1 Hikɨ Weni-'Arari Tsiriya kwieyaritsie ti'aitame, yunaime yukuyaxi kaniwarukuxeɨrieni, kanayeyani Tsamariya tamienike hikɨ kiekari warie menayaxetɨkɨne meta mepeweiyakai hipatɨ te'aitamete xeitewiyari heimana tamamata heimana huta meyupaɨmetɨ, kawayutsixi mepɨwaruhapakai meta kaxetate kuyaxa miemete. 2 Tsamariya kiekariyaritsie hipame kaniwarutanɨ'ani niuki tuayamete mɨpaɨ memɨteheitahɨawekɨ 'Akawi mɨti'aitame 'Ixaheri kwieyaritsie: «Mɨpaɨ kanaineni Weni-'Arari: 3 “'Ahuru meta 'apɨrata katininepinitɨni, meta yaxeikɨa 'a'ɨitama metatsiere 'aniwema temari”».

4 'Ixaheri kwieyaritsie ti'aitame niuki mɨpaɨ 'aneme kanenɨ'ani: «Kepemaine, nekutsiyari meta neti'aitɨwame, ne 'ahetsɨa nekanimiemetɨni, meta naime tita nemɨrexeiya».

5 Tawarita niuki tuayamete mekaniu'axɨani 'Akawi hetsɨa, mɨpaɨ mekatenitahɨawe: «Mɨpaɨ kanaineni Weni-'Arari: “Mɨpaɨ nepɨrenɨ'a pekenetsiyetuirieni 'ahuru 'apɨrata, 'a'ɨitama meta 'aniwema. 6 'Ayumieme, 'uxa'a 'epauka nepɨwaranunɨ'ani nete'uximayatsiriwamete 'aparatsiyuta memeutahaxɨanikɨ meta te'a'uximayatsiriwamete wakiita, mɨkɨ naime mepɨtewayetɨni tita waɨkawa mɨraye'atɨka, mɨkɨ mepɨte'anutɨni”».

7 'Ixaheri kwieyaritsie ti'aitame yunaime katiniwarutanɨ'airieni 'ukirawetsixi, mɨpaɨ katiniwarutahɨawe:

—Neuxei 'ikɨ waɨkawa 'uximatɨarika pɨwiwiene temɨyeha'anikɨ. Kepauka mɨkɨ mɨreyenɨ'a, kename neke'iyetuirieni, ne'ɨitama meta neniwema nepɨrata meta nehuru, nepɨmatiyetuirieni nepɨrehɨawekai.

8 'Ukirawetsixi meta yunaitɨ kiekatari mɨpaɨ mekaniutiyuani:

—Ti'aitame. Hawaikɨ pepɨka'i'enieka meta pepɨkatikupitɨwani tita mɨmatiwawirie.

9 'Ayumieme 'Akawi mɨpaɨ katiniwarutahɨawe Weni-'Arari nɨ'arimama:

—Mɨpaɨ xeketenetahɨawi neti'aitɨwame: “Ne, mati'uximayatsiriwame nemɨhɨkɨ, tinaime nepɨmatiyetuirieni ketita pemɨtiutawau matɨari paitɨ, peru hikɨri hekwamekɨ pemɨnetiwawirie nepɨkayɨwe nemɨmatiyetuirieni”.

Mɨkɨ mekanakunuaxɨani Weni-'Arari hetsɨa mɨpaɨ mete'utahɨawarieka. 10 Hikɨ Weni-'Arari tawari niuki 'Akawi kanenɨ'airieni: «Mekenetsi'u'uximatɨani kakaɨyarixi, xɨka Tsamariyatsie 'etsiwa tumuanari 'uyuhayewa, xɨka nekuyaxima meyɨwaweni xeituiyari memanutunikɨ».

11 Peru 'Ixaheri kwieyaritsie ti'aitame mɨpaɨ katiniuta'ani: «Mɨpaɨ xeketenetahɨawi mɨpaɨ pɨkarekwikani 'akuxi karayu'iwawetɨ».

12 Kepauka Weni-'Arari, 'ikɨ niuki mɨ'atɨiriyarie, kani'iekaitɨni hipame te'aitamete wahamatɨa mematitekaitsie. Yapauka mɨkɨ mɨpaɨ katiniwaruta'aitɨani yukuyaxima: «Xekeneuyukuha'aritɨa». Hikɨ mɨkɨ mekaniyukuha'aritɨani mɨkɨ kiekari memɨtamienikɨ.

13 Merikɨte 'ipaɨ katiniuyɨni, 'Ixaheri kwieyaritsie ti'aitame 'Akawi hɨxie kaninuani xewitɨ tewi Kakaɨyari niukameya, mɨpaɨ katinitahɨawe:

—Yawé mɨpaɨ kanaineni: “¿Petiwaxeiya mɨkɨ kuyaxi memɨyumɨire? Hikɨ nekaniwayetuamɨkɨ 'ahetsɨa pemɨwara'iwakɨ, hikɨ 'ana mɨpaɨ pepɨretimani kename ne Yawé nehɨkɨ”.

14 'Akawi mɨpaɨ katiniuta'iwauni:

—¿Kemɨ'ane wahekɨ pɨtiyurieni?

Mɨpaɨ kaniutayɨni Kakaɨyari niukameya:

—Mɨpaɨ kanaineni Yawé: “Mɨpaɨ nepɨtiyurieni kuyaxi temari wahekɨ, mɨkɨ me'anuyetekaku”.

'Akawi tawari mɨpaɨ katiniuta'iwauni:

—¿Kemɨ'ane meri pɨtikatsutɨani?

Kakaɨyari niukameya mɨpaɨ kaniutayɨni:

—'Ekɨtɨtɨ.

15 Hikɨ 'Akawi kaniwarukuha'aritɨani kuyaxi temari, mɨkɨ huta tsienituyari heimana xeitewiyari heimana tamamata heimana huta (232) mekaniyupaɨmekaitɨni. Meta hipame kuyaxi 'ixaheritsixi kaniwarukuha'aritɨani: mɨkɨ yunaitɨ mekaniyupaɨmekaitɨni 'atahuta miriyari (7.000). 16 Hikɨ tuka 'ayaku mekanayekɨne, mexi Weni-'Arari meta xeitewiyari heimana tamamata heimana huta te'aitamete mɨwara'iniekai yunaitɨ mehetarɨwekai mematiteitsie.

17 Kuyaxi temari mekananuyetekaitɨni. Kepauka nenieremete Weni-'Arari muwanɨ'akai mɨpaɨ memɨte'itaxatɨa kename hipatɨ kuyaxi 'ahurawa mehahukai Tsamariya mehayenexɨaka, 18 mɨpaɨ katiniuta'aita Weni-'Arari: «Xekeniwaretiwiya xepɨkawarekukukuyani, tsepa 'aixɨa 'iyari memɨkɨyɨa yatsepa memɨtatsikukwitɨwe».

19 Kuyaxi temari kiekaritsie mekanayekɨne kuyaxi wahɨxie me'anuyetetɨ. 20 Kuyaxi yuxexuitɨ yuxexuime mekaniwarukwini memɨwaraye'unie, hikɨ 'ana tsiriyatari mekaniyuta'una. 'Ixaheritsixi mekaniwaranukuweiya, matsi Weni-'Arari Tsiriya kwieyaritsie ti'aitame kaniuyuta'una hipame kawayutsixi wahetsie memutekai wahamatɨa. 21 'Ixaheri kwieyaritsie ti'aitame kaniyemiekaitɨni wakwinetɨ, kawayutsixi wahetsie memutekai kaniwarukwini, meta kaxetate yuhetsiemieme kanayeitɨani, yemekɨ waɨkawa tsiriyutsixi mekaneuyehɨiyani.

22 'Arikeketa, kaninuani Kakaɨyari niukameya 'Ixaheri kwieyaritsie ti'aitame hetsɨa, mɨpaɨ katinitahɨawe: «Kayuwatɨ xeikɨa pepɨkatikani pemɨrayu'iwaxɨkɨ, keneyu'iyaritɨaka matsi kehepaɨ pemɨtiyurieni, karikɨ yurikata kaninuamɨkɨ ti'aitame Tsiriya kiekame».

23 Merikɨtsɨ, Tsiriya kwieyaritsie ti'aitame parewiwamete mɨpaɨ mepɨte'eyemari'itɨa: «'Ixaheritsixi wakakaɨyarixi hɨritsie miemete mekanihɨkɨtɨni. 'Ayumieme waɨkawa mekanitɨrɨkawini tahetsiemieme. Xɨka tewarutakwini makuweritsie mana hɨrixɨa tekaniwara'iwawaweni. 24 'Ekɨ 'ipaɨ ketineuyuri: Yunaime te'aitamete keniwarutipata hipame pɨta keniwaranuka'uitɨa 'ahetsɨa memɨte'uximaya. 25 Meta keniwarukuha'aritɨa kuyaxi meripaitɨ pemɨwarexeiyakai hepaɨ meyupaɨmeme, kawayutsixi meta kaxetate kuyaxa miemete yaxeikɨa paɨmeme, temɨwatakwinikɨ 'ixaheritsixi makuweritsie. Kanahekɨaka tekaniwara'iwakuni».

Ti'aitame Weni-'Arari yakatiniutanaki'erieni, mɨpaɨ katiniuyurieni. 26 Xeiwiyari 'anuyeyaku, yukuyaxima kaniwarukuha'aritɨani, mekanekɨne 'Apeki mɨrakutewatsie mana memɨwatakwinikɨ 'ixaheritsixi. 27 Meta ti'aitame 'Akawi yaxeikɨa yukuyaxima kaniwarukuha'aritɨani meta 'ikwai katiniwayetuirieni kepaɨmeme memɨteheuyehɨakai. Hikɨ mɨkɨta mekanayekɨne wahepa memɨwatakwinikɨ tsiriyutsixi, yatewa mekanikuyaxe wahɨxie. 'Ixaheritsixi 'etsimepɨyupaɨmekai, tsipuri xeitewayari 'etsimemɨyupaɨme wahepaɨ mepɨteyuxexeiyakai, peru tsiriyutsixi mepakutsekai makuweritsie.

28 Tewi Kakaɨyari hetsɨa mieme kaninuani 'ixaheritsixi tiwa'aitɨwame hetsɨa mɨpaɨ katinitahɨawe: «Yawé mɨpaɨ kanaineni: “Tsiriyutsixi mɨpaɨ memɨteku'eriwakɨ kename Yawé kakaɨyari hɨritsie mieme hɨkɨ peru makuweritsie katixaɨ. Ne nepɨwayetuani mɨkɨ memɨyumɨire kuyaxi 'ahetsɨa, mɨpaɨ pemɨretimanikɨ kename ne Yawé nehɨkɨ”».

29 'Atahuta tukari mekaniuyurieni yuhɨxie metitetɨ, 'ana 'atahutarieka tukaritsie mekanitsutɨani meyukwitɨwetɨ. Xeimieme 'ixaheritsixi xeitukaritsie mekaniwarukwini xeitsienituyari miriyari kuyaxi tsiriyutsixi yu'ɨkama memu'uwakai. 30 Hipatɨ kuyaxi mekaniyuta'unaxɨani 'Apeki kiekariyaritsie, peru mana kiekari kuraruyari wahetsie kaniu'une kaniwarukwini xeitewiyari heimana 'atahuta miriyari.

Weni-'Arari meta muyuta'unakai, mana kaniyu'awietanekaitɨni xeikɨa kiekaritsie. 31 Hikɨ 'iparewiwamete mɨpaɨ mekatenitahɨawe: «Mɨpaɨ tepɨtemarie kename te'aitamete 'ixaheritsixi meteyukanenimaya. Hikɨmɨ 'Ixaheri kwieyaritsie ti'aitame hetsɨa tepɨtayetuani, tepeitawawirieni mɨtareuyehɨwirienikɨ. Heiwatɨ tiɨyɨme mereuyehɨwirieni kametsi'umieni».

32 Hikɨ 'Ixaheri kwieyaritsie ti'aitame hɨxie mekaniyuyetuani, mɨpaɨ mekatenitawawirieni:

—Weni-'Arari matsiparewiwame mɨpaɨ paine: “Neuxei kwerietɨ nepɨmatsiwawirie, pepɨkanetsikumemiwani”.

Ti'aitame mɨpaɨ kaniutayɨni:

—¿'Akuxi rayeniere? Karikɨ mɨkɨ kanine'iwatɨni.

33 Hikɨ mɨkɨ teɨteri ti'aitame niukieya me'u'enieka 'aixɨa mainekaikɨ, mɨpaɨ mekaniutiyuani:

—Huu tsɨkarikɨte, Weni-'Arari kani'a'iwatɨni.

Ti'aitame mɨpaɨ katiniwarutahɨawe:

—Xekenewitɨyu mɨkɨ.

Kepauka Weni-'Arari munua 'Akawi hetsɨa, mɨkɨ kanenutiyeni yukaxetatsie kuyaxa miemetsie. Hikɨ Weni-'Arari mɨpaɨ katinixatɨani:

34 —Ne nepɨmatsiyetuirieni kiekarite nepaapa 'apaapa munawairiekai. Meta 'ekɨ pepɨyɨwe Ramatsiku kiekariyaritsie pemika'uitɨani hakewa mɨretuiyaka 'ahetsiemieme, nepaapa kemɨtiyurienekai Tsamariya kiekariyaritsie.

'Akawi mɨpaɨ katinitahɨawe:

—Neta hikɨ mɨya pemainekɨ, nekamenitatuamɨkɨ pemɨyemiekɨ.

Mɨpaɨ tɨratu katiniuwewieni hamatɨana, hikɨ 'ana kanitatuani kanipitɨani mɨyemiekɨ.

35 Xewitɨ tewi Kakaɨyari niukametemama wanuiwaritsie miemetɨtɨ, Yawé yarehɨawekaku, xeime yu'iwa mɨpaɨ katiniutahɨawe:

—Keneneutiwaxɨa.

Peru 'iwaya pɨka'uyuwaɨriyaxɨ kemɨrehɨawekai.

36 Hikɨ 'ayumieme Kakaɨyari niukameya mɨpaɨ katinitahɨawe:

—Yawé niukieya pemɨkahanu'enikɨ, hikɨ kwitɨwa pemɨyemietsie maye kamenetakwaimɨkɨ.

Hikɨ mɨpaɨ katiniɨyɨni, yapauka mɨkɨ Kakaɨyari niukameya metɨatsie, muwa maye hayeneka kanitakwani.

37 Hikɨ 'arike mɨkɨ tewi Kakaɨyari niukameya xeime pɨtata hanukunakeka tewi mɨpaɨ katinitahɨawe: «Keneneutiwaxɨa» Yapauka mɨkɨ tewi kaneitiwaxɨani katinikwinitɨani. 38 Hikɨ 'ana mɨkɨ Kakaɨyari niukameya kaneyani huyeta mana ti'aitame hekwewienike, kaneuyukunakaitɨni yuhɨxie 'ixurikikɨ.

39 Kepauka ti'aitame mana muyemiekai, Kakaɨyari niukameya mɨpaɨ katiniuhiwa hɨxiena:

—Ti'aitame. Ne kuyaxa maxuawe yemekɨ nepeyeikakai. Mana xewitɨ nehetsɨa kanenuani xeime tewi 'ahanatɨ memɨtatsikwitɨwe, hikɨ mɨpaɨ kanetinetahɨawe: “'Ikɨ tewi kene'ɨwiyani. Xɨka metsi'utawikweiya hetsiena mieme 'ekɨ nekamenimiemɨkɨ, mexɨkatɨni haika miriyari pɨrata tuminiyari pekaniyetuamɨkɨ”. 40 Neuxei ti'aitame, ne mexi 'akuxi xaɨtsie neheyeikakai, mɨkɨ tewi kanetayuni.

'Ixaheri kwieyaritsie Ti'aitame mɨpaɨ katinitahɨawe:

—Mɨkɨtsɨri 'ahetsie katinahɨiyamɨkɨ kepemaine.

41 Hikɨ 'ana, Kakaɨyari niukameya meuyukuhɨakai kaneuyukɨxɨna, 'anake 'Ixaheri kwieyaritsie ti'aitame Kakaɨyari niukameya kanetimani. 42 Hikɨ ti'aitame mɨpaɨ katiniutahɨawe:

—Yawé mɨpaɨ kanaineni: “Xeime tewi pekaniutatuani ne nemita'aitakai mumierienikɨ. Hikɨri 'ayumieme, 'ekɨ pɨtari pekanimieriemɨkɨ hetsiena mieme, meta 'ateɨterima mɨkɨ teɨterimama wahetsiemieme”.

43 Hikɨ 'Ixaheri kwieyaritsie ti'aitame, nutuixietɨ meta ha'atɨ kanakunuani Tsamariya paitɨ yuparatsiyuta.

<- 1 Te'aitamete 191 Te'aitamete 21 ->