1 Te'aitamete 22

Mikahiyaxi kemutayɨ 'Akawi hepaɨtsita

(1Te 22:1-28 – 2Kem 18:1-27)

1 Haika wiyari panuyetɨa tsiriyutsixi mekayukwitɨwetɨ 'ixaheritsixi wahamatɨa. 2 Peru haika wiyari 'anuyeyaku Kutsapati, Kura kwieyaritsie ti'aitame, kaneyani 'Ixaheri kwieyaritsie ti'aitame hetsɨa. 3 'Ixaheri kwieyaritsie ti'aitame mɨpaɨ katiniwarutahɨawe memiparewie: «¿Xeme xetematetɨtɨ Xamuti Karaha kwieyaritsie mukuma tahetsɨa mumieme? Tame 'atsitepɨkateyuriwawe Tsiriya kwieyaritsie ti'aitame mɨtatsiyetuirienikɨ waɨriyarika».

4 Hikɨ mɨpaɨ Kutsapati katiniuta'iwawiya:

—¿Nehamatɨa pereuyeiwe, temɨwatakwinikɨ Xamuti Karaha kwieyaritsie kiekatari?

Kutsapati mɨpaɨ 'Ixaheri kwieyaritsie ti'aitame katiniuta'eiya:

—'Ekɨtsɨ kepemɨtayɨni ne yanepɨtikayani, yaxeikɨa neteɨterima meta nekawayutsixi. 5 Peru mɨpaɨta kaniutayɨni:

—Peru mexi 'atsitekateyuriwawe, Yawé tepɨta'iwawiya.

6 Hikɨ 'Ixaheri kwieyaritsie ti'aitame kaniwarukuxeɨrieni Kakaɨyari niukametemama, nauka tsienituyari 'etsiwatɨkaku mekaniyupaɨmekaitɨni, mɨkɨ mɨpaɨ katiniwaruta'iwawiya:

—¿Netiyɨwe nemɨwatakwini Xamuti Karaha kwieyaritsie kiekatari, nutsutɨ hawaikɨ?

Mɨkɨ mɨpaɨ mekaniutiyuani:

—Ti'aitame kenemie, Yawé kameniparewimɨkɨ pekaniwara'iwamɨkɨ.

7 Peru Kutsapati mɨpaɨ kaniutayɨni:

—¿Xewitɨ 'ena katiuyeika Yawé niukameyatɨtɨ, mɨkɨ 'akuxi temɨniuta'iwawiya?

8 'Ixaheri kwieyaritsie ti'aitame mɨpaɨ katinita'eiya:

—Xewitɨ 'akuxi 'apuyeika mɨyɨwe mɨkɨ Yawé mɨta'iwawiya tahetsiemieme, Mikahiyaxi katinitewaka 'Imɨra nu'aya. Peru mɨkɨ ne nekani'uxiwe'erieka, hatsuaku 'aixɨa ti'aneme nehetsiemieme pɨkanetixaxatɨwa, ke'axamɨtiyɨni xeikɨa pɨtixaxata.

Kutsapati mɨpaɨ katinitahɨawe:

—Mɨpaɨ pepɨka'utaineni.

9 Hikɨ 'Ixaheri kwieyaritsie ti'aitame xeime kaniuta'inieni yuparewiwame, mɨpaɨ katinita'aitɨani:

—Yapauka xekenene'atɨiri Mikahiyaxi 'Imɨra nu'aya.

10 'Ixaheri kwieyaritsie ti'aitame, meta Kutsapati Kura kwieyaritsie ti'aitame, te'aitamete wakamixate me'anakatɨtɨkaitɨ meta yu'uwenitetsie menatekaitɨni, teɨteri memayukuxexeɨriwatsie Tsamariya kiekariyari kitenieyaritsie, meta yunaitɨ Kakaɨyari niukametemama memɨyuxatakai wahɨxie memɨtekuxatakai. 11 Tserekiyaxi Kenana nu'aya, mɨkɨ tepɨa 'awayari 'uyutiwewirieka, mɨpaɨ putayɨ: «Yawé mɨpaɨ kanaineni: “'Ikɨ 'awatekɨ pekaniwatakwimɨkɨ tsiriyutsixi pepɨkawahayewa kepaukake pemɨwakwini”». 12 Hipatɨta Kakaɨyari niukametemama meniparewiekaitɨni yaxeikɨa me'utiyuatɨ, mɨpaɨ mete'ikɨhɨawetɨ 'Akawi, «Ti'aitame, keniwarutakuya Xamuti Karaha kwieyaritsie kiekatari, pekaniwara'iwamɨkɨ Yawé kameniparewimɨkɨ».

13 Hikɨ, Mikahiyaxi 'iniwame mɨpaɨ katinitahɨawe:

—Neuxei, yunaitɨ Kakaɨyari niukametemama mɨpaɨ meputiyuane, kename ti'aitame rayu'iwa. 'Ekɨta hetsiena mieme 'aixɨa ketinexata, 'aniuki meta mɨkɨ waniuki meyutaxewirekɨ.

14 Peru Mikahiyaxi mɨpaɨ kaniutayɨni:

—Yurikɨ mɨpaɨ nekanaineni Yawé hɨxie, mɨpaɨ ketina'eriwani ne ti'aitame yanepɨretaxatɨani Yawé kemɨnerahɨaweni.

15 Kepauka munua ti'aitame hɨxie, mɨpaɨ katinita'iwawiya:

—Mikahiyaxi, ¿teteyɨwawe temɨwatakwini Xamuti Karaha kwieyaritsie kiekatari, nutsutɨ hawaikɨ?

Mikahiyaxi mɨpaɨ katinita'eiya:

—Ti'aitame, keniwarutakuya pekatinayu'iwamɨkɨ, karikɨ Yawé kameniparewimɨkɨ.

16 Hikɨ ti'aitame mɨpaɨ katinitahɨawe:

—¿Kepaɨmexɨa waɨriyarika nepɨmatsipitɨaka, para yurikɨ xeikɨa pemɨnetitaxatɨanikɨ, Yawé hetsiemieme?

17 Hikɨ Mikahiyaxi mɨpaɨ kaniutayɨni:

—Yunaime 'ixaheritsixi nekaniwaruxeiya metaxɨrietɨkaime hɨritsie, muxatsi memɨkatehekakutsiyari wahepaɨ. Hikɨ Yawé mɨpaɨ kaniutayɨni: “'Ikɨ teɨteri yukutsiyari mepɨkahexeiya. Yuxexuitɨ mekeheutayeixɨani, yukie kayuwatɨ mehexeiyatɨ”.

18 'Ixaheri kwieyaritsie ti'aitame mɨpaɨ Kutsapati katiniutahɨawe:

—Kamɨ kenemainekai, 'ikɨ hatsuaku 'aixɨa ti'aneme pɨkaneraxaxatɨwani, ke'axamɨtiyɨni xeikɨa pɨnetixaxatɨwa.

19 Tawarita Mikahiyaxi mɨpaɨ kaniutayɨni:

—Keneu'eni 'ekɨ Yawé niukieya: Yawé nepuxei yu'uwenitsie 'akaime 'auriena yunaitɨ kuyaxi muyuawitsie miemete mepɨti'ukai, tserietana meta 'utatana. 20 Hikɨ Yawé mɨpaɨ kaniutayɨni: “¿Kemɨ'ane 'Akawi pɨkemakaxɨani, Xamuti Karaha kwieyaritsie mieme kiekari mɨtamienikɨ mana mɨmɨnikɨ?” Yuxexuitɨ yɨkɨ metenikuxatakaitɨni kehapaɨ memɨteku'eriwakai. 21 'Arike 'imatɨrieka, xewitɨ 'iyari kaninuani, Yawé hɨxie kaniutakeni, mɨpaɨ kaniutayɨni: “Ne nepikemakaxɨani”. 22 Yawé mɨpaɨ katinitahɨawe: “¿Kehapaɨ petiyurieni?”. 'Iyari mɨpaɨ kaniutayɨni: “Nepɨyemie hikɨ 'iyari mɨti'itawa nepayani yunaime 'aniukametema 'Akawi hetsɨa memɨmiemete wahetsie”. Hikɨ Yawé mɨpaɨ katinitanɨ'ani: “Kenemie mɨpaɨ ketinekaye'a, pepeyɨwekaxɨani pepeikemakaxɨani”. 23 Kenemaine, Yawé kaniwarupitɨani 'iyari mɨti'itawa yunaime 'ikɨ Kakaɨyari niukametemama 'ahetsɨa miemete, Yawé 'ari yakaniutayɨni ke'axamɨmatsiyurieni.

24 Tserekiyaxi Kenana nu'aya mɨpaɨ tiu'enaka kananukukeni hikɨ Mikahiyaxi 'auritapa kaneutiwani.

Meta mɨpaɨ katinita'iwawiya:

—¿Titayari kename 'iyari Yawé hetsɨa mieme netsi'uku'eiri peraine, kename 'ekɨ pɨta meretaxatɨa?

25 Mikahiyaxi mɨpaɨ katinita'eiya:

—Yapekatinetimaimɨkɨ kepauka peyu'awietanetɨ xeikɨa 'apemuyeikani.

26 Hikɨ 'Ixaheri kwieyaritsie ti'aitame mɨpaɨ katiniuta'aita:

—Mikahiyaxi xekeneuwiyaka xekenanuhani 'Amuni kuwexinaruri 'ena mieme hetsɨa meta Kuhatsi neniwe hetsɨa. 27 Mɨpaɨ xeketeniwaretahɨawi kename mɨpaɨ nehaine meke'enutahɨani mɨkɨ tewi, nitixaɨtɨ mepɨkateheimikwani paa xeikɨa meta haa, kepaukake ne nemakunuani 'aixɨa nereu'erietɨ.

28 Peru Mikahiyaxi mɨpaɨ kaniutayɨni:

—Xɨka 'ekɨ pehakunuani 'aixɨa pereu'erietɨ, mɨpaɨ pɨtimatsiɨkɨni kename Yawé kanetiutaxatɨa. Xeme xeyunaitɨ xepɨkatehatɨtɨmaiyani tinaime kenemutayɨ.

'Akawi kemɨtiumɨ

(1Te 22:29-36 – 2Kem 18:28-34)

29 'Ixaheri kwieyaritsie ti'aitame meta Kutsapati Kura kwieyaritsie ti'aitame, mekanekɨne yunaitɨ Xamuti Karaha kwieyaritsie kiekatari mewaretakwinike. 30 Mana 'Ixaheri kwieyaritsie ti'aitame mɨpaɨ Kutsapati katiniutahɨawe: «Ne nekaniyutamiemɨkɨ yɨkɨ nerekemaritɨ, peru 'ekɨ ti'aitame kamixateya ketinanakapitɨ». Hikɨ 'Ixaheritsie ti'aitame yɨkɨ tiyukemaritɨaka kaniyutamieni.

31 Peru Tsiriya kwieyaritsie ti'aitame mɨpaɨ katiniwaruta'aitɨakaitɨni xeitewiyari heimana tamamata heimana huta meyupaɨmeme kaxetate kuyaxa miemete nɨ'awamete tewa'aitɨwamete: «'Ixaheri kwieyaritsie ti'aitame xeikɨa xekenetami'a, nixeime tawari xepɨkahemietɨweni». 32 Kepauka kuyaxi kaxeta memuhapana tewa'aitɨwamete Kutsapati memuxei, mɨpaɨ mekateniu'erieni: «'Ikɨ xɨari 'Ixaheri kwieyaritsie ti'aitame pɨyɨane». Hikɨ mekanenukuweiya me'itamienike, peru Kutsapati kaniutahiwa. 33 Hikɨ kaxeta memuhapana tewa'aitɨwamete mɨpaɨ metenetimani kename 'Ixaheri kwieyaritsie ti'aitame kayɨanekai, hikɨ 'ana mekanihayewa me'iweiyatɨ.

34 Matsi, xewitɨ katiniutamɨni yutupikɨ hau'erietɨ hikɨ 'Ixaheri kwieyaritsie ti'aitame kaniu'axe katinikwinitɨani, tepɨa kamixayari manakatɨkɨkaita kaneukakeni. Hikɨ ti'aitame kaxetaya mahanakai mɨpaɨ katiniutahɨawe: «Keneukunuitɨa, kenenetuamie hakewa mɨkarayukwinetsie, 'ariri nepu'axie». 35 Tukarikɨ waɨkawamekɨ mekaniyukwitɨwekaitɨni, ti'aitame kaxetaya kayuwatɨ katinikeriekaitɨni, tsiriyutsixi wahɨxie. Peru xuriyaya pɨkatihayewakai matamɨiyatsie mieme puhanekai kaxetatsie, hikɨ mɨkɨ taikaiyaritsie 'Akawi kaniumɨni. 36 'Ari 'akayunirɨmekaku tau, yunaitɨ kuyaxi mɨpaɨ mekateniutahɨawarieni: «Yuxexuitɨ xekeneutayeixɨa yukie. Yunaitɨ yukwiepa xekenakunuaxɨa».

37 Hikɨ ti'aitame kaniumɨni, kanetɨkieni Tsamariya paitɨ, mana kanekateukieni. 38 Kaxetaya mekaniutahauxini putsu matinieretsie Tsamariya kiekariyaritsie, hakewa 'ukari tuminikɨ memɨyuwitɨnɨa memati'ɨwakaitsie, hikɨ tsɨikɨri xuriyaya mekaniukutsena, Yawé kemainekai 'ana kanaye'ani.

39 Hipatɨta kemɨtiɨyɨ 'Akawi ti'aitakaku, meta naime kemɨtiuyuri, paratsiyu kemɨtiutawewi 'erepanite 'awateyakɨ meta kiekarite kemɨ'ane 'aixɨa mutiyuri, kanaye'uka kemɨtiuyɨ xapayaritsie 'Ixaheri kwieyaritsie te'aitamete waxapatsie. 40 'Akawi kaniumɨni, nu'aya kanitsutɨani 'Ukutsiyaxi titewatɨ 'utɨmana ti'aitatɨ.

Kutsapati, ti'aitame Kura kwieyaritsie

(1Te 22:41-50 – 2Kem 20:31–21:1)

41 Merikɨtsɨ Kutsapati 'Atsá nu'aya kanitsutɨani Kura kwieyaritsie ti'aitatɨ nauka wiyari ti'aitakakuri 'Akawi, 'Ixaheri kwieyaritsie ti'aitame. 42 Kutsapati xeitewiyari heimana tamamata heimana 'auxɨwi wiyari kanexeiyakaitɨni kepauka mitsutɨa ti'aitatɨ, Kerutsareme kiekariyaritsie pɨtiuta'aitaxɨ xeitewiyari heimana 'auxɨwi wiyari. Maamaya pɨtitewakai 'Atsuwa Tsiriki nu'aya. 43 Yuheyemekɨ mɨkɨ piweiyakai yupaapa 'Atsá ke'aixɨa mɨtiuyuri, hatsuaku pɨkatiuhayewaxɨ, matsi Yawé kemɨtinake pɨtiyurienekai. Peru pɨka'iti'unaxɨ kakaɨyarixi memɨte'atimawiyarɨwa, 'ayumieme teɨteri mepiyeweiyakai mana metemawatɨwetɨ meta 'ɨkwa metaiyatɨwetɨ. 44 Kutsapati meta kayuwatɨ kanexeiyakaitɨni 'Ixaheri kwieyaritsie ti'aitame hamatɨa.

45 Hipatɨta kemɨtiuyɨ Kutsapati ti'aitakaku, kemɨtiuyuri meta kuyaximama kememɨte'ayu'iwaxɨ, katinaka'utɨarieni kemɨtiuyɨ xapayaritsie Kura kwieyaritsie te'aitamete waxapatsie. 46 Kaniwarayeweiya mɨkɨ kwieyaritsie kakaɨyarixi mewarayexeiyatɨ yuhamatɨa memukahipitekai tuminikɨ, mɨkɨ mana mekaniyuhayewatɨwekaitɨni kepauka paapaya mɨti'aitakai 'Atsá. 47 'Ana 'akuxi 'Erumi kwieyaritsie ti'aitame kaniumawekaitɨni, xewitɨ kuwexinaruri pɨta mana pukatei.

48 Mɨkɨ tukaritsie Kutsapati kanuwate 'amupapa kaniutiwewieni tituayamete makɨnekɨ, 'Upixi reyetewakaku paitɨ memuhukɨ huru memɨtɨyukɨ, peru hatsuaku mepɨkaheuye'axɨa, mekaniukayunixɨani 'Etsihuni-Kewexi reyetewakaku. 49 Hikɨ 'Ukutsiyaxi 'Akawi nu'aya Kutsapati mɨpaɨ katiniutahɨawe: «Keniwarupitɨa neteɨterima 'ateɨterima wahamatɨa nawiyatsixi memɨwanɨ'atɨwenikɨ». Peru Kutsapati yapɨkatiutanaki'eri.

50 Kutsapati kaniumɨni kaniukateukieni yu'ukiyarima wahamatɨa Rawiri kiekariena, 'ukiyarieya. 'Utɨmanata nu'aya Kurani titewatɨ kanitsutɨani ti'aitatɨ.

'Ukutsiyaxi, 'Ixaheri kwieyaritsie ti'aitame

51 Merikɨtsɨ 'Ukutsiyaxi 'Akawi nu'aya kanitsutɨani 'Ixaheri kwieyaritsie ti'aitatɨ Tsamariya kiekariyaritsie, tamamata heimana 'atahuta wiyari ti'aitametɨkaku Kutsapati Kura kwieyaritsie, 'Ukutsiyaxi huta wiyari katiniuta'aita 'ixaheri kwieyaritsie. 52 Peru mɨkɨ Yawé kemɨkatinake katiniuyurieni, paapaya kemɨtiuyuri mɨpaɨ katiniyurienekaitɨni meta yumaama hepaɨ, meta Keruwuhani Nawati nu'aya kemɨtiuyuri hepaɨ, 'ixaheritsixi 'axameteyuriekame muwarayeitɨa. 53 Wahari kakaɨyariyari katini'uximayatsiriekaitɨni meta kaneyexeiyakaitɨni, hikɨ mɨpaɨ Yawé katiniuyehaxɨatɨani, 'Ixaheri Kakaɨyarieya, yemekɨ paapaya kemɨtiuyuri.

<- 1 Te'aitamete 21