Hikɨ 'ixaheritsixi mekaniyuta'unakaitɨni yuxexuitɨ yukie, 9 meta naitsarie 'Ixaheri kwieyaritsie mekatenikuxatakaitɨni kemɨtiuyɨ. Mɨpaɨ meputiyuanekai: «Ti'aitame pɨtatsi'utawikweitsitɨa memɨtatsi'aye'unie wahepaɨtsita, tahetsie putanua piritsiteutsixi metate'aitɨakaku. 'Awitsaruni yɨanekaku, xeime kwieyaritsie puyuta'unaxɨ. 10 Hikɨri 'Awitsaruni, ti'aitame temeyeitɨakai, mɨrayukwitɨnetsie kanemierieni. Ti'aitame tepɨta'inieni makunuanikɨ, hikɨri pumawe xewitɨ mɨtatsita'imaiya».

11 Hikɨ 'ayumieme Rawiri ti'aitame mawari wewiwamete Tsaruki meta 'Awiyataxi niuki mɨpaɨ katiniwarenɨ'airieni: «Kura kwieyaritsie kiekatari 'ukirawetsixi wahamatɨa xeketenetixata, mɨpaɨ xeketeniwaretahɨawi: “Ti'aitame katinetimani naitsarie 'Ixaheri kwieyaritsie kemɨtikuxaxatsiwa. ¿Titayari xeme 'atsixekatehaitɨka nemakunuanikɨ ne ti'aitame neparatsiyuta? 12 Ne'iwama xeme xekanihɨkɨtɨni, tekanixeinuiwaritɨni. Pɨkaheuyewetse 'amemɨteheutewini mekanetsita'iniewawetɨ”. 13 Meta 'Amatsaha mɨpaɨ xeketenetahɨawi: “'Ekɨ yemekɨ ne'iwa pekanihɨkɨtɨni. 'Ekɨ pɨta nekuyaxima tiwa'aitɨwame pekanayeimɨkɨ 'aheyemekɨ, Kuhawi pɨkatixaɨri. Kakaɨyari 'axa'aneme kenetsi'upitɨani kanetsinenimayatɨ xɨka nekaraye'atɨani”».

14 Mɨpaɨ ti'aitame tiwarutahɨaweku Kura kwieyaritsie kiekatari 'aixɨa mekatenixeiya, hikɨ me'uyɨnɨka mekanita'inieni yunaitɨ munuanikɨ yunaime yukuyaxima warawitɨtɨ. 15 'Ayumieme ti'aitame matsi kaniyukuha'aritɨani mayeyanikɨ, Kurutani hatuxameyaritsie paitɨ kaninuani. Merikɨte Kura kwieyaritsie kiekatari Kirikari mekanekɨne ti'aitame memanukunakekɨ meta hapa memanakɨnetsie memɨwaranatuanikɨ. 16 Matsi Wenikamini nuiwarieya Tsimi Kera nu'aya, Wakurini kiekame, kaniyukumexɨitɨani Kura kwieyaritsie kiekatari wahamatɨa, ti'aitame Rawiri 'anunakeke. 17 Hamatɨana mekaniuhukaitɨni xeimiriyari Wenikamini nuiwarimama metatsiere Tsiwaha, Tsahuri kie mɨti'aitametɨkai, tamamata heimana meyu'auxɨwime yuniwema warawitɨtɨ meta xeitewiyari te'i'uximayatsiriwamete. 'Ikɨ meri Kurutani hatuxameyaritsie mekaniu'axɨani ti'aitame 'akuxi kanuawekaku mana, 18 hikɨ hatɨxametsie mekananukɨne ti'aitame meparewienike meta niwemama memɨwaranatuanikɨ Kurutanitsie. Kepauka ti'aitame manayanikekai, Tsimi Kera nu'aya hɨxiena kaniutihɨximakeni, 19 mɨpaɨ katinitahɨawe:

—Ne nepɨmatsiwawirie nekutsiyari ti'aitame ne ke'axanemɨtiuyuri pepɨkahe'eriwani, ne ti'a'uximayatsiriwame ke'axanemɨmatsi'uyuri kepauka 'ekɨ ti'aitame Kerutsareme pemayetɨa. 'Ekɨ ti'aitame nekamaniwawirieka mɨkɨ pemɨratɨmaiyanikɨ. 20 Ne mɨpaɨ nepɨretima 'axanepɨtiuyuri, hikɨ 'ayumieme, Kutse nuiwarimama yunaitɨ meka'axɨawawekaku 'akuxi, ne meri nekanayeyani nematsi'anunakeke nekutsiyari ti'aitame.

21 Peru 'Awitsahi Tsariwiya nu'aya mɨpaɨ kaniutayɨni:

—Tsimi, kemɨ'ane Yawé manayexei hepaɨtsita 'axakaniutayɨni, 'ayumieme peuyewetse mɨkɨ mɨmierienikɨ.

22 Rawiri mɨpaɨ katinita'eiya:

—Tsariwiya niwemama, xeme xepɨka'anuyehakeni, nepɨta kenemɨtiyurieneni. Xemɨnetsi'aye'unieka hepaɨ xeputiyuane. Hikɨri yunaitɨ 'ixaheritsixi mepɨnetsihetima kename ne ti'aitame nehɨkɨ, 'ayumieme xewitɨ pɨkamɨni.

23 Hikɨ ti'aitame Tsimi mɨpaɨ katiniutahɨawe:

—Hawaikɨ pepɨkamɨni.

24 Metatsiere Mepiwutseti Tsahuri teukarieya kanayeyani ti'aitame 'anunakeke. Yu'ɨkate pɨkatihauxiwekai meta yu'ixurikite meta yumɨxiya pɨka'ataxiwekai kepauka ti'aitame mayetɨatsietɨtɨ, kepaukakeri 'aixɨa reu'erietɨ munua Rawiri. 25 Kepauka Kerutsareme yeyaka munua ti'aitame 'anunakeke, mɨkɨ mɨpaɨ katinita'iwawiya:

—Mepiwutseti 'aku, ¿Ketitayari nehamatɨa pekaretɨa?

26 Mepiwutseti mɨpaɨ kaniutayɨni:

—Neti'aitɨwame 'aku, pepɨtimate ne mati'uximayatsiriwame nepɨka'uyeiwe, ne mɨpaɨ nepɨra'eriwakai puxu xewitɨ panutixiratɨanikekai mɨpaɨ 'ana 'a'utɨa nemɨyemiekɨ. Matsi neti'uximayatsiriwame Tsiwaha kaneniukwamana, 27 meta ti'aitame 'ahɨxie 'axakanetinikuxatani xeikɨa kenemɨka'utayɨ. Matsi 'ekɨ ti'aitame niuki tuayame Kakaɨyari hetsɨa mieme hepaɨ pekani'aneni pekaniyɨweni yapemɨtiuyurieni nehetsie kemɨmatinake. 28 Ne'iwama teyunaitɨ nepaapa hetsiemiemete peuyewetse temɨkwi'iwakɨ 'ahɨxie neti'aitɨwame. Mɨyatɨtɨ, ti'aitame ne ti'a'uximayatsiriwame 'amexatsie pemɨratikwa'a pepɨnetsi'upitɨa nemɨtikwanikɨ. Tawarita xɨari heitserie nepɨkahexeiya nematitawawirienikɨ ti'aitame.

29 Ti'aitame mɨpaɨ katinitahɨawe:

—Waɨkawari matsi pemɨnetikuxaxatɨwani pɨkaheuyewetse. Ne 'ari yanekaniutayɨni 'ekɨ Tsiwaha matɨa kwie xekeneuyutaxiteki.

30 Mepiwutseti mɨpaɨ katinita'eiya:

—Mɨkɨ pɨyɨwe nekwie naime yuhetsiemieme mayeitɨani, ne ne'iyari 'aixɨa pɨ'ane 'ekɨ neti'aitɨwame xɨka 'aixɨa pereu'erietɨ 'aparatsiyuta penuani.

31 Metatsiere Waxitsirahi Karaha kiekame Kurutani hatuxameyaritsie kaninuani. Xukerini mɨrayetewatsie paitɨ kaneyeyakaitɨni, ti'aitame kepauka hatuxametsie manuyanikekai hamatɨana memanukɨnekɨ memiparewienikɨ. 32 Waxitsirahi, 'ari kani'ukiratsitɨkaitɨni nauka tewiyari wiyari kanexeiyakaitɨni, mɨkɨ ti'aitame katinikupiniriekaitɨni tita mɨreuyehɨakai kepauka Makanahini kiekariyaritsie mukatei, mɨkɨ waɨkawa katinexeiyakaitɨni. 33 Ti'aitame mɨpaɨ katinitahɨawe:

—Kenenanuweiya. Kerutsareme nehamatɨa kenekani, ne ketita pemɨreuyehɨaka nepɨmarekupinirieka.

34 Waxitsirahi mɨpaɨ katinita'eiya:

—Neuxei, ¿kepaɨmeme wiyari 'akuxi kuta nepuyeikani? Titayari nereumieni 'ahamatɨa Kerutsareme paitɨ. 35 Nauka tewiyari wiyari nekanexeiyaniri, waɨriyarika nekatinetimamateni tita 'aixɨa mɨti'ane meta 'axamɨti'ane, meta nepɨkareu'inɨatari neteta tita nemɨtikwa'a meta tita nemɨti'ie, meta nepɨkawa'enieri kwikamete 'ukitsi 'ukari. Pɨkaheuyewetse xɨari nemɨmatsihe'uximatɨaka. 36 ¿Ketitayari kuta ti'aitame mɨpaɨ penerakapitɨanikeyu? Matsi hapa xeikɨa nekamananuteɨtamɨkɨ Kurutani hatuxameyaritsie. 37 Keneneupitɨa ne'iwama wahetsɨa nemakunuanikɨ, mana nememɨnikɨ meta nepaapama wateukiyapa nemekateukienikɨ. 'Ena nepɨmatsihɨwirieni Kimani, mɨkɨ 'ekɨ ti'aitame mɨmareta'uximayatsirienikɨ meta 'ahamatɨa manuyanikɨ hapa. Nehetsiemieme kepemɨreyurienikekai, mɨkɨ hetsiemieme mɨpaɨ ketineyuri.

38 Ti'aitame mɨpaɨ katinita'eiya:

—'Aixɨa kani'aneni, Kimani nehamatɨa kaniyemieni, kepemaine hetsiena mieme mɨpaɨ nekatinekayeimɨkɨ. 'Ekɨta tita tsepa pemɨreuyehɨwa nekamatiniyetuiriemɨkɨ.

39 Hikɨ teɨteri meta ti'aitame Kurutani hatuxameyaritsie mekananukɨne. Meta ti'aitame Waxitsirahi kaniu'itseni metatsiere Kakaɨyari kaniutawawirieni 'aixɨa miyurienikɨ, hikɨ Waxitsirahi yukie kanakunuani. 40 Ti'aitame Kimani 'eweiyakaku meta kuyaxi Kura kwieyaritsie kiekatari metatsiere kuyaxi 'Ixaheri kwieyaritsie kiekatari hixɨapa me'atɨ me'eweiyakaku Kirikari kaneutiyune. 41 'Ayumieme hipatɨ 'ixaheritsixi ti'aitame hetsɨa mekaniye'axɨani mɨpaɨ mekatenitahɨawe:

—¿Titayari ta'iwama Kura kwieyaritsie kiekatari, ti'aitame yeme yuhetsɨa mieme metehayeitɨa Kurutanitsie 'anayaku, titayari mɨkɨ xeikɨa mete'iwitɨxime meta tɨɨriyamama metatsiere kuyaximama yunaime?

42 Kura kwieyaritsie kiekatari mɨpaɨ mekaniutiyuani:

—¿Titayari kuta xeteha'a? Ti'aitame 'ahurawa ta'iwa mɨhɨkɨkɨ. Ti'aitame 'ikwai mɨtatsiminikɨ tepɨkayɨa meta 'imikieri mɨtatsiyetuirienikɨ.

43 Matsi 'ixaheritsixi tawarita mɨpaɨ mekaniutiyuani:

—¿Ketitayari kuta waɨkawa xetatsixani'erietɨ xeteyɨa? Tame matsi tamamata mexɨa heitserie tepexeiya Rawiri ti'aitame hetsiemieme keyuri xeme. Meta, tame meri tete'ita'ini munuanikɨ.

Hikɨ matsi Kura kwieyaritsie kiekatarita waɨkawa meha'atɨ mekaniwaruta'eiya.

<- 2 Tsamuheri 182 Tsamuheri 20 ->