2Kemɨtiuyɨ 18

Mikahiyaxi kemutayɨ 'Akawi hepaɨtsita

(2Kem 18:1-27 – 1Te 22:1-28)

1 Kutsapati matsi waɨkawa rexeiyatɨ kanayani meta 'aixɨa pɨtixeiyariekai, mɨkɨ 'Akawi matɨa memuyutimaretakaikɨ, 2 hikɨ yapaɨmexɨa wiyari 'anuyeyaku kaneyani kaneiku'iwata Tsamariya kiekariyaritsie. Mana 'Akawi muxatsi kaniwarukwini yuwaɨkawa meta wakaitsixi Kutsapati hetsiemieme meta memeweiyakai, meta mana kanita'inieni memɨyukwiyukɨ Xamuti Karaha kwieyaritsie miemekɨ.

3 'Akawi, 'Ixaheri kwieyaritsie ti'aitame, mɨpaɨ Kutsapati katiniuta'iwawiya, Kura kwieyaritsie ti'aitame:

—¿Nehamatɨa pereuyeiwe, temɨwatakwinikɨ Xamuti Karaha kwieyaritsie kiekatari?

Kutsapati mɨpaɨ kaniutayɨni:

—'Ekɨtsɨ kepemɨtayɨni ne yanepɨtikayani, yaxeikɨa neteɨterima. 'Ahamatɨa tekanihuni tekanitakwiyuni.

4 Peru mɨpaɨta kaniutayɨni:

—Peru mexi 'atsitekateyuriwawe, Yawé tepɨta'iwawiya.

5 Hikɨ 'Ixaheri kwieyaritsie ti'aitame kaniwarukuxeɨrieni Kakaɨyari niukametemama nauka tsienituyari, mɨkɨ mɨpaɨ katiniwaruta'iwawiya:

—¿Teteyɨwawe temɨwatakwini Xamuti Karaha kwieyaritsie kiekatari, nutsutɨ hawaikɨ?

Mɨkɨ mɨpaɨ mekaniutiyuani:

—Ti'aitame kenemie, Kakaɨyari kamaniparewimɨkɨ pekaniwara'iwamɨkɨ.

6 Peru Kutsapati mɨpaɨ kaniutayɨni:

—¿Xewitɨ 'ena katiuyeika Yawé niukameya, mɨyɨwe temita'iwawiyakɨ?

7 'Ixaheri kwieyaritsie ti'aitame mɨpaɨ katinita'eiya:

—Xewitɨ 'akuxi 'apuyeika mɨyɨwe mɨkɨ Yawé muta'iwawiya tahetsiemieme, Mikahiyaxi katinitewaka 'Imɨra nu'aya. Peru mɨkɨ ne nekanixani'erieka, hatsuaku 'aixɨa ti'aneme nehetsiemieme pɨkanetixaxatɨwa, ke'axamɨtiyɨni xeikɨa pɨtixaxata.

Kutsapati mɨpaɨ katinitahɨawe:

—Mɨpaɨ pepɨka'utaineni.

8 Hikɨ 'Ixaheri kwieyaritsie ti'aitame xeime kaniuta'inieni yuparewiwame, mɨpaɨ katinita'aitɨani:

—Yapauka xekenene'atɨiri Mikahiyaxi 'Imɨra nu'aya.

9 'Ixaheri kwieyaritsie ti'aitame, meta Kutsapati Kura kwieyaritsie ti'aitame, te'aitamete wakamixate me'anakatɨtɨkaitɨ meta yu'uwenitetsie menatekaitɨni, teɨteri memayukuxexeɨriwatsie Tsamariya kiekariyari kitenieyaritsie, meta wahɨxie yunaitɨ Kakaɨyari niukametemama mekaniku'ukaitɨni metewakuxaxatɨwatɨ. 10 Tserekiyaxi Kenana nu'aya, mɨkɨ tepɨa 'awayari mutiwewiekai, mɨpaɨ kaniutayɨni: «Yawé mɨpaɨ kanaineni: “'Ikɨ 'awatekɨ pekaniwatakwimɨkɨ tsiriyutsixi pepɨkawahayewa kepaukake pemɨwakwini”». 11 Hipatɨta Kakaɨyari niukametemama meniparewiekaitɨni yaxeikɨa me'utiyuatɨ, mɨpaɨ mete'ikɨhɨawetɨ 'Akawi: «Ti'aitame keniwarutakuya Xamuti Karaha kwieyaritsie kiekatari, pekaniwara'iwamɨkɨ Yawé kamaniparewimɨkɨ».

12 Hikɨ, Mikahiyaxi 'iniwame mɨpaɨ katinitahɨawe:

—Neuxei, yunaitɨ Kakaɨyari niukametemama mɨpaɨ meputiyuane, kename ti'aitame rayu'iwa. 'Ekɨta hetsiena mieme 'aixɨa ketinexata, 'aniuki meta mɨkɨ waniuki meyutaxewirekɨ.

13 Peru Mikahiyaxi mɨpaɨ kaniutayɨni:

—Yurikɨ mɨpaɨ nekanaineni Yawé hɨxie, mɨpaɨ nekamatinahɨaweni ne ti'aitame yanepɨretaxatɨani Kakaɨyari kemɨnerahɨaweni.

14 Kepauka munua ti'aitame hɨxie, mɨpaɨ katinita'iwawiya:

—Mikahiyaxi, ¿teteyɨwawe temɨwatakwini Xamuti Karaha kwieyaritsie kiekatari, nutsutɨ hawaikɨ?

Mikahiyaxi mɨpaɨ katinita'eiya:

—Xekeniwarutakuya xekatenayu'iwakɨni, Kakaɨyari kaniwayetuamɨkɨ xehetsɨa.

15 Hikɨ ti'aitame mɨpaɨ katinitahɨawe:

—¿Kepaɨmexɨa waɨriyarika nepɨmatsipitɨaka, para yurikɨ xeikɨa pemɨnetikuxaxatɨwanikɨ, Yawé hetsiemieme?

16 Hikɨ Mikahiyaxi mɨpaɨ kaniutayɨni:

—Yunaime 'ixaheritsixi nekaniwaruxeiya metaxɨrietɨkaime hɨritsie, muxatsi memɨkatehekakutsiyari wahepaɨ. Hikɨ Yawé mɨpaɨ kaniutayɨni: “'Ikɨ teɨteri yukutsiyari mepɨkahexeiya. Yuxexuitɨ mekeheutayeixɨani yukie kayuwatɨ mehexeiyatɨ”.

17 'Ixaheri kwieyaritsie ti'aitame mɨpaɨ Kutsapati katiniutahɨawe:

—Kamɨ kenemainekai, 'ikɨ hatsuaku 'aixɨa ti'aneme pɨkaneraxaxatɨwani, ke'axamɨtiyɨni xeikɨa pɨnetixaxatɨwa.

18 Tawarita Mikahiyaxi mɨpaɨ kaniutayɨni:

—Xekeneu'eni Yawé niukieya: Yawé nepuxei yu'uwenitsie 'akaime 'auriena yunaitɨ kuyaxi muyuawitsie miemete mepɨti'ukai, tserietana meta 'utatana. 19 Hikɨ Yawé mɨpaɨ kaniutayɨni: “¿Kemɨ'ane 'Akawi 'Ixaheri kwieyaritsie ti'aitame pɨkemakaxɨani ti'itaiyatɨ, Xamuti Karaha kwieyaritsie kiekatari muwatakwinikɨ meta mana mɨmɨnikɨ?” Yuxexuitɨ yɨkɨ metenikuxatakaitɨni kehapaɨ memɨteku'eriwakai. 20 'Arike 'imatɨrieka, xewitɨ 'iyari kaninuani, Yawé hɨxie kaniutakeni, mɨpaɨ kaniutayɨni: “Ne nepikemakaxɨani neti'itaiyatɨ”. Yawé mɨpaɨ katinitahɨawe: “¿Kehapaɨ petiyurieni?” 21 'Iyari mɨpaɨ kaniutayɨni: “Nepɨyemie hikɨ 'iyari mɨti'itawa nepayani Kakaɨyari niukametemama hetsɨana memɨmiemete wahetsie”. Hikɨ Yawé mɨpaɨ katinitanɨ'ani: “Kenemie mɨpaɨ ketinekaye'a, pepeyɨwekaxɨani pepeikemakaxɨani peti'itaiyatɨ”. 22 Kenemaine, Yawé kaniwarupitɨani 'iyari mɨti'itawa 'ikɨ Kakaɨyari niukametemama 'ahetsɨa miemete, Yawé 'ari yakaniutayɨni ke'axamɨmatiyurieni.

23 Tserekiyaxi Kenana nu'aya mɨpaɨ tiu'enaka kananukukeni hikɨ Mikahiyaxi 'auritapa kaneutiwani. Meta mɨpaɨ katinita'iwawiya:

—¿Titayari kename 'iyari Yawé hetsɨa mieme netsi'uku'eiri peraine, kename 'ekɨ pɨta meretaxatɨa?

24 Mikahiyaxi mɨpaɨ katinita'eiya:

—Yapekatinetimaimɨkɨ kepauka peyu'awietanetɨ xeikɨa 'apemuyeikani.

25 Hikɨ 'Ixaheri kwieyaritsie ti'aitame mɨpaɨ katiniuta'aita:

—Mikahiyaxi xekeneuwiyaka xekenanuhani 'Amuni kuwexinaruri 'ena mieme hetsɨa meta Kuhatsi neniwe hetsɨa. 26 Mɨpaɨ xeketeniwaretahɨawi kename mɨpaɨ nehaine meke'enutahɨani mɨkɨ tewi, nitixaɨtɨ mepɨkateheimikwani paa xeikɨa meta haa, kepaukake ne nemakunuani 'aixɨa nereu'erietɨ.

27 Peru Mikahiyaxi mɨpaɨ kaniutayɨni:

—Xɨka 'ekɨ pehakunuani 'aixɨa pereu'erietɨ, mɨpaɨ pɨtimatsiɨkɨni kename Yawé kanetiutaxatɨa. Xeme xeyunaitɨ xepɨkatehatɨtɨmaiyani tinaime kenemutayɨ.

'Akahawi kemɨtiumɨ Xamuti Karaha kwieyaritsie

(2Kem 18:28-34 – 1Te 22:29-36)

28 'Ixaheri kwieyaritsie ti'aitame, meta Kutsapati, Kura kwieyaritsie ti'aitame, mekanekɨne yunaitɨ Xamuti kiekariyari mehetamienike Karaha kwieyaritsie. 29 Mana 'Ixaheri kwieyaritsie ti'aitame mɨpaɨ Kutsapati katiniutahɨawe: «Ne nekaniyutamiemɨkɨ yɨkɨ nerekemaritɨ, peru 'ekɨ 'akamixate witsimɨ'anene ketinanakapitɨ». Hikɨ 'Ixaheritsie ti'aitame yɨkɨ tiyukemaritɨaka kaniyutamieni.

30 Peru Tsiriya kwieyaritsie ti'aitame mɨpaɨ katiniwaruta'aitɨakaitɨni kaxetate kuyaxa miemete nɨ'awamete tewa'aitɨwamete: «'Ixaheri kwieyaritsie ti'aitame xeikɨa xekenetami'a, nixeime tawari xepɨkahemietɨweni». 31 Kepauka kuyaxi kaxeta memuhapana tewa'aitɨwamete Kutsapati memuxei, mɨpaɨ mekateniu'erieni: «'Ikɨ 'Ixaheri kwieyaritsie ti'aitame pɨyɨane». Hikɨ mekanenukuweiya me'itamienike, peru Kutsapati kaniutahiwa, meta Yawé Kakaɨyari kaniparewieni, yakatiniuyurieni memɨka'itamienikɨ. 32 Hikɨ kaxeta memuhapana tewa'aitɨwamete mɨpaɨ metenetimani kename 'Ixaheri kwieyaritsie ti'aitame kayɨanekai, hikɨ 'ana mekanihayewa me'iweiyatɨ.

33 Matsi, xewitɨ katiniutamɨni yutupikɨ hau'erietɨ hikɨ 'Ixaheri kwieyaritsie ti'aitame kaniu'axe katinikwinitɨani, tepɨa kamixayari manakatɨkɨkai taɨta kaneukakeni. Hikɨ ti'aitame, kaxetaya mahanakai mɨpaɨ katiniutahɨawe: «Keneukunuitɨa, kenenetuamie hakewa mɨkarayukwinetsie, 'ariri nepɨtiukwinitɨarie». 34 Tukarikɨ waɨkawamekɨ mekaniyukwitɨwekaitɨni, hipatɨ kuyaxi 'Ixaheri kwieyaritsie ti'aitame 'amekaniukekaitɨni kaxetayatsie tsiriyutsixi wahɨxie, kepaukake mukutaikairixɨ, hikɨ kaniumɨni kepauka tau makayunixɨ.

<- 2Kemɨtiuyɨ 17 2Kemɨtiuyɨ 19 ->