111
1 Yawé kenɨawarieka.
Yawé nepɨnɨawani naimekɨ ne'iyarikɨ meyumɨireme watsata,
heitserie memu'uwa meyuxeɨriekaku wahamatɨa.
2 Yawé 'uximayatsikaya kanimamariwaweni
meta waɨkawa mepuyutemamawie kemɨ'ane mɨkɨkɨ memɨteyɨ'ɨkitɨa.
3 Witsipɨ'anene pɨmamariwawe 'uximayatsikaya,
kemɨtiheitserie yapɨtiyuriene yuheyemekɨ.
4 Yawé, mariwemekɨ yapɨtiuyuri temiku'eriwanikɨ.
Yawé, 'aixɨa pɨtiuka'iyari pɨtiyukanenimaya.
5 Kemɨ'ane memeyemakaxe pɨtiwamikwa,
yutɨratu kemɨtiuwewi yakatine'eriwani.
6 Yuteɨterima yutɨrɨkariya kaniwaruxeiyatsitɨani,
tiwayetuirieka hipame nuiwarite tiwapiinite.
7 'Uximayatsikateya 'aixɨa pɨ'anene, kemɨtiheitserie pɨtiyuriene,
naitɨ 'aitsikaya yuri putiyuane, 'aixɨa pɨ'ane hetsiena temɨtewiyanikɨ,
8 mɨkɨtsɨ yuheyemekɨ kani'ayumiemetɨni,
yuri mainetsie katiniwiyani meta mɨheitserietsie.
9 Kakaɨyari yuteɨterima kaniwaruxɨna,
hikɨ yutɨratu mɨpaɨ katiniuwewieni yuheyemekɨ mieme.
Mɨkɨ mɨpatsie meta mɨtɨrɨkaɨye katinitewaka.
10 Xɨka xewitɨ timaiwetɨ heuyeimɨkɨni ke'itsutɨani Yawé 'ayemakatɨ,
kemɨ'ane 'aitsika memaye'atɨa mekanimatsiɨkɨni, heitseriemekɨ yamekateniyurieka.