'Etsekieri 21

'Ixipara heitserie mexeiya

1 Yawé mɨpaɨ kanetiniutaxatɨani: 2 «Tewi pemunu'aya, Kerutsareme hepa keneutanieri, watukite hepaɨtsita ketineutaxata meta 'Ixaheri kwieyari hepaɨtsita, 3 mɨpaɨ ketiniwaretaxatɨa mɨpaɨ ne Yawé nekanaineni: “Ne yurikɨ nepɨmatsi'aye'unie. Ne'ixipara nepɨwatihana nepɨwakwini heitserie memexeiya meta 'axamemɨteyurie. 4 Mɨpaɨ nekanaineni nekaniwakwimɨkɨ, 'aixɨa memɨte'u'iyari meta 'axamemɨte'u'iyari, ne'ixipara naitsarie kwiepa yunaime teɨteri kaniwarakukwimɨkɨ, tayetatsie meta tatsutɨa. 5 'Ana mɨpaɨ mepɨtehetimani kename ne, Yawé 'ixipara nehewatiha meta neka'ika'uta painayarita”.

6 »'Ekɨ, tewi pemunu'aya, yunaime wahɨxie 'a'iyaritsie petiuka'eniwatɨ karima keneutatsua. 7 Kepauka memɨmatsita'iwawiya titayari petiutatsuaka, mɨpaɨ ketiniwarutahɨawi pemu'enaxɨkɨ kemɨtiyɨni. 'Ikɨ niuki wa'iyari kanitimariutamɨkɨ, wamamate kanitiweranaxɨamɨkɨ meta watunute naitɨ pɨtiyɨyɨaka. 'Ari tukari kanaye'aximeni. Mɨkɨ yurikɨ katinaniuwani. Ne Yawé mɨpaɨ nekanaineni».

8 Yawé mɨpaɨ kanetiniutaxatɨani: 9 «Tewi pemunu'aya, ketineutaxata kemɨtiyɨni meta ketiniwarutaxatɨa Yawé mɨpaɨ mainekɨ:

»“'Ixipara, 'ixipara,

kanatamɨarieni meta kaniutimerɨkani,

10 pɨxawatɨ mutimerɨkanikɨ

meta patamɨarie mɨtiyumemiwanikɨ.

11 Putamerɨkariyarieri meta patamɨarie,

'aixɨa pɨ'aneri mɨtiyumemiwa mɨkweitɨarienikɨ.

12 »”Tewi pemunu'aya, keneutahiwani keneutatsuakani,

'ikɨ 'ixipara neteɨterima kaniwaraye'unieka

meta 'ixaheritsixi wa'ukiyarima yunaime.

Wahetsiemieme kaneyenɨ'arieni,

meta neteɨterima wahetsiemieme.

'Ayumieme, 'atawitsie keneuyuhutsunani.

13 »”Yawé naimekɨmɨyɨwe mɨpaɨ kanaineni:

14 »”Tewi pemunu'aya, ketinekuxatani ketinehekɨatani petiutapinetɨ,

'ixiparakɨ keyumieneni katihayewatɨ.

Mɨki 'ixiparayari kanihɨkɨtɨni,

yunaime mɨwaraye'unie,

15 wa'iyari mɨmamakakɨ

meta memuyumɨirenikɨ mɨkite.

Kitenieri nekanitikeni

'ixipara mɨtiyumemiwa.

'Ixipara mɨxawatɨ mutimerɨkanikɨ

meta patamɨarie mɨtiyumemiwanikɨ.

16 Keneuyuaneni 'atserieta meta 'a'utata,

meta naitsarie kenewakwineni.

Mataxikaunikɨ keneyumiemeni, 'ixipara mɨtiyumemiwakɨ.

17 Netatsiere xeiya nepɨtikahutsuxɨani nemamakɨ

meta neha'atɨ nepɨtihayewa.

Ne Yawé mɨpaɨ nekanaineni”».

18 Yawé mɨpaɨ kanetiniutaxatɨani: 19 «Tewi pemunu'aya, hutame huye keneutiwewi wahetsɨa mɨye'anikɨ, Wawiruniya ti'aitame 'ixiparaya. 'Ikɨ huta huyeyari mɨkɨ kwieyaritsie pɨye'atɨkani, huye matsutɨtɨkatsie 'inɨari pepɨka'uitɨaxɨani, kemɨ'ane kiekaritsie mɨhanemetɨka. 20 Xeime huye keneutawewi 'ixipara Xawaha 'amunitsixi memakutei mɨye'anikɨ, meta Kerutsareme wahetsɨa mɨye'anikɨ, meta Kura kiekariyaritsie 'aixɨa mɨrekurarutɨiyarie. 21 Wawiruniyatsie ti'aitame huta huyeyaritsie kaniuweni, memɨtemaiwawe kaniwaku'iwawiyani: 'ɨrɨ kanitikatseni, kakaɨyarixi kaniwara'iwawiyani meta xeime yeutanaka nemaya kanitaxexeiyani. 22 Yutseriekɨ yakatiniu'inɨarita Kerutsareme kemɨyɨni: 'Itupari 'uname kanikuha'aritani, kurarutsiepai makeme kaniwewieka meta wapai neniereme, kuyaxa hiwariyari mekanitsutɨaka, katiniuta'aitari mutsutɨarienikɨ mekwi'iwatɨ. 23 Ke tɨratu memɨte'uwewiekairi Kerutsaremetari, niuki yakɨ tikuxaxatsiwame mepɨta'erieni, peru mɨkɨ ti'aitame pɨwaraye'eritɨani, ke'axamemɨte'uyurikɨ mɨkɨ mepanuhapanieni.

24 »'Ayumieme Yawé naimekɨmɨyɨwe mɨpaɨ kanaineni:

»Meputaxatɨarieri ke'axamemɨte'uyuri,

mepahekɨatsitɨiyarie kememɨte'ayuye'unie,

kanihekɨaka ke'axamemɨte'uyuri,

'ayumieme mepɨtiwiyarieni.

25 »'Ekɨta, pemɨkerie 'Ixaheritsie ti'aitame, 'axapemɨtiuka'iyari pemɨka'itiya, 'atukari kanaye'ani, kepauka pe'uximatɨarietɨ pemakumawere. 26 Yawé naimekɨmɨyɨwe mɨpaɨ kanaineni: 'Amukuretsi 'aixɨa mɨ'ane kenanutihɨna, 'akuruna keneyetua, naitɨ katiniyupatamɨkɨ. Nitixaɨtɨ mɨkatihɨkɨ mariwetɨ kanayeitɨariemɨkɨ, kemɨ'ane mɨmariwe nitixaɨtɨ pɨkarayeitɨarieni. 27 Naime kii 'u'unime nekanayeitɨamɨkɨ. Mɨpaɨ katiniyɨmɨkɨ 'iya nuayu kemɨ'ane heitserie nemipitɨa, 'ena 'aixɨa mɨtiyurienikɨ.

28 »'Ekɨta, tewi pemunu'aya, ketineutaxata mɨpaɨ ketineutahekɨata Yawé naimekɨmɨyɨwe mɨpaɨ kanaineni, 'amunitsixi 'axamemutiyuane wahetsiemieme: “'Ixipara pɨwatihanie mɨtiyumienikɨ: kanatamɨarieka mɨramienikɨ meta kanixawatɨni mutimerɨkanikɨ. 29 Mɨkɨ 'ixipara 'axamemɨte'u'iyari kaniwaranutiwitexɨamɨkɨ, kememɨte'unenierixɨ mɨkayurikɨ meta kememɨtemaiwawe pɨyakɨ. Peru tukarieya kanaye'aniri, kepauka kwitɨwa 'uximatɨarika nemipitɨani.

30 »”'Ixipara, 'apainayarita keneukakexi. Hakewa me'akie, hakewa pemeyetɨa, manata 'ekɨ nekamani'uximatɨamɨkɨ. 31 'Ahetsie nehaxɨa nekanikawiwimɨkɨ, nehaxɨa tai hepaɨ 'anekame nekanita'iemɨkɨ, hipame wahetsɨa nekamaniyetuamɨkɨ 'axamemɨte'u'iyari wahetsɨa memɨteyukukuya. 32 'Ɨxa pekanayeimɨkɨ tai hetsiemieme, 'axuriya nepɨtayeurieni 'akwieyaritsie, 'ena kwiepa pepɨkataxatsieni. Ne Yawé mɨpaɨ nekanaineni”».

<- 'Etsekieri 20 'Etsekieri 22 ->