Rukaxi 4

Ketsutsi kemɨtiuta'inɨatsie

(Ruk 4:1-13 – Mat 4:1-11, Mar 1:12-13)

1 Merikɨtsɨ, Ketsutsi 'Iyari Mɨtiyupatakɨ hɨnetɨ mana kaneyeyani Kurutani hatuxameyaritsie, meta 'Iyari Mɨtiyupata kaneiwitɨni makumawetsie. 2 Mana huta tewiyari tukari kaniuyurieni, meta kauyumarie kanita'inɨata. Mɨpaɨpaɨmexɨa tukari pɨkatikwakai, hikɨ 'anarike kanekahakamɨkatɨyani.

3 Hikɨ Kauyumarie mɨpaɨ katinitahɨawe:

—Kamɨtsɨ, 'ekɨ xɨka Kakaɨyari penu'ayatɨni, 'ikɨ tete mɨpaɨ ketineutahɨawi, paa payuyeitɨani.

4 Ketsutsi mɨpaɨ katinita'eiya:

—'Utɨarika mɨpaɨ paine: “Tewi xɨka paa xeikɨa kwaka, mɨkɨkɨ pɨka'ayeyurini”.[a]

5 Hikɨ Kauyumarie wapaitɨ heiwitɨka, kwiepa memɨtama wakwie naime kanixeitsitɨani xeinieriyarikɨ.

6 Kauyumarie mɨpaɨ katinitahɨawe:

—Heitserie nepɨmatsipitɨaka 'ikɨ naime hepaɨtsita, yunaitɨ witsimemɨmatekɨhɨawenikɨ nepɨmatsipitɨaka, 'ikɨ naime nekaniyetuiriyarieni, heitserie nepexeiya nemiminikɨ kemɨ'ane mɨnetsinake. 7 'Ayumieme 'ekɨ nenewieri xɨka penetsi'upitɨani, 'ikɨ naitɨ 'apini pɨrayani.

8 Hikɨ Ketsutsi mɨpaɨ katinitahɨawe:

—Kenemie Kauyumarie, 'utɨarika mɨpaɨ paine: “Nenewieri pepipitɨani Ti'aitame 'akakaɨyari, mɨkɨ hɨkɨame xeikɨa pepayexeiyani”.

9 Hikɨ Kauyumarie kaneiwitɨni Kerutsareme, watuki yekɨrita kanenutiwitɨni, mɨpaɨ katinitahɨawe:

—'Ekɨ Kakaɨyari xɨka penu'ayatɨni, 'ena keneukatsuna. 10 'Utɨarika mɨpaɨ paine:

»“Yuhetsɨa miemete niuki tuayamete pɨtiwa'aitɨaka 'ahepaɨtsita memɨmatsi'ɨwiyanikɨ.

Yumamakɨ mepɨmatsituikani,

11 kapa tetetsie pe'uti'ɨkamɨrekɨ”».

12 Ketsutsi mɨpaɨ katinitahɨawe:

—Mɨpaɨ paineta: “Pepɨka'i'itsipaneni Ti'aitame mɨ'akakaɨyari”.

13 Hikɨ Kauyumarie naimekɨ 'ita'inɨataka kaneyani 'ariketa 'ita'inɨatake.

Ketsutsi kemɨtiuyuri Natsaretitsie

14 Merikɨtsɨ Ketsutsi yu'utɨma kaneyeyani Karereya paitɨ, 'Iyari 'itɨrɨkariyakaku, naitsarie kaniutamariwa hepaɨtsitana. 15 Katiniku'ɨkitanekaitɨni tukiteta, hikɨ yunaitɨ 'aixɨa mekatenikuxatakaitɨni hepaɨtsitana.

16 Hikɨ Natsareti kiekariyaritsie kaninuani, matawerixɨtsie, hikɨ kemɨtiyeiyarieyatɨkai, tukita kaneutahani 'uxipiya tukaritsie. Kananukukeni tititerɨwake, 17 hikɨ xapa kaniuhuritɨarieni Kakaɨyari niukieya maye'uxa, Kitsariyaxi kemɨraka'utɨa. 'Itaweraka kanitaxeiya niuki hakewa mɨpaɨ maine:

18 «Ti'aitame 'Iyarieya kaneniuwiya,

Kaneniuhɨritɨani niuki 'aixɨa manuyɨne nemɨwakuxaxatɨwanikɨ tixaɨtɨ memɨkateheuxeiya.

Kaneneyenɨ'ani nemɨwaranayexɨrienikɨ mɨkɨ memɨyuhiwerie yu'iyaritsie, yanemɨtiwatahɨawekɨ mɨkɨ memanutaxɨriya kename me'utixɨnarie,

meta yanemɨtiwatahɨawekɨ mɨkɨ memakɨkɨpe kename me'anutaneniere,

nemɨwaxɨnakɨ mɨkɨ memɨwiyarietɨka,

19 nemɨtikuxatanikɨ kename tukari 'aye'a kepauka Ti'aitame muyuwaɨriya 'aixɨa mɨtatixeiyakɨ».

20 Hikɨ 'itakwikwieka xapa, 'iyetuirieka tiyuparewiwame, mana kanayerɨni ti'ɨkitame 'uwenieyatsie. Yunaitɨ tukita memayetekai kwi mekanixeiyakaitɨni, 21 hikɨ kanitsutɨani mɨpaɨ tiwakuxaxatɨwatɨ: «'Ikɨ tukaritsie kanaye'ani 'ikɨ 'utɨarika kemaine, xe'i'eniekaku xeme».

22 Yunaitɨ mekatenihekɨatakaitɨni me'i'enieka, mekanihɨxiyakaitɨni niuki witsimanuyɨne tetana mayeneikakaikɨ. Mɨpaɨ mekaniutiyuanekaitɨni: «¿'Ikɨ Kutse nu'aya katihɨkɨ?»

23 Mɨpaɨta katiniwarutahɨawe: «Patsɨ yurikɨ xeme 'ikɨ niukiyari xekanenitaxatɨakuni: “Tiyu'uayemawame 'aku, 'akɨmana keneuyu'uayema. Ketemɨte'u'enana Kaperunaume kepemɨreyuri, 'enata 'akiekaritsie yaxeikɨa ketineuyuri”. 24 Tawarita mɨpaɨ kaniutayɨni: Yurikɨ mɨpaɨ nepɨxerahɨawe, nixewitɨ Kakaɨyari niukameya pɨkanaki'eriwa yukiekaritsie. 25 Yuri nepaine, 'Ixaheri kwieyaritsie yumɨiretɨ wiuraxi mekaniu'uwakaitɨni kepauka 'Eriyaxi 'amuyeikakai, kepauka muyuawitsie mɨreunamie haika wiyari heimana 'ataxewi metseri, kepauka haka mutawe naitsarie kwiepa. 26 Mɨkɨ wahetsɨa pɨka'utanɨ'arie 'Eriyaxi nixeime hetsɨa, Tsiruni kwieyaritsie pɨta kaniutanɨ'arieni Tsarepɨta mɨrakutewatsie wiura hetsɨa. 27 Mɨkɨ meta, yumɨiretɨ 'amekaniu'uwakaitɨni 'Ixaheri kwieyaritsie kwiniyakɨ meka'itiyatɨkaitɨ kepauka 'Eritseu 'amuyeikakai Kakaɨyari niukameya, nixewitɨ tɨma pɨka'u'itiya mana kiekatari, tsiriyatanaka pɨta kaniu'itiyani Nahamani titewatɨ».

28 Hikɨ me'i'enieka kemɨtikuxatakai, mekaniuyeha'ani yunaitɨ tukita memayetekai. 29 Me'anuku'uka, kiekaritsie mekaneyeweiya, yemuritsie mekaneihana kiekari hetsiena mawewiyakaitsie, mana tekɨa memekahɨanikɨ. 30 Peru mɨkɨ wahixɨata heutayuneka kaneyani.

Kakaɨyari mɨka'itiya tewi kemɨtiwiyakai

(Ruk 4:31-37 – Mar 1:21-28)

31 Merikɨtsɨ kiekaritsie kaninuani Kaperunaume mɨrakutewatsie Karereya kwieyaritsie, mana 'uxipiya tukaritsie tiniwa'ɨkitɨakaitɨni. 32 Mɨkɨ mekanihɨxiyakaitɨni 'ɨkitsikayakɨ, heitserie hexeiyatɨ mɨtaniukakaikɨ.

33 Hikɨ tukita nayekateitɨni tewi kakaɨyari mɨka'itiya 'iwiyakaku. 34 Karima kaniutahiwa mɨpaɨ 'utaitɨ:

—'Aii, kepetati'uximatɨa Ketsutsi natsaretitanaka. ¿Petatsika'unake kari pepunua? Ne nepɨmatsimate kepemɨpaikɨ: 'Ekɨ pepɨhɨkɨ Kakaɨyaritsie mieme pemɨpatsie.

35 Hikɨ Ketsutsi kanitatieni mɨpaɨ 'utaitɨ:

—Kayuwatɨ. Keneuxɨna mɨkɨ tewi.

'Iya kakaɨyari tewi 'atihɨaka wahixɨapa, kanixɨna katikwinitɨaka.

36 Yunaitɨ mekaniutimamani, meteyukuxaxatɨwatɨ mɨpaɨ mekaniutiyuanekaitɨni: «¿Ke'aneme niuki pexeiya? Heitserie hexeiyatɨ kaniwarutate'ani kakaɨyarixi memɨka'itiyatɨka tɨrɨkariya hexeiyatɨ, mɨkɨta mekaniwatixɨnani». 37 Naitsarie kiekari 'aurie kanikuxaxatsiwakaitɨni, Ketsutsi kemɨtiyurienekai.

Ketsutsi kemɨrenayehɨa Pekuru warɨkaɨya

(Ruk 4:38-43 – Mat 8:14-17, Mar 1:29-38)

38 Merikɨtsɨ tukita wayeyaka Tsimuni kie kaninuani, hikɨ hɨiya yemekɨ kaniwiyakaitɨni Tsimuni warɨkaɨya. Ketsutsi mekaniutawawirieni miparewienikɨ. 39 'Auriena 'utakeka, hɨiya kaniutatieni, hikɨ hɨiya kanihayewa. Yapauka 'anukukeka kaniwarutiparewietɨyani.

40 Hikɨ tau 'akayuneku, yunaitɨ memɨwarexeiyakai tekwikwikate mɨireme kwiniyakɨ memɨtekukuyekai hetsɨana mekaniwa'atɨani, yuxexuime wahetsie 'utimeka 'aixɨa meteheu'eriekame kaniwarayeitɨani. 41 Kakaɨyarixi 'axamemɨ'anene kaniwaruta'aitɨani memɨwatixɨnakɨ yumɨireme memɨtewakwinitɨakai, mɨkɨ mekaniutihiwakaitɨni mɨpaɨ me'utiyuatɨ: «'Ekɨ Kakaɨyari pekaninu'ayatɨni». Peru Ketsutsi warutate'atɨ kakaɨyarixi pɨkawapitɨakai memɨtiniunikɨ memimaikaikɨ kename Kɨritsitu hɨkɨtɨkai heitserie mupitɨarie.

42 Hikɨ 'ukatareku kaneyani teɨteri memɨkahaxuawetsie. Teɨteri yumɨiretɨ mekanikuwautɨwekaitɨni, me'itaxeiyaka mepikuhanakai mɨkaheyeikanikɨri. 43 Peru mɨkɨ matsi mɨpaɨ katiniwarutahɨawe: «Kaneuyeweka hipame kiekaritetsieta niuki 'aixɨa manuyɨne nemɨkuxatanikɨ, kemɨtiyɨni Kakaɨyari ti'aitakaku, peuyewetse nemɨtikuxatanikɨ, 'ayumieme nepeyenɨ'arie». 44 Hikɨ kaniyeweiyakaitɨni tikuxatanetɨ huriyutsixi watukiteta.

<- Rukaxi 3 Rukaxi 5 ->