Tanieri 7

'Ɨrawetsixi yunaukatɨ

1 Mexɨakame wiyaritsie Weritsatsaxi Wawiruniyatsie ti'aitakaku, Tanieri katiniuheinɨni meta yakatiniunieritɨarieni mexi yu'itaritsie kakatei. Hikɨ katinaka'utɨani tita waɨkawa mɨreuyewekai yuheinɨtsita timieme, 2 'ikɨ kanihɨkɨtɨni kemɨraka'utɨa:

«Tɨkarikɨ mɨpaɨ nekatiniuniere, haramara mɨmariwe nekaniuxeiya, kaniutayuanekaitɨni nauka 'ekayari muyuawitsie miemekɨ. 3 Haramaratsie mekanatinexɨani 'ɨrawetsixi yunaukatɨ 'ametemamariwawetɨ, yuxexuitɨ yɨkɨ meteyuxexeiyatɨ.

4 »Mexɨakame maye hepaɨ katiniyuxexeiyakaitɨni, matsi 'anateya kwixɨ 'anateya hepaɨ kani'anenekaitɨni. Mexi 'akuxi ne ne'ixeiyakai, 'anateya namuriyariexɨani, kwiepa kananukuhanieni, waɨriyarika mekanipitɨani yu'ɨkatekɨ 'amɨtakenikɨ, tewi mɨhɨkɨtɨni hepaɨ. Meta tewi 'iyarieya kaniupitɨarieni.

5 »Hutarieka mieme 'ɨrawe nemuxei hutse hepaɨ katiniyuxexeiyakaitɨni. Tapa yu'etsata kwinie kanetitewikaitɨni meta haikame 'aki 'umeteyari yuteta kanatɨkɨkaitɨni. Mɨkɨ 'ɨrawe mɨpaɨ katiniutahɨawarieni: “Kenanukukexi, wai keneutikwa'i waɨkawa”.

6 »Tawarita xeime 'ɨrawe nekaniuxeiya, mɨkɨ hatɨwe hepaɨ kani'anekaitɨni, peru 'anate naukame yuwaritsie pexeiyakai, memɨtekɨwɨtɨwe wa'anate hepaɨ 'aneneme. Mɨkɨ 'ɨrawe naukame mu'ute kanexeiyakaitɨni, meta tɨrɨkariya kaniupitɨarieni mɨtita'aitakɨ.

7 »Hikɨ tawarita, kenemɨtinieritɨariekaitsie naurieka mieme 'ɨrawe nekaniuxeiya, mɨkɨ matsi yemekɨ 'axakani'anekaitɨni, waɨkawamekɨ tɨrɨkaɨyetɨ. Tepɨa tameteyarikɨ 'amɨtɨtɨkɨ kaniwatipɨnakaitɨni meta kaniwatikwa'akaitɨni tita mɨtitakwani meta tita mɨtihayewa kanitiketsinakaitɨni. Tamamata paɨmeme 'awate kanexeiyakaitɨni, hipatɨ 'ɨrawetsixi kememɨteyuxexeiyakai wahepaɨ pɨkatiyuxexeiyakai.

8 »Mexi 'awateya kwinexeiyakai, xewitɨta 'awa 'etsipetɨ watsata kanatineni. Mɨkɨ muwatinekɨ haikatɨ mexɨakate 'awate kanamurariexɨani. 'Awa 'etsimupe tewi hɨxiteya mayatsani hepaɨ katiniyuxexeiyakaitɨni meta teni kanexeiyakaitɨni mutaniukakai tiyukatawe'eriekamekɨ.

'Ukiratsi mɨmariwe

9 »Ne mexi 'akuxi 'ikɨ netixeiyakai,

yapaɨmetɨ 'uwenite mana 'aniku'uni,

meta xewitɨ 'Ukiratsi mariwetɨ mana kanayerɨni.

'Ixurikieya kanituxakaitɨni 'ɨwi hepaɨ,

meta kɨpateya, muxa huxarieya mutuxa hepaɨ kani'anenekaitɨni.

'Uwenieya meta xikɨrawime hexeiyatɨ

tai hepaɨ katiniyuxexeiyakaitɨni.

10 Hɨxiena tai haixayari

kanetineikakaitɨni.

Miyuni meyupaɨmetɨ mekaneyexeiyakaitɨni,

meyumɨiretɨ mekaniparewiekaitɨni.

Kepauka 'itsɨkame 'amayerɨ, 'aixɨa mɨtiyɨnikɨ,

xapate nanutayepiyaxɨani.

11 »Ne kwi ne'ixeiyatɨ nekaniuyuhayewa 'awa 'etsimɨpe mɨtikuxatakaikɨ 'uyuta'ɨretɨ. Ne nekanixeiyakaitɨni kepaukake mɨkɨ 'ɨrawe mumierie, 'etsipepetɨ neutixitekiexɨani meta tai 'anutitatawemetsie mekaneixɨrieni. 12 Hipatɨta 'ɨrawetsixi yutɨrɨkariya mekaniunawaiyarieni, peru yapaɨmexɨa memu'uwanikɨ mekaniupitɨarieni.

13 »Tɨkarikɨ mɨya netinieretɨ, xeime nekaniuxeiya tewi hepaɨ 'aneme muyuawitsie haitsata 'akamieme. 'Ukiratsi mɨmariwe hepa hurawa kanayani meta hɨxiena kanewitɨkieni, 14 mɨti'aitanikɨ kaniupitɨarieni, tɨrɨkariya meta xawatɨriya kaniupitɨarieni. Yunaitɨ teɨteri, nuiwarite meta yɨkɨ memɨte'uniuka me'eyexeiyatɨ mekanakɨne. Kemɨti'aita yuheyemekɨ pɨti'aitani, pɨka'anuyani, meta kemɨtita'aita hatsuaku pɨkaka'unarieni.

Heinɨtsi kehapaɨtɨtɨ manuyɨne

15 »Ne, Tanieri, waɨkawamekɨ nematɨ nekaniyuhayewa, meta mɨyanemɨtiunierixɨkɨ nenehɨawetɨ. 16 Hikɨ xewitɨ mana muwekai 'aurie 'ahurawa nekaniuyani, 'ikɨ yurikɨ kehepaɨtɨtɨ manuyɨne nekanita'iwawiya. Mɨpaɨ katinitahekɨata mɨkɨ: 17 “'Ɨrawetsixi memɨyunauka memɨmamariwawe yunaukatɨ te'aitamete mekanihɨkɨtɨni kwiepa mekatenita'aitakuni, 18 matsi Kakaɨyari 'Amutewi muwaranayexei memɨpatsie memɨteta'aitakɨ mekaniyetuiriyariekuni, yuheyemekɨ wahetsie pɨmiemetɨni, yemekɨ yuheyemekɨ”.

19 »Hikɨ naurieka mieme 'ɨrawe hetsiemieme yemekɨ nepɨtimaimɨkɨkai kehepaɨtɨtɨ manuyɨnekai, mɨwatitsanakai meta mɨwatikwa'akai tita mɨtitakwani, meta tita mɨtihayewa mɨtitiketsinakai. Yɨkɨ kani'anekaitɨni hipatɨ yuhaikatɨ kememɨka'anenekai, tepɨa tameteyari meta wurunitse xɨteteyari kanexeiyakaitɨni. Yɨkɨ pɨtiyuxexeiyakai yemekɨ pɨmariwekai. 20 Yaxeikɨata tamamata 'awate yumu'utsie meixeiyakai hepaɨtsita nekatinimaimɨkɨkaitɨni, meta xewitɨ muwa matine mɨkɨ tiuyurieku mɨkɨ haikatɨ mamurixɨa. Mɨkɨ 'awa matsi 'akanipakaitɨni keyuri hipatɨ, hɨxite kanexeiyakaitɨni meta pɨtikuxatakai 'uyuta'ɨretɨ.

21 »Ne mexi 'akuxi kwi ne'ixeiya, mɨkɨ 'awa kaniuyutamieni memɨpatsie kaniwarutakwini, kaniwara'iwa. 22 Hikɨ 'Ukiratsi kaninuani, 'aixɨa mɨtiyɨnikɨ 'Amutewi hetsɨa miemete memɨpatsie wahetsiemieme. 'Ana kwitɨ memɨpatsie memɨte'aitanikɨ mekaniupitɨarieni.

23 »'Ukiratsi mɨmariwe mɨpaɨ katinitahekɨata:

»“'Ɨrawe naurieka mieme naurieka ti'aitame kanihɨkɨtɨni

'ena kwiepa mɨtikeni.

Yɨkɨ kani'anemɨkɨ kememɨkate'aita hipatɨ,

kwiepa memɨtama yunaime kaniwatikwaimɨkɨ,

kaniwatipɨnamɨkɨ meta kaniwatiketsimɨkɨ.

24 Tamamata 'awate tamamata te'aitamete mekanihɨkɨtɨni

mɨkɨ kwieyaritsie memɨtinexɨani.

Xewitɨta ti'aitame panukakeni wa'ɨtɨma,

meripai miemete kememɨ'anenekai yɨkɨ 'anetɨ,

mɨkɨ te'aitamete yuhaikame kaniwaranakaxɨrimɨkɨ.

25 Kakaɨyari 'Amutewi hepaɨtsita kaneuniumɨkɨ

memɨpatsie hetsɨana miemete kaniwa'uximatɨamɨkɨ,

katinipataxɨamɨkɨ tita 'ixɨarari mɨratineika

meta 'aitsika niukiyari,

meta memɨpatsie katiniwata'aitɨamɨkɨ

haika wiyari heimana 'ataxewime metseri.

26 'Itsɨkate 'ɨparitsie mekanayaxikuni,

mɨkɨ 'awa tɨrɨkariya kaninawaiyariemɨkɨ

meta yuheyeme kanika'unariemɨkɨ.

27 Hikɨ 'ana memɨpatsie pɨta mekaniyetuiriyariekuni,

Kakaɨyari 'Amutewi teɨterimama memɨhɨkɨ,

memɨte'aitanikɨ xawatɨriya mehexeiyatɨ meta tɨrɨkariya

mete'aitatɨ naitsarie kwieyaritetsie.

Kemɨti'aitani yuheyemekɨ katini'aitakamɨkɨ,

mekaneyexeiyakakuni meta mehei'enietɨ

yunaitɨ kuwexinaruritsixi kwiepa memɨtama”.

28 »Kenemɨtiunierixɨ 'ena pu'axe. Ne, Tanieri, nepɨkanemaiwekai 'iyaritɨarika kenemɨrexeiyakai nehetsie, yɨkɨ nepɨraka'eriekai marikakɨ. Matsi naime 'ikɨ nehetsie xeikɨa nekatiniuhɨni».

<- Tanieri 6 Tanieri 8 ->