2Kemɨtiuyɨ 28

'Akatsi, Kuratsie ti'aitame

(2Kem 28:1-27 – 2Te 16:1-20)

1 'Akatsi kepauka mitsutɨa ti'aitatɨ xeitewiyari wiyari pexeiyakai, Kerutsareme kiekariyaritsie 'ukaitɨ pɨtiuta'aitaxɨ tamamata heimana 'ataxewi wiyari. Peru yututsi Rawiri hepaɨ pɨka'anekai, 'Akatsi yapɨkatiuyuri Yawé Kakaɨyari kemɨtinake. 2 Matsi, 'Ixaheri kwieyaritsie te'aitamete ke'axamemɨte'uyuri wahepaɨ katiniuyurieni, meta kakaɨyari Wahari 'ɨkiyari kaniutiwewieni tepɨa kwaniyarietɨkaimekɨ. 3 Metatsiere, 'ɨkwa kaniutitaiyakaitɨni mayeweritsie Weni-Hinuni meta yuniwema kaniwarutitaiya taipa mawari memakɨnekɨ, nuiwarite mana memɨtamakai Yawé mɨwarayeweiyakai 'ixaheritsixi wahɨxie ke'axamemɨte'uhukai wahepaɨ. 4 Metatsiere mawari pɨwewienekai meta 'ɨkwa putitaiyakai kakaɨyarixi wamawari taiyame hetsie, meta hɨri 'amanutitɨtɨtsie meta naime kɨyexi waɨkawa mɨ'e'etɨ hetɨa.

5 'Ayumieme Tsiriyatsie ti'aitame hetsɨa Yawé Kakaɨyarieya kaniyetuani. Tsiriyutsixi mekane'iwa, meta yuwaɨkawame mekaniwarutiwiya mekaniwarehapani Ramatsiku paitɨ.

Metatsiere 'Ixaheri kwieyaritsie ti'aitame 'Akatsi kana'iwa, mɨkɨta kuyaximama yumɨireme kaniwarukwini. 6 Xeitukaritsie Pekaki Xemariyaxi nu'aya kaniwarukwini Kura kwieyaritsie xeitsienituyari heimana xeitewiyari miriyari, yunaitɨ mɨkɨ kuyaxi memeuyutakwiwawe mepɨhɨkɨtɨkai, mɨya mepɨte'anuyekɨ Kuratsie kiekatari Yawé memuku'eirikɨ, yu'ukiyarima wakakaɨyari. 7 Tsikɨri, 'Epɨrahini kiekame mɨtɨrɨkaɨye kuya, Matsehiyaxi kaniumieni, ti'aitame nu'aya, meta 'Atsirikani, ti'uximayatame paratsiyu mɨhɨritɨariekai, metatsiere 'Erikana, mɨkɨ ti'aitame 'utɨma tɨrɨkariya pexeiyakai. 8 Kuyaxi 'ixaheritsixi yu'iwama Kuratsie kiekatari mekaniwarehapani huta tsienituyari miriyari teɨteri, meteyunɨtɨ 'ukarawetsixi, tɨɨri 'ukitsi meta 'ukari. Meta waɨkawa piinite mekatenetɨni, hikɨ mekatenepini Tsamariya kiekariyaritsie paitɨ.

9 Tewi 'Ureri titewatɨ mana kaniukateitɨni, Yawé niukameya kanihɨkɨtɨkaitɨni. Kepauka kuyaxi 'ixaheritsixi Tsamariyatsie memuti'axekai, mɨkɨ Kakaɨyari niukameya kanayeyani waranukunakeke mɨpaɨ katiniwarutahɨawe:

—Yawé, xe'ukiyarima wakakaɨyari, Kuratsie kiekatari xehetsɨa kaniwayetuani, mɨkɨ mɨha'akaikɨ wahepaɨtsita. Peru xeme xekananutikɨne, xekawanenimayatɨ xekaniwarukwini, Kakaɨyari kaniuniere muyuawitsie paitɨ. 10 Hikɨta, Kuratsie meta Kerutsaremetsie kiekatari waɨriyarika te'uximayatamete xetewayeitɨaku. Xemeta xehetsie katinahɨiwani 'axaxekateniuyurieni Yawé xekakaɨyari hepaɨtsita. 11 'Ayumieme, yaxeketenekakɨni kenemɨtayɨni: xekeniwarutatua pɨretsutsixi. ¿Mɨkɨ mekatexe'iwama? Yawé kaniuyeha'ani xehepaɨtsita.

12 Hikɨ 'Atsariyaxi Kuhanahani nu'aya, Werekiyaxi Metsiremuti nu'aya, 'Etsekiyaxi Tsaruni nu'aya, meta 'Amatsaha Harɨrahi nu'aya, 'Epɨrahini nuiwarimama wa'ukiyarima memɨhɨkɨtɨkai, kuyaxa memanukɨ wahɨxie mekaniu'uni, 13 mɨpaɨ mekateniwarutahɨawe:

—Pɨretsutsixi xemɨwaruhapaxime 'ena xepɨkawa'atɨwani, mɨkɨkɨ Yawé tame tahetsie pɨrahɨani. ¿Kamɨtsɨ xete'imɨiriyaku tita 'axatemɨte'uyuri? 'Ari pɨmɨire tita 'axatemɨte'uyuri, 'ari Yawé puyeha'a 'Ixaheri hetsiemieme.

14 Hikɨ kuyaxi mekaniwaruhayewa pɨretsutsixi memɨwaruhapaximekai, meta piinite memɨtehatɨkɨkai teɨteri wa'ukiyarima wahɨxie mekatenitipini meta yunaime teɨteri wahɨxie. 15 Hipatɨ mekaniutihɨawarieni pɨretsutsixi memɨhɨritɨarienikɨ, meta kamixate meta kakaite piinite memɨte'atɨatsie timiemekɨ mekateniwarutiketɨani yunaime kemɨ'ane memeumamawekai. Hikɨ meta mekateniwarumini mekaniwaruharitɨani, meta hatseiti mekaniwarukawiriexɨani. Hipatɨri, memɨka'ukɨniwawekai mekaniware'ikata puxuri wahetsie Keriku kiekariyaritsie paitɨ, makutakɨya mɨrakutewatsie, wa'iwama memɨwaretinɨitɨanikɨ. 'Arike mɨkɨ teɨteri yamete'uyurieka Tsamariyatsie mekanakunuaxɨani.

16 'Ana mɨtiyehanetsie, ti'aitame 'Akatsi parewiya kaniwarutawawirieni 'Atsiriyatsie te'aitamete, 17 hekwamekɨ 'erumitsixi Kuratsie memɨtahaxɨakaikɨ meta yayupaɨmeme teɨteri memɨwarehapakaikɨ. 18 Metatsiere piritsiteutsixi Kura kiekariteyaritsie mekanitahaxɨani mekateniwarunawatsirieni kiekari muweritsie mukumanetsie meta Nekexi mɨrakutewatsie, meta yuhetsiemieme mekanayeitɨani kiekarite Weti-Tsemetsi, 'Ayaruni, Kereruti, Tsuku, Timinaha meta Kimitsu, meta kiekarite wa'aurie mamanetɨkatei, hikɨ mɨkɨ mana mekaniyutikitɨani. 19 Mɨpaɨ Yawé Kuratsie kiekatari katiniwarunanaimani, 'Akatsi hetsiemieme tiwa'aitɨwame, mɨkɨ kaniwarupitɨani Kuratsie kiekatari 'axamemɨteyurieka, meta mɨkɨ Yawé yemekɨ kaniuku'eirieni 'eye'unietɨ kanayani.

20 Metatsiere Tikɨrati-Piretsexi, 'Atsiriyatsie ti'aitame, 'Akatsi mɨparewienikekai, kanitamieni pɨta. 21 Hikɨ 'Akatsi 'Atsiriyatsie ti'aitame katiniyetuirieni tinaime Yawé tukita mɨrayepikai mɨraye'atɨka, meta paratsiyuta mɨrayepikai, meta 'iparewiwametemama wakiita mɨrayepitɨkatei, peru mɨkɨ tixaɨtɨ pɨkaratɨa. 22 Tsepa waɨkawa mu'uximatɨariekai, ti'aitame 'Akatsi kaniyeweiyakaitɨni Yawé ka'enietɨ. 23 Mawari katiniwayetuirieni kakaɨyarixi Ramatsiku miemete meme'iwakai, mɨpaɨ tiu'erieka: «Kakaɨyarixi Tsiriya miemete kememɨtewaparewie teyu'aitɨwamete, neta mekaneniparewikuni xɨka netiwarutimawirieni». Peru mɨkɨ kakaɨyarixi mekanika'una meta naime 'Ixaheri kwieyari. 24 Meta 'Akatsi katiniukuxeɨrieni piinite Yawé tukita timieme katiniutitara, hikɨ muwa tukita katineunaxɨani, metatsiere Kerutsareme kiekariyaritsie naime 'itsikinatsie mawari taiyame kaniutiwewieni kakaɨyarixi wahetsiemieme. 25 Meta naime Kura kiekariteyaritsie kanitiwewieni tukite kakaɨyarixi wahetsiemieme 'ɨkwa muwa memɨtaiyatɨwenikɨ hipame kakaɨyarixi wahetsiemieme, mɨpaɨ Yawé hɨxie 'axakatiniyurienekaitɨni, yu'ukiyarima wakakaɨyari.

26 Hipatɨta kemɨtiuyɨ ti'aitametɨkaku, kepauka mɨtiukatsutɨatsie timieme meta 'imatɨrieka timieme, metatsiere kemɨtikatɨa, katinaka'utɨarieni Kuratsie te'aitamete meta 'Ixaheritsie te'aitamete waxapatsie. 27 'Akatsi kaniumɨni, kaniukateukieni Kerutsareme kiekariyaritsie, peru 'Ixaheri kwieyaritsie memɨte'uta'aitaxɨ memuyehetsie pɨka'ukateukie. Nu'aya 'Etsekiyaxi kanitsutɨani ti'aitatɨ 'utɨmana.

<- 2Kemɨtiuyɨ 27 2Kemɨtiuyɨ 29 ->