1 Merikɨtsɨ Kuhawi Tsariwiya nu'aya yakatinetimani ti'aitame Rawiri 'Awitsaruni waɨkawamekɨ muku'eriwakaikɨ. 2 'Ayumieme katiniutanɨ'ani 'uka mɨwitɨkiemiekɨ waɨkawa mɨtimaiwe, mɨkɨ Tekuha mɨrakutewatsie kaniukateitɨni, mɨpaɨ katinitahɨawe:

—Yuheiweriekame hepaɨ ketineu'akemaritɨa, witsimu'ɨa pepɨka'akawiriwani, matsi yuheiweriekame hepaɨ kene'aneni, 'aniwe mumɨni hepaɨ.

3 Hikɨ Kuhawi mɨpaɨ katinita'aitɨani ti'aitame hetsɨa mɨmiekɨ, tita'ɨkitɨaka kemɨreitahɨawe. 4 Kepauka mɨkɨ 'ukaratsi Tekuha kiekame munua ti'aitame hɨxie, kananakatutsire kwiepapai kaniutihɨximakeni.

Mɨpaɨ katinitahɨawe:

—'Ekɨ ti'aitame, keneneuparewi.

5 Ti'aitame mɨpaɨ katinita'iwawiya:

—¿Kekuta tita perayexeiya?

Mɨkɨ mɨpaɨ katinita'eiya:

—Tixaɨtɨ nepɨkarexeiya, nepɨnexaɨta, nekɨna kaniumɨni.

6 'Ekɨ ti'aitame ne ti'a'uximayatsiriwame yuhutame neniwema nekaniwarexeiyakaitɨni, mɨkɨ mepuyutakwi yeuta me'u'uwatɨ, matsi xewitɨ mumawekaikɨ mɨwata'imaiyakɨ, mɨkɨ xewitɨ yu'iwa kaniumieni. 7 'Ayumieme ne'iwama yunaitɨ mekanenaye'unieka, ti'aitame ne ti'a'uximayatsiriwame. Mekaneniwawirieka nemiyetuanikɨ memimienikɨ mɨtiuyumikɨ, mɨpaɨ mɨrayukatuanikɨ yu'iwa kemɨtiumi, xɨka mɨpaɨ mete'uyurieni nexaɨtame mekanenihayewakuni. Yurikɨ mɨpaɨ nekanaineni xɨka mɨpaɨ mete'uyurieni nekɨna nuiwarieya kaneuyewemɨkɨ kemɨtitewakai 'ena kwiepa.

8 Ti'aitame mɨpaɨ katinita'eiya:

—'Akie kenemie, ne'aixɨa nekatiniyurimɨkɨ mɨkɨ hepaɨtsita.

9 Hikɨ 'ukaratsi Tekuha kiekame, mɨpaɨ katinita'eiya:

—'Ekɨ ti'aitame, mɨkɨ naitɨ nehetsie kerahɨiyani meta netɨɨriyama wahetsie, ti'aitame 'ahetsie pɨkatixaɨ meta pemɨra'aitatsie.

10 Ti'aitame mɨpaɨ katinitahɨawe:

—Xɨka xewitɨ matsihe'uximatɨaka keneneutaxatɨa, tawariri pɨkamatsihe'uximatɨaka.

11 Hikɨ 'ukaratsi mɨpaɨ katinitahɨawe:

—'Ekɨ ti'aitame nekamaniwawirieka Yawé takakaɨyari keneutawawiri, neniwe xewitɨ mukakumemiwanikɨ.

Ti'aitame mɨpaɨ katinita'eiya:

—Yurikɨ Yawé hɨxie mɨpaɨ nekanaineni, 'aniwe 'atsipɨka'itɨarieni.

12 Matsi 'ukaratsi katihayewatɨ mɨpaɨ katinikɨhɨawekaitɨni:

—'Ekɨ ti'aitame ne ti'a'uximayatsirime 'ahetsɨa nemɨmieme keneneupitɨa ximɨxi matsi tawarita nemɨmatitaxatɨanikɨ.

Ti'aitame mɨpaɨ katinitahɨawe:

—Ketineutaxata.

13 'Ukaratsi mɨpaɨ kaniutayɨni:

—'Ekɨ ti'aitame Kakaɨyari teɨterimama 'axapepɨkawayurieka. 'Ekɨ 'aniukikɨ 'ahetsie pepɨrahɨpa, 'aniwe 'ateewa metɨa pemɨkapitɨakɨ munuanikɨ yukie. 14 Haa xɨka 'utayeuriyani kwiepa pɨkayɨwe tawarita mikuhanɨni, mɨpaɨ yaxeikɨata tanaitɨ tekanikwikuni. Peru matsi Kakaɨyari tatukari pɨkatatsikunawairiwa, matsi pɨta katinikuwauneni 'ateewa muyeika yuheyemekɨ 'ateewa mɨka'uyeikanikɨ.

15 »'Ekɨ ti'aitame 'ahamatɨa netitaxatake ne nekaneyeyani, teɨteri waɨkawa mepɨtekuxata menetsimariutatɨ. Mɨpaɨ nepɨre'eri: “Ti'aitame hamatɨa nepɨretaxata, heiwatɨ netsihe'enieni ketita nemɨreitawawirieni, 16 'aixɨa tatsiyurietɨ ne meta neniwe memɨtatsikwiku wahepaɨtsita, tahetsie mɨtiyuhayewakɨ Kakaɨyari ketita mɨtatiyetuiri”.

17 »Metatsiere mɨpaɨ nepɨre'eri, niukieya xɨari 'aixɨa netiku'eriwame pɨnetsi'ayeitɨani, 'ekɨtsɨ ti'aitame niuki tuayame Kakaɨyari hetsɨa mieme hepaɨ pekani'aneni, pemɨtimaiwe tita 'aixɨa mɨti'ane meta 'axamɨti'ane hepaɨtsita. Yawé 'akakaɨyari 'aixɨa kematsiyurieka.»

18 Hikɨ mɨpaɨ tiuxataku, ti'aitame mɨpaɨ katinitahɨawe:

—Nepɨmatsita'iwawiya, peru nekamaniwawirieka yurikɨ yapepɨnetitahɨawe.

'Ukaratsi mɨpaɨ katinitahɨawe:

—'Ekɨ yakenetineutahɨawi.

19 Ti'aitame mɨpaɨ katinita'iwawiya:

—¿Wa'atɨ Kuhawi mɨpaɨ merahɨawekaku pemutaine?

'Ukaratsi mɨpaɨ katinita'eiya:

—Mɨpaɨ kani'aneni, ti'aitame, Kuhawi mati'uximayatsiriwame 'ikɨ naime kanetineta'ɨkitɨani kenemɨtayɨnikekai. 20 Mɨkɨ mɨpaɨ pɨtiuyuri para 'aixɨa pemɨtiyurienikɨ. Peru 'ekɨ ti'aitame waɨkawa pekatinimaiweni niuki tuayame Kakaɨyari hetsɨa mieme hepaɨ, naime pekatinakumaika 'ikɨ kwieyaritsie kemɨtiyɨane.

21 Hikɨ ti'aitame Kuhawi 'uta'inieka mɨpaɨ katinitahɨawe:

—Merikɨte yanekatina'eriwani. Kenemie yaketineyuri 'Awitsaruni neniwe munuanikɨ.

22 Kuhawi kwiepa kaniutihɨximakeni ti'aitame hɨxie, Kakaɨyari kaniutawawirieni 'aixɨa miyurienikɨ, mɨpaɨ tikɨhɨawetɨ:

—Pamɨpariyutsi nepɨmatsipitɨa neti'aitɨwame tita nemɨmatiutawawiri yapemɨtiuyurikɨ.

23 Mɨpaɨ 'utayɨka, Kuhawi Ketsuxi kwieyaritsie kaneyani, meta Kerutsareme kanakunuani 'Awitsaruni hamatɨa. 24 Ti'aitame matsi mɨpaɨ katiniuta'aita: «Yukie keheyani meta hatsuaku pɨkahamieni netsiku'iwatanetɨ». 'Ayumieme 'Awitsaruni yukie kaneyani ti'aitame hetsɨa kaye'aka.

25 Naitsarie 'Ixaheri kwieyaritsie tewi pumawekai 'aixɨa tiyuxexeiyatɨ 'Awitsaruni kemɨtiyuxexeiyakai hepaɨ, 'aixɨa pɨ'anekai naitɨ kemutewikai. 26 Kɨpaya kwinimieme pɨrahetekai, xeiwiyaritsie heiwamieme pikaxikakai kwinie mɨraheterekaikɨ kɨpateya, kepauka kɨpateya mɨkaxirie memiku'inɨnɨatakai huta kiruyari pɨraheterekai. 27 Metatsiere, 'Awitsaruni yuhaikame yuniwema 'ukitsi kaniwarexeiyakaitɨni meta xeime 'uka. 'Uka Tamaxi pɨtitewakai, kepauka 'ɨimari matɨa mɨkɨta witsiti'ɨimaritɨ patɨa.

28 'Awitsaruni Kerutsareme 'ukaitɨ huta wiyari kaniuyurieni ti'aitame hɨxie kaheta'axetɨ. 29 Hikɨ 'Awitsaruni heiwa Kuhawikɨ katiniutanɨ'ani ti'aitame hetsɨa mɨmiekɨ, matsi Kuhawi pɨkayutawaɨri mɨmiekɨ. Tawarita kanitanɨ'ani, Kuhawi matsi kaniyuta'imani kayuwaɨriyatɨ. 30 Hikɨ 'Awitsaruni yuhetsɨa miemete mɨpaɨ katiniwaruta'aitɨani: «Neuxei, Kuhawi tsewara kaniuka'eni nemati'etsatsie yateewa. Xekenehu xekenetataiya».

Hikɨ te'i'uximayatsiriwamete mehekɨneka Kuhawi 'etsarieya mekanetataiya. 31 Hikɨ Kuhawi kaneyani kwitɨwa 'Awitsaruni kie, mɨpaɨ katinitahɨawe:

—¿Ketitayari 'ahetsɨa miemete, ne'etsiya metehetataiyaxɨ?

32 Hikɨ 'Awitsaruni mɨpaɨ katinita'eiya:

—Ne nepɨmatsi'utanɨ'a nepɨmatsiwawiriekai ti'aitame hetsɨa pemumiekɨ meta pemeita'iwawiyakɨ ketitayari Ketsuxi kiekariyaritsie nemeyeikakai nereyetɨa. Matsi 'aixɨa pɨyɨnikekai xɨka mana neheyuhayewake. Ti'aitame hɨxie nekanimieni, xɨka nehetsie tixuaweni, kenetsi'umieni.

33 Kuhawi kaneyani ti'aitame katinetaxatɨani, hikɨ ti'aitame 'Awitsaruni mɨwitɨkiemiekɨ katiniuta'aita, mɨkɨta ti'aitame hɨxie kaninuani, kwiepa 'utihɨximakeka waɨkawamekɨ reiyehɨwirietɨ. Matsi ti'aitame 'Awitsaruni kaniutanake 'itsiyakɨ kanitawaɨritɨani.

<- 2 Tsamuheri 132 Tsamuheri 15 ->