1 Merikɨtsɨ Kura yu'iwama waruku'eirieka kaneyani xaɨtsie paitɨ. Xeime kie kaniutayerɨni Hiraxi titewakame hetsɨa, 'Arurani kiekame hetsɨa. 2 Mana Kura 'uka kaniutiwitɨni Tsua titewakame niweya kananeu tewiyari. Kepauka hamatɨana mukahui 3 mɨkɨ kaniutihukata 'ukitɨme kaniutiniweni, 'Exi katiniterɨwa. 4 'Ariketa hutarieka kaniutihukata 'ukitɨmetsiere kaniutiniweni, 'Unani katiniterɨwa. 5 Tawarita 'arike xeime nunutsi mekanayexeiya 'ukitɨme, Ketsiwi kiekariyaritsie mutinuiwaxɨ, Tseraxi katiniterɨwa.

6 Hikɨ Kura 'uka kaniutawauni Tamaxi titewakame 'Exi, yuniwe 'amɨyumate hetsiemieme. 7 Matsi Yawé pɨka'inakixɨ Kura nu'aya kemɨtiyurienekai, kaninawairieni tukarieya. 8 Hikɨ Kura yuniwe 'Unani mɨpaɨ katiniutahɨawe: «'A'iwa wiuraya keneutiwitɨki, 'aitsika kemaine kwetsikatsiemieme kenaye'atɨa, mɨpaɨ 'amatsika niweya payeneni». 9 Perutsɨ 'Unani pɨtimaikai nu'aya mɨtinuiwakekai nu'aya pɨka'ayanikekai. 'Ayumieme kepauka mikumaɨwakai puyu'ɨwiyakai 'ɨyaya mɨkatihukatanikɨ. Mɨpaɨ pɨtiyurienekai matsikaya nu'aya mɨkatinuiwakɨ. 10 Hikɨ Yawé pɨka'inakixɨ mɨyamɨtiyurienekaikɨ, 'ayumieme yaxeikɨa kanimieni. 11 Merikɨte Kura yumu'e mɨpaɨ pɨtiutahɨawixɨ: «'Apaapa kie pewiuratɨtɨ kene'ahayewani, kepaukake neniwe Tseraxi 'amuyutamani». Peru Kura mɨpaɨ pɨtiku'eriwakai Tseraxi mɨnike pɨ'eriekai, yumatsikama wahepaɨ. Hikɨ Tamaxi kaneyani yupaapa kie mekanikɨ.

12 Hikɨ mɨixa tukari 'anuyeyaku Kura 'ɨyaya kaniumɨnita Tsua niweya. Hikɨ hiwerika hatɨmaiyaka, kaneyani Kura Timinati kiekariyaritsie yumuxatsi waretixinike. Hamikuya kaneiweiya Hiraxi mɨtitewa 'Arurani kiekame. 13 Kepauka Tamaxi mɨretima kename mu'eya Timinati heyakai yumuxatsima wareuximieka, 14 wiura kamixayari kananutihɨna, yɨhɨxie kaneuyukunani kapa xewitɨ heitimanikɨ, kiekari 'Enahini manuyeniere mɨranuyekɨkatɨretsie kanayerɨni, Timinati huyeyari manuyehane kiekari mukumatsie. Mɨpaɨ kaniuyɨni, mɨpaɨ mɨtimaikaikɨ Tseraxi 'amuyumaikaikɨri memɨka'iwitɨtɨawekaiku kɨnaya mayanikɨ.

15 Kepauka Kura heuyuku'eimame muxei, 'uka tuminikɨ muyumayɨinɨa kani'eriekaitɨni. 16 Yumu'e ka'erietɨ hepana kaneyani, mɨpaɨ katinitahɨawe:

—'Ahamatɨa nepɨkahuni pekati'awaɨriya.

'Uka mɨpaɨ katinita'iwawiya:

—¿Tita penetipitɨani, xɨka ne'unewaɨriya?

17 Kura mɨpaɨ katinita'eiya:

—Xeime tsipu nunutsi nepɨmatsihanɨ'airieni nekuraruta mieme.

'Ukata mɨpaɨ katinitahɨawe:

—'Aixɨa kani'aneni. Peru hikɨ mexixi tixaɨtɨ kenetineupitɨa yanemɨtimaikakɨ kename 'aku penetipitɨani.

18 Kura mɨpaɨ katinita'iwawiya:

—¿Ketitakuta pereuyehɨwa nemɨreukapine?

Tamaxi mɨpaɨ katinita'eiya:

—Kena 'atseyu wiwierimakame meta 'a'itsɨ pemakwe'e.

Kura katiniyetuirieni, hamatɨana kaniukahuni, mɨkɨ kanitihukatɨani. 19 Tamaxi kepauka manukuke kaneyani yapauka, yuhɨxie meuyukunakai kaneuyukuyepieni, wiura kamixayari kananakatɨni.

20 'Ariketa Kura tsipu kanenɨ'ani, yuhamiku 'Arurani kiekame kaniutanɨ'ani mɨrewayepinikɨ tita mɨreku'eiriekai, hikɨ hamikuya 'uka pɨkahetaxei. 21 Merikɨte teɨteri mana kiekatari kaniwaruta'iwawiya:

—¿Hakewari 'uka tuminikɨ muyumayɨinɨa 'Enahini kiekame huye tetsita mutiyeixakai?

Mɨkɨ mɨpaɨ mekatenita'eiya:

—'Ena 'ukaratsi muyumayɨinɨa mɨtiwawa yukakaɨyarixi wahetsiemieme matsi pumawe.

22 Hamikuya kanakunuani hakewa Kura meyeikakai, mɨpaɨ katinitahɨawe:

—Nepɨkaheitaxei. Teɨteri mana kiekatari mɨpaɨ mekanaitɨkani, kename mana 'umawe 'ukaratsi mɨpaɨ tiuka'iyaritɨ.

23 Kura mɨpaɨ kaniutayɨni:

—Tsepa mɨrepi nepiinite, ne nepɨkatiu'ita. Heitseriemekɨ pɨtihekɨa teɨteri 'axamemɨkahaitɨkanikɨ nehepaɨtsita: Ne nepeinɨ'airi tsipu, 'ekɨta pepɨkaheitaxei.

24 Haika metseri 'anukayaku, Kura mɨpaɨ katiniutahɨawarieni:

—'Amu'e Tamaxi tuminikɨ muyumayɨinɨa kanayuyeitɨani, mɨyayɨanetɨ kaniutihukata.

Kura mɨpaɨ karima kaniutayɨni:

—Xekenewayehani xekenetataiya.

25 Hikɨ kepauka mɨwayehaniwakai yumu'e hetsɨa xeime kanenɨ'ani mɨpaɨ haineme: «'Ikɨ piinite kutsiyari pɨnetsi'utihukatɨa. Heiwatɨ peheitimani kemɨ'ane 'ikɨ tseyu yuwiwierimakame mukutsiyarieya meta 'ikɨ 'itsɨ».

26 Kura retimaika mɨpaɨ kaniutayɨni: «Ne kenemɨtikamie, matsi mɨkɨ 'aixɨa katinikamieni, ne neniwe Tseraxi nemɨka'iwitɨtɨakɨ». Peru tawarita hamatɨana pɨka'ukahui.

27 Kepauka maye'a mɨtiniwekɨ Tamaxi, yuhutame kaniwarayexeiya. 28 Xewitɨ katinuiwawetɨ 'akuxi, mamaya meri kananeni, hikɨ 'ukaratsi tiniweritsitɨwame, wita xetame mamayatsie kaneitapirieni, mɨpaɨ kaniutayɨni: «'Ikɨ meri kaniutinuiwa». 29 Hikɨ nunutsi yumama kaneutahana, xewitɨ pɨta meri kaniutinuiwa 'iwaya. Hikɨ 'ukaratsi tiniweritsitɨwame mɨpaɨ kaniutayɨni: «Kehepaɨ peretɨa». 'Ayumieme Paretsi mepɨte'iterɨwaxɨ. 30 Mɨkɨ 'utɨaketa 'iwaya kaniutinuiwa, yumamatsie wita xetame meutapiekai, mɨkɨ Tsera mekateniterɨwa.

<- Tsutɨarika 37Tsutɨarika 39 ->