1 Kepaukari Kutsuhexi waɨkawa mu'ukiratsitɨkai Yawé mɨpaɨ katinitahɨawe: «Waɨkawa pekani'ukiratsitɨniri, teɨteri 'akuxi waɨkawa mekaniyuhayewatɨweni pemɨwara'iwakɨ. 2 Piritsiteutsixi, ketsureutsixi wakwie nekanixatani, 3 Tsikuxi 'akiyaritsie mɨye'atɨka 'Ekipitu kwieyari maka'atɨka, 'Ekuruni kwieyari maka'atɨkatsie paitɨ kaniye'atɨkani. Mɨkɨ mɨpaɨ katinimatiwani kananeutsixi wakwie, mɨkɨ kwieyaritsie yu'auxɨwitɨ te'aitamete mekanititeni piritsiteutsixi: Kahatsa kiekame, 'Atsiruri kiekame, 'Atsikaruni kiekame, Kahati kiekame meta 'Ekuruni kiekame. Yaxeikɨata 'aweutsixi wakwietsie xemɨye'axɨani kaneuyeweka. 4 Mɨkɨ wahetɨa Kananeutsixi wakwie kaniyuhayewaneni, 'Araki tsiruniyutsixi wakwieyaritsie ye'atɨkaitɨ, 'Apeki paitɨ, Tsiruni ye'atɨkaitɨ, 'amuxeutsixi wakwie manuye'atɨkatsie. 5 Yaxeikɨatsiere kaniyuhayewaneni Kewari kiekatari wakwie, Riwanu kwieyari yemuri wariepaitɨ metatsiere Wahari-Kahari, hɨritɨa Heximuni mɨtitewa, metatsiere Rewu-Kamati mɨrakutewatsie paitɨ. 6 Netɨtɨ nepuwataweiya 'ixaheritsixi wahɨxie yunaime Tsiruni kiekatari meta keyupaɨmetɨ hɨritsie memu'uwa, Riwanu paitɨ meta Mitsireputi-Mahini paitɨ.

»'Ekɨri Kutsuhexi, yayeyeume pekaniwayetuiriemɨkɨ 'ikɨ kwie 'ixaheritsixi mɨtiwapiinitɨnikɨ kenematiuta'aitɨa wahetsiemieme. 7 Kanaye'aniri pemɨwayetuirienitsie kwie 'atanauka nuiwari wahetsiemieme memuyuhayewatɨwe meta hixɨapa me'atɨ Manatsexi xiɨyarimama».

8 Hipatɨ Manatsexi nuiwarimama hixɨata me'atɨ, Xuweni meta Kahari wanuiwarima, kwie mekaniyetuiriyariekaitɨniri Muitsexi Yawé ti'uximayatsiriwame, kaniwaruxatɨakaitɨniri meripaitɨ. 9 'Aruhexi paitɨ kaniye'atɨkani wakwie, 'Axinuni 'akiyaritsie 'Aruhexi kiekari pɨyemakai meta kiekari mayeweritsie hixɨapa pɨyemakai. Metatsiere kaniwakwietɨkaitɨni hɨri manaweri Merewa mɨtitewa metatsiere Riwuni, 10 naitɨ Tsikuni kiekariteya ―'amuxeutsixi mɨtiwa'aitɨwametɨkai mɨti'aitakai Hetsiwuni paitɨ 'ukaitɨ―, 'amunitsixi wakwie manuye'atɨkapaitɨ. 11 Karaha kaniye'atɨkateitɨni, teɨteri Ketsuxi kiekatari meta Mahaka kiekariyaritsie, naitɨ Heximuni hɨriyari meta Watsani meta Tsarikaha kwieyaritsie paitɨ. 12 Mɨkɨ kwie 'Uhuki katinipiinieyatɨkaitɨni, ti'aitame Watsani kwieyaritsie, 'Atsitaruti meta 'Erurehi kiekariyaritsie pɨtiuta'aitaxɨ, 'imatɨriekari mieme xepahitsixi tewiyari pɨhɨkɨtɨkai, Muitsexi muwaruka'unaxɨ meta mɨwarayewei mɨkɨ kwieyaritsie. 13 Peru 'ixaheritsixi Ketsuxi meta Mahaka kiekatari mepɨkawarayewei, hikɨ 'akuxi wakwietsie mekaniu'uwani.

14 Peru Muitsexi Rewi xiɨyarimama kwie pɨkawayetuiri, Yawé teɨterimama 'imikieri memɨyetuayakaikɨ mawari wewiwamete mɨtiwa hetsiemiemetɨkai, 'ixaheri Kakaɨyarieya, mɨkɨ kemɨtiwarutahɨawekai.

15 'Ikɨ kwie kanihɨkɨtɨni Muitsexi yuxexuime Xuweni nuiwarimama mɨwayetuiri: 16 'Aruhexi tsutɨtɨ kaniye'atɨkateitɨni, 'Axinuni 'akiyari manuyeka 'anutaɨye mukumakai, kiekari mexeiyakai mayeweritsie. 'Ikɨta hɨri manaweri Merewa kanihɨkɨtɨni 17 Hetsiwuni paitɨ meta naitɨ kiekarite manaweritsie mieme: Riwuni, Wamuti-Wahari, Weti-Wahari-Mekuni, 18 Yahatsa, Karemuti, Mepati, 19 Kiriyatahini, Tsiwima, Tsareti-Tsakaxi yemuri mayeweri mukatsie mukuma, 20 Weti-Pehuxi, Weti-Yetsimuti meta kɨatsata Pitsikaha yemuriyaritsie, 21 tatsɨari kiekarite meta 'etsimɨyeyeu manaweritsie mieme, meta naitɨ hakewa Tsikuni mɨre'aitakai ti'aitame 'amuxeu tewiyari Hetsiwuni mɨti'aitakai. Muitsexi 'ikɨ ti'aitame kana'iwa meta memanuyetei mariyanitsixi, 'Ewi, Xekeni, Tsuxi, Kuxi meta Xewa, yunaitɨ mɨkɨ Tsikuni memɨnɨkai mana memɨkiekataritɨkai. 22 'Ikɨ 'ixaheritsixi yuwaɨkawa mekaniwarukwini yu'ixiparakɨ kepauka memuyukwitɨwekai, metatsiere tiyukewaiyame Warami Wehuxi nu'aya mekaniumieni. 23 Kurutani hatɨayari Xuweni xiɨyarimama wa'inɨari kanayani wakwie manuye'atɨka. Mɨkɨ kiekari meta 'etsimɨyeyeu Xuweni xiɨyarimama wahetsiemieme kanayani kememɨyupaɨmekai.

24 Muitsexi kaniwayetuirienita 'ikɨ kwie Kahari xiɨyarimama kememuyupaɨmekai: 25 Katsexi kwieyari, naitɨ kiekari Karaha kwieyaritsie mukumane meta 'amunitsixi teɨteriyari wakwie hixɨapa'atɨ, meta 'Aruhexi paitɨ Xawaha kiekariyari hɨxie mukuma, 26 meta kwie yu'aurie mukumane Hetsiwuni, Xamati-Mitsipe meta Wetunini, Makanahini kwieyari meta Rewixi kwieyari manuye'atɨka. 27 Mayeweri mekaniyetuiriyarieni Weti-'Arami, Weti-Nimɨra, Tsukuti meta Tsapuni, Tsikuni mɨtiwa'aitɨakai mame, Hetsiwuni kiekariyaritsie mɨti'aitakai. Mɨpaɨ wakwie kaniyeukaitɨni Kurutani 'anutaɨye meta harakuna Kinereti hetɨa paitɨ. 28 'Ikɨ kiekarite mekaniyetuiriyarieni Kahari xiɨyarimama wapiini katinayani, kememɨyupaɨmekai.

29 'Ikɨ kwie kanihɨkɨtɨni Muitsexi Manatsexi xiɨyarimama hixɨata me'akame mɨwayetuiri kememɨyupaɨmekai: 30 wakwie Makanahini meta naitɨ Watsani kwieyari, tatsɨari 'Uhuki mɨra'aitakai naitɨ mɨkɨ kwieyari, yunɨtɨ Yahixi kiekariteya haika tewiyari mɨhɨkɨtɨkai. 31 Meta hixɨata'atɨ Karaha kwieyari, 'Atsitaruti meta 'Erurehi kwieyari, 'Uhuki mɨra'aitakai mɨkɨ Manatsexi nu'aya Makixi xiɨyarimama hixɨata me'atɨ wapiini katinayani, kememɨyupaɨmekai nuiwari.

32 'Ikɨ mepɨhɨkɨ Muitsexi kwie kemɨtiwayetuiri Muhawi makuweri 'ukaitɨ Kurutani hatɨayari 'anutaɨye, Keriku 'anutaɨye tau manatineika hepatsie. 33 Peru Rewi xiɨyarimama Muitsexi kwie pɨkawayetuiri, Yawé, 'Ixaheri Kakaɨyarieya wahetsie mɨmiemetɨkaikɨ, yaxeikɨa mɨkɨ kemɨtiwarahɨawekai.

<- Kutsuhexi 12Kutsuhexi 14 ->