Memeyekɨ 31

Wetsareri 'Ahurihawi matɨa

(Mem 31:2-6 – Mem 35:30-35)

1 Yawé Muitsexi katiniutaxatɨani mɨpaɨ katinitahɨawe: 2 «Mɨpaɨ ketinemaika Wetsareri nepanayexei, 'Urihi nu'aya meta Kuxi teukarieya, Kura xiɨyarieya, 3 nekanihɨniyani Kakaɨyari 'Iyarieyakɨ, mɨtimaiwenikɨ, mɨtimatenikɨ, kemɨtiuyurieni kaniyɨweni, 4 waɨkawa mɨtiwewiwenikɨ hurukɨ, pɨratakɨ meta wurunitsekɨ, 5 tetexi witsimɨ'anene mɨxitewenikɨ, meta meitayatsawenikɨ, kɨyexi haruruanime mɨtiwewiwanikɨ, naime mɨtitiwewiwanikɨ tita mɨtimate.

6 »Meta xeime 'iparewiwame nepanayexei 'Ahurihawi mɨtitewa 'Akitsamaki nu'aya, Rani xiɨyarieya, meta nepɨwarupitɨa memɨtematenikɨ yunaime tewewiwamete yemekɨ yamemɨteyurienikɨ kenemɨmatiuta'aitɨa:

7 tuki 'ixurikiyari,

tɨratu kakuniyari,

meta kanamikiyari,

meta tukita naitɨ piinite mɨtiyukumayuani,

8 mexa meta xakɨrɨte

meta kɨxeme 'uitɨwame hurukɨ wewiyakame,

meta 'ɨkwa witsimu'ɨa mexayari,

9 meta mawari taiyariyari matiwewiwa meta ketipaɨmetɨ muwa mɨtiyukumaɨwa,

yaxeikɨa maimawame meta 'ɨkaya,

10 kemarite mɨ'itsarietɨka, meta 'Aruni kamixateya mɨtipatsietɨka metatsiere niwemama wakemarite,

11 meta hatseiti memɨwakawiriwa

meta 'ɨkwa witsimu'ɨa Muyepatsietsie mieme.

»Naime mepɨtetiwewieni ne kenematiuta'aitɨa».

Xawati tukariyari

12 Yawé Muitsexi mɨpaɨ katiniuta'aitɨani:

13 «Mɨpaɨ 'ixaheritsixi ketiniwarutahɨawi: “Xekena'eriwani xawati 'uxipiya tukaritsie. Nuiwarite memahu wahetsiemieme, xawati tukari 'inɨari pɨhɨkɨtɨni nehetsiemieme meta xehetsiemieme, mɨpaɨ xemɨtemaikakɨ ne Yawé nemenayexei mɨkɨ tukaritsie xemɨnetsihahɨawenikɨ.

14 »”Xawati tukariyari pɨpatsieka xehetsiemieme. Xekena'eriwani.

»”Kemɨ'ane mɨkaha'eriwani ke'umierieni.

»”Kemɨ'ane mɨti'uximayaka 'ana, tahamatɨa pɨka'uyeikani.

15 »”'Ataxewi tukari xepɨte'uximayaka, peru xawati 'uxipiya pɨhɨkɨtɨni pɨpatsieka Yawé hetsiemieme.

»”Xewitɨ xɨka ti'uximayaka xawatikɨ ke'umierieni”.

16 »'Ixaheritsixi mekehe'eriwani xawati 'uxipiya tukari. Wanuiwarite wahetsiemieme tɨratu yuheyemekɨ kanayeimɨkɨ, 17 'inɨari yamɨreuyuhane pɨhɨkɨtɨni mɨkɨ meta ne.

»Kaniyuritɨni, 'ataxewi tukari Yawé katiniutawewieni, muyuawi taheima mieme meta kwie, 'atahutarieka tukaritsie puka'uxipi».

18 Kepauka mɨtiutahayewaxɨ tikuxatatɨ Tsinahi hɨriyaritsie Muitsexi matɨa, hutame tetexi pi'ɨitɨa 'inɨari niukiyari maye'uxa pɨhɨkɨtɨkai Kakaɨyari mɨraka'utɨa mana yumamakɨ.

<- Memeyekɨ 30 Memeyekɨ 32 ->