Tanieri 12

'Imatɨrieka tukari

1 »”Hikɨ Miyeri kaninuamɨkɨ,

ti'aitame mɨmariwe 'ateɨterima wa'ɨwiyame.

Yapaɨmexɨa tukari 'uximatɨarika kanitixuawerimɨkɨ,

hatsuaku mɨkatiyɨwe hepaɨ

nuiwarite memuyukama tsiepaitɨtɨ.

'Ateɨterima mekanitawikweitsitɨariekuni,

xapatsie memaye'uxa kememɨtetetewa,

2 meta kwiepa tumuanaritsata mekananuku'uikuni

yumɨiretɨ memukutsu,

mɨkɨ hipatɨ yuheyemekɨ 'amemu'uwanikɨ,

peru hipatɨta memɨtewiyatsitɨarienikɨ xeikɨa

meta memɨte'uka'eniwanikɨ waɨkawa yuheyemekɨ.

3 Memɨtemaiwawe mepɨxawawatɨni

xawatɨriya muyuawitsie miemekɨ,

kemɨ'ane yumɨireme teɨteri memɨtewaruta'ɨkitɨa

tita mɨtiheitserie hepaɨtsita

xurawetsixi wahepaɨ meputimerɨkani

yuheyemekɨ.

4 »”'Ekɨ, Tanieri, 'ikɨ 'awie ketineuti'uta meta xapa kenanutanama kepaukake tukari maye'ani, karikɨ yumɨiretɨ mepeu'uwani metekuwautɨwetɨ waɨkawa metemaikutɨ”.

5 »Ne, Tanieri, tawarita yuhutame teɨteri nehɨxie nekaniwaruxeiya, xewitɨ hatetsita 'anataɨye kaniutiwekaitɨni meta xewitɨta hatetsita 'anutaɨye. 6 Mɨkɨ xewitɨ mɨpaɨ katiniutahɨawe rinu kamixayari manakatɨkɨkai, haa heima muyewiekai: “¿Kepaɨmexɨa peuyewetse 'ikɨ naitɨ mɨraye'anikɨ mɨtimamariwawe?”

7 »Ne nekanixeiya meta nekani'enieni tewi rinu kamixayari manakatɨkɨ, haa heima muyewiekai, yuheima yumamate hetseraxɨaka hikɨ yakatiniyɨhɨritɨani kemɨ'ane mayeniere yuheyemekɨ hɨxie, mɨpaɨ kaniutayɨni: “Haika wiyari heimana 'ataxewi metseri kaneuyewekani. 'Ikɨ naitɨ katinaye'amɨkɨ kepauka teɨteri memɨpatsie watɨrɨkariya tawariri mɨkaka'unarieni”.

8 »Tsepa nemu'enakai mɨkɨ tewi kemainekai, nepɨkaheiti'enietɨya, 'ayumieme mɨpaɨ nepɨtita'iwawiyaxɨ: “Neti'aitɨwame, naitɨ 'ikɨ ranuyeyayu ¿manatari ketiyɨni?” 9 Mɨkɨ mɨpaɨ kanetiniuta'eiya: “Tanieri, keneumieni heitseriemekɨ, 'ikɨ naitɨ pɨranukanaka 'awie kepaukake tukari maye'ani. 10 Yumɨiretɨ 'aixɨa mekani'itɨariekuni meta mekanitaheitseritɨariekuni, meta me'itiyatɨ mekaniyuhayewakuni, peru 'axateyuruwamete yaxeikɨa 'axamekateniyuriekakuni. Mɨkɨ nixewitɨ pɨkaretimaitɨyani, peru memɨtemaiwawe naime mekatenetimaikuni. 11 Kepauka mɨhayewarieni mawari xexuime tukaritsie mieme, kepauka hetsiena mieme pɨta tixaɨtɨ memɨteyurieni 'axati'aneme katipatsiekame, xeimiriyari heimana huta tsienituyari heimana nauka tewiyari heimana tamamata (1.290) tukari kananuyeyeimɨkɨ. 12 'Aixɨa ke'itɨarieka kemɨ'ane mɨta'ikwewani xeimiriyari heimana haika tsienituyari heimana xeitewiyari heimana tamamata heimana 'auxɨwi (1.335) tukari. 13 Peru 'ekɨ, 'aheyemekɨ keneumieni kepaukake 'atukari maye'ani, hikɨ keneuka'uxipi, kepauka 'imatɨrieka tukari maye'ani pekananukukemɨkɨ pemɨtiyetuiriyarienikɨ tita pemɨra'iwaxɨ”».

<- Tanieri 11