1 Te'aitamete 2

Rawiri yuniwe 'imatɨrieka kemɨtiuhɨritɨa

(1Te 2:10-12 – 1Kem 29:26-28)

1 Hikɨ Rawiri kanimɨximekaitɨni, 'ayumieme yuniwe Tsarumuni mɨpaɨ katiniuhɨritɨani:

2 «Teyunaitɨ yaxeikɨa mɨɨya pɨtatsiheutakwewie, neri 'etsiwa xeikɨa peuyewetse nemɨmɨnikɨ. Kene'atɨrɨkariyani, pepɨkaheumaka 'uki muka'iyari kenehɨkɨtɨni. 3 Yawé 'akakaɨyari 'aitsikayatsie yaketinekamieni huyeya keneuweiyani meta Muitsexi naime 'inɨari niukiyaritsie kemɨraka'utɨa. Mɨpaɨ 'ana tsepa kepemɨtiyuriene 'aixɨa pepɨtiukaxexeiyani meta tsepa hakewa pemetɨa, 4 Yawé, kaneye'atɨamɨkɨ 'ipaɨ kemɨnetiutahɨawixɨ: “Xɨka 'anuiwarima 'aixɨa mete'u'uwani, xɨka yu'iyarikɨ yametekahuni, mɨpaɨ 'anuiwarima xeikɨa mepanuti'uweni 'ixaheritsixi metewa'aitɨatɨ”.

5 »'Ekɨ pepɨtimate, kemɨtiuyuri Kuhawi Tsariwiya nu'aya, mɨkɨ kuyaxa mɨyɨaneni hepaɨ pɨtiuyuri kayuwatɨ 'umakakutɨtɨ, 'Awinexi Nexi nu'aya meta 'Amatsaha Ketexi nu'aya, mɨkɨ yuhutame puwarukwi kuyaxi tewa'aitɨwamete 'ixaheritsixi, mɨpaɨ mɨkɨ yuhetsie pɨrahɨa. 6 'Ayumieme, ketinemaiweni, 'apɨkareutewini 'ena 'uyeikatɨ, pepɨka'ihayewani kayuwatɨ hexeiyatɨ mumɨnikɨ. 7 Matsi 'aixɨa ketiniwaxeiyani Waxitsirahi niwemama Karaha kiekame, mɨkɨ 'amexatsie keniwapitɨaka 'ahamatɨa memɨtekwanikɨ, mɨkɨtsɨ neheima mekaniutanuani kepauka 'a'iwa mɨnetsi'uweiyakai 'Awitsaruni.

8 »Yaxeikɨata nepɨmatsiyetuirie Tsimi Kera nu'aya, Wenikamini xiɨyarieya Wakurini kiekame, waɨkawa 'axapɨnetiutihɨawixɨ Makanahini ne'umiekaku. Kaniyuritɨnita kepauka Kurutani hatuxameyaritsie mɨnetsihekunakixɨ, ne Yawé hɨxie mɨpaɨ nekatineitahɨawe kename neka'imienikekai. 9 'Ayumiemeri 'ekɨ pepɨkareiyehɨwirieka. 'Ekɨ matsi waɨkawa pepɨtimaiwe, 'ekɨri kepemiyurieneni, tsepa mɨ'ukiratsiri keneuta'aita mɨmierienikɨ».

10 Hikɨ Rawiri kaniumɨni, kaniukateukieni yukiekaritsie hepaɨna mɨtitewatsie yu'ukiyarima wahamatɨa. 11 Hewuruni kiekariyaritsie pɨti'aitametɨkai 'atahuta wiyari, Kerutsareme hetsieta xeitewiyari heimana tamamata heimana haika wiyari, naimekɨri pɨtiuta'aitaxɨ huta tewiyari wiyari, 'Ixaheri kwieyaritsie. 12 'Utɨmana mɨtiuta'aitaxɨ nu'aya kanayani Tsarumuni, hikɨ mɨkɨ tɨrɨkaɨyemekɨ katiniuta'aita.

Tsarumuni tɨrɨkaɨyemekɨ kemɨtiuta'ai

13 Hikɨ 'Aruniyaxi Kakiti nu'aya petɨa Wetitsawe Tsarumuni maamaya hetsɨa, Wetitsawe mɨpaɨ katinita'iwawiya:

—¿Petinua pekanetsi'aye'unietɨ?

'Aruniyaxi mɨpaɨ katinita'eiya:

—Huu, 14 tixaɨtɨ nepɨrayexeiya nepɨmatitaxatɨani.

Wetitsawe mɨpaɨ katinitahɨawe:

—Kenetineutaxatɨa.

15 'Aruniyaxi mɨpaɨ kaniutayɨni:

—Kamɨtsɨ 'ekɨ pekatinimaika, nepɨta ti'aitame nekanayanikekaitɨni, yunaitɨ 'ixaheritsixi mɨpaɨ mekateniku'eriwakaitɨni. Peru hikɨri nemuta pɨta katiniunakitsitɨani, Yawé kemɨtinake katiniuyɨni. 16 'Aixɨatsɨ kani'aneni, peru tixaɨtɨ nepɨmatitawawirieni, perutsɨ pekatinaye'atɨamɨkɨ.

Wetitsawe mɨpaɨ katinitahɨawe:

—¿Kekuta petayɨni?

17 'Aruniyaxi mɨpaɨ katinitahɨawe:

—Ximɨxi, 'ekɨ mɨpaɨ ketinetahɨawi ti'aitame Tsarumuni, kenetsi'uwitɨtɨani 'Awitsahaki Tsunemi kiekame, 'ekɨ yapereitahɨaweyu pɨmatsi'anu'enieni.

18 Wetitsawe mɨpaɨ katinita'eiya:

—'Aixɨa kani'aneni, nepɨreitaxatɨani ti'aitame kepemaine.

19 Hikɨ Wetitsawe kaneyani ti'aitame Tsarumuni hetsɨa, mɨpaɨ mɨtitaxatɨanikɨ 'Aruniyaxi hetsiemieme. Ti'aitame kananukukeni mitahɨawekɨ yuwarutsi hɨxie kananakatutsire, hikɨ 'itahɨaweka kanayerɨni yu'uwenitsie, kanita'aitata tawari xeime 'uweni mana mayerɨnikɨ maamaya, hikɨ tserietana kaniutiyerɨni.

20 Wetitsawe mɨpaɨ katinitahɨawe:

—Ximɨxi 'etsiwa nepɨmatitawawirienikeyu, peru yemekɨ yaketinekaye'a.

Tsarumuni mɨpaɨ yumaama katiniuta'eiya:

—Yakeneutayɨki tita pemɨtixata, nemaama 'aku, 'ekɨ tixaɨtɨkɨ nepɨkamatita'imaiya.

21 Maamaya mɨpaɨ kaniutayɨni:

—Keneupitɨa 'a'iwa 'Aruniyaxi 'Awitsahaki Tsunemi kiekame mɨtiwitɨnikɨ.

22 Hikɨ ti'aitame yumaama mɨpaɨ katiniutahɨawe:

—Peru neuxei ¿titayari penetiwawirie 'Awitsahaki 'Aruniyaxi nemɨwitɨtɨanikɨ? Mɨkɨ kaninematsikatɨni, mɨkɨ wa'atɨ mawari wewiwame 'Awiyataxi tiparewie meta Kuhawi Tsariwiya nu'aya. Mɨkɨ 'uweni nemihanitɨanikɨ pekanetinikɨhɨaweni.

23 Mɨpaɨ 'utayɨka, ti'aitame Tsarumuni mɨpaɨ kaniutayɨni Yawé hɨxie: «Kakaɨyari kenetsi'u'uximatɨani kanetsinenimayatɨ, xɨka 'Aruniyaxi neka'umieni mɨya mutayɨkɨ. 24 Yawé pɨnetsi'upitɨa tɨrɨkaɨyemekɨ nepaapa 'uwenieyatsie nemayerɨnikɨ, kemainekai yapɨtiuyuri, nenuiwarimata te'aitamete mepakɨne. 'Ayumieme yurikɨ Kakaɨyari mayenierekɨ mɨpaɨ nepaine hikɨ kwitɨwa 'Aruniyaxi pɨmɨni».

25 Hikɨ kwitɨwa, ti'aitame Tsarumuni Wenahiyaxi Kuyara nu'aya kaniuta'aitɨani 'Aruniyaxi mɨmienikɨ. 26 Meta mawari wewiwame 'Awiyataxi, ti'aitame mɨpaɨ katinitahɨawe: «Kenemie 'akwiepa paitɨ 'Anatuti. Pemɨmierieni 'aixɨa kani'aneni, peru hikɨ pɨkatixaɨ nepɨkamatsimieni, 'ekɨ nepaapa Rawiri matɨa pepukatei kepauka mɨtiuka'eniwakaitsie, meta hɨxiena tɨratu kakuniyari peputikwei Yawé naimekɨmɨyɨwe tipiinieya». 27 Tsarumuni 'Awiyataxi 'uta'imaiyaku Yawé hetsiemieme mawari wewiwame mɨkahɨkɨtɨnikɨ, 'ana mɨpaɨ pɨraye'a Yawé kemutayɨ Tsiru kiekariyaritsie 'Eri nuiwarimama wahepaɨtsita.

28 Kuhawi 'Aruniyaxi pɨparewiekai, tsepa 'Awitsaruni ka'uparewi, mɨkɨ mɨpaɨ tiu'enaka kename 'Aruniyaxi hemɨkairi mɨkɨ kaneyani, 'ixuriki tukiyari Yawé hetsiemieme manuwe peyuta'unaxɨ, mawari wewiwame 'awateyatsie kanikawiekaitɨni. 29 Kepauka mɨpaɨ mɨtiutamari Tsarumuni kename Kuhawi 'uyuta'unakai 'ixuriki tukiyari manuwe, meta kename mawari wewiwame 'aurie heutiwekai, ti'aitame Wenahiyaxi Kuyara nu'aya kaniuta'aitɨani, Kuhawi mɨmienikɨ. 30 Wenahiyaxi kaneyani Yawé tukieya manuwe, Kuhawi mɨpaɨ katiniutahɨawe:

—Keniwayeye'a ti'aitame mɨpaɨ paine.

Kuhawi mɨpaɨ katinita'eiya:

—Hawaikɨ. Matsi 'uwa nepɨmɨni.

Hikɨ Wenahiyaxi heyaka ti'aitame katiniutaxatɨani kemutayɨ Kuhawi.

31 Hikɨ ti'aitame mɨpaɨ kaniutayɨni:

—Kamɨtsɨ ketinaye'atɨa kemaine, kenemi'a meta kenekateuki. Mɨpaɨ petiyurieyu nepaapa meta nehetsiemieme meta netɨɨriyama wahetsie pepɨranuyeitɨani Kuhawi 'atsimekateyuriekame kemɨtiwarukwi meripaitɨ. 32 Yawé Kuhawi 'apɨrakapitɨani mɨɨyakɨ 'atsimekate'u'iyarime mɨwarukwikɨ, nepaapa 'atsikatimaikaku, mɨkɨ Kuhawi 'Awinexi kaniumieni Nexi nu'aya, kuyaxi tiwa'aitɨwametɨkaku 'Ixaheri kwieyaritsie, yaxeikɨata 'Amatsaha Ketexi nu'aya kaniumieni, kuyaxi tiwa'aitɨwametɨkaku Kura kwieyaritsie. Mɨpaɨ yuhutame katiniwarukwini 'ixiparakɨ teɨteri 'aixɨa memɨte'u'iyarikai heitseriemekɨ yamemɨtekahukai keyuri Kuhawi. 33 Kuhawi hetsie kerahɨiyani mɨkɨ memukwi'iwaxɨkɨ metatsiere nuiwarimama wahetsie. 'Apɨta Yawé kayuwatɨ kewapitɨaka Rawiri meta nuiwarimama meta wa'uweni.

34 Hikɨ Wenahiyaxi Kuyara nu'aya heyaka Kuhawi kanemieni meta katiniuta'aita mɨkateukienikɨ kiiya mati'utsie paitɨ makumawetsie. 35 Hikɨ Tsarumuni Wenahiyaxi Kuyara nu'aya kuyaxi tiwa'aitɨwame kanayeitɨani Kuhawi hetsiemieme. Meta mawari wewiwamete wa'ukiyari Tsaruki kanayeitɨani 'Awiyataxi hetsiemieme. 36 Merikɨte Tsimi tiutanɨ'airieka, mɨpaɨ katinitahɨawe:

—Kii keneu'atawewiri Kerutsareme muwa kenayekani. Xaɨtsie pepɨkaheyeikani, 37 kepauka pemayeyani meta kepauka Kiruni 'akiyaritsie pemuyani, pekanimieriemɨkɨ. Peru tame tahetsie pɨkarahɨiyani.

38 Tsimi mɨpaɨ ti'aitame katiniutahɨawe:

—Kamɨtsɨ mɨpaɨ nekatiniyurimɨkɨ, ne nemumati'uximayaitsiriekakɨ 'anekaniuyeikani ti'aitame, mɨpaɨ nekatinikayeimɨkɨ kepemɨnera'aitɨwa.

Tsimi Kerutsareme kiekariyaritsie kaniukateitɨni muixa. 39 Matsi haika wiyari 'anuyeyaku, yuhutatɨ te'i'uximayatsiriwamete mekaniyuta'una Kahati kiekariyaritsie paitɨ, 'Akihitsi mɨra'aitakaitsie Mahaka nu'aya. Kepauka Tsimi mɨtiutamari kename Kahati paitɨ mehe'uwa te'i'uximayatsiriwamete, 40 'ana yupuxu 'anutixiratɨaka kaneyani wareuwaumieka meta tawari mɨwa'atɨanikɨ. 41 Kepauka Tsarumuni mɨtiutamari kename Tsimi Kerutsareme yeyaka Kahati paitɨ heyakai meta kename 'akunuakai, 42 hikɨ titanɨ'airieka mɨpaɨ katinitahɨawe:

—Ne yanepɨmatiutahɨawixɨ yapemɨtayɨnikɨ Yawé hɨxie, ne mɨpaɨ nepɨmarayehɨtɨa: “Kepauka pemayeyani tsepa hakewa, pekanimieriemɨkɨ”. 'Ekɨta yapeputayɨ kename yapetikayanikekai yapera'eriwakai. 43 ¿Kamɨtsɨ ketitayari yapekatikatɨa yape'utayɨka Yawé hetsiemieme, meta titayari yapekatikatɨa kenemainekai?

44 Metatsiere ti'aitame mɨpaɨ Tsimi katiniutahɨawe:

—'Ekɨ pepɨrakumate kepemɨtikwinitɨa nepaapa Rawiri, hikɨri Yawé hetsiena pɨtanuani ke'axapemɨtiuyurikɨ. 45 Matsi ne 'aixɨa nepɨ'itɨarieka, meta Rawiri 'uwenieya yuheyemekɨ 'apuweni nuiwarimama wahetsiemieme meta 'aixɨa pɨtiumieni Yawé hɨxie.

46 Hikɨ yapauka ti'aitame, Wenahiyaxi Kuyara nu'aya mimienikɨ kanita'aitɨani. 'Ana Wenahiyaxi Tsimi kaniumieni. Mɨpaɨ tiuyɨku Tsarumuni xeikɨa ti'aitatɨ kanayani.

<- 1 Te'aitamete 1 1 Te'aitamete 3 ->