eiya: «Mɨkɨ ti'inɨnɨatame kanihɨkɨtɨni xeitewiyari heimana huta rituruyari katiniukanakeni. Mɨkɨ ke'axamemɨte'uyuri kani'inɨariyaritɨni teɨteri naitsarie 'ikɨ kwieyaritsie».

7 Hikɨ kananuti'ɨiyani ti'inɨnɨatame kanamikieya purumu tepɨayarikɨ mɨwewiyakai, mɨkɨ taɨta 'uka pɨyekatei 'a'ukaitɨ. 8 Niuki tuayame mɨpaɨ kaniutayɨni: «'Ikɨ kanihɨkɨtɨni tita 'axamɨti'ane», yapauka tawarita 'uka muwa kaneukataima ti'inɨnɨatameta, hikɨ kanenukanani purumu kanamikiyarikɨ.

9 Tawarita neneutanierixɨani, hikɨ nekaniwaruxeiya nehɨxie yuhutame 'ukari mekanayekɨnekaitɨni yu'anatekɨ me'uwiwetɨ 'ekatsie. Mɨkɨ wa'anate wiuri 'anateya hepaɨ pɨ'anenekai, hikɨ mɨkɨ ti'inɨnɨatame mekanehana 'ekatsie.

10 Ne nenita'iwawiya niuki tuayame nehamatɨa mɨtikuxatakai: «¿Hakewari mepeiha mɨkɨ ti'inɨnɨatame?» 11 Mɨkɨ mɨpaɨ kanetiniuta'eiya: «Wawiruniya paitɨ mekaneihana, tuki muwa metawewiyarienikɨ. Kepauka tuki menɨrieni, muwa ti'inɨnɨatame peutayerieni, 'ɨkayari hetawewiyame mana peuyeyerieni».

<- Tsakariyaxi 4Tsakariyaxi 6 ->